Ol Gudfala Fasin We Oli Stap Oltaem​—Bos Long Tingting

BAEBOL I TALEM SE: “Man we i no gat hed, hem i save soemaot long fes blong ol man we hem i kros, be man we i gat hed, tingting blong hem i longfala, mo hem i save holem kros blong hem.”—Ol Proveb 29:11.

SAMTING WE I KAMAOT: !Sipos yu mas raetemdaon ol gudfala samting we i kamaot from man i bos long tingting, ating bambae yu nidim plante pepa! Fasin ya we man i bos long tingting, i save mekem bodi blong hem i stap gud. Baebol i talem se: “Sipos tingting blong man i stap kwaet oltaem, hemia bambae i mekem bodi blong hem i stap gud.” Hem i talem tu se: “Sipos yu yu stap glad oltaem, sik i no save spolem yu.” (Ol Proveb 14:30; 17:22) Plante stadi we ol man oli mekem, i soemaot se ol man we oli kasem hatatak no strok, hemia olgeta we oli stap kros oltaem mo oli no laekem narafala man. Be i tru se bos long tingting i no mekem bodi i kam gud nomo, be hem i givhan long man blong i no kasem sam trabol long laef.

Cassius, we i gat bitim 30 yia i talem se: “Mi mi stap raorao oltaem mo mi stap kros kwik. Mo oltaem mi stap statem faet. Mi mi tinghae long mi wan. Be taem mi folem ol advaes blong Baebol, ol fasin blong mi oli jenis. Mi lanem blong bos long tingting blong mi blong mi no kros kwik. Mo mi lanem blong gat tingting daon mo fogivim narafala. Sipos mi no mekem olsem, ating mi go long kalabus finis. !Be mi glad se mi jenisim fasin blong mi!”