Samting We Sayens i No Talem
Ol saentis oli stadi long klosap evri samting we yumi save long yunives, be oli no save ansa blong plante impoten kwestin.
?Ol saentis oli save se yunives mo laef i stat olsem wanem? Nogat. Sam man oli talem se ol man we oli stadi cosmology, oli gat ansa. Be wan profesa blong astronomi long Dartmouth College, Marcelo Gleiser, we i no bilif long God i ansa se: “Mifala i no eksplenem nating olsem wanem yunives i stat.”
Long saed blong olsem wanem laef i stat, wan atikol long Science News magasin i talem se: “Maet i no posibol blong talem stret olsem wanem laef i stat long wol. Ol ston mo fosil we oli save soem wanem i hapen taem wol i stat, oli lus finis.” Ol toktok ya oli soem se sayens i no ansa yet long kwestin ya se: ?Olsem wanem yunives mo laef i stat?
Maet yu stap tingting se: ‘Sipos wan man i disaenem laef long wol, ?hu ya man ya?’ Maet yu askem ol kwestin ya tu se: ‘?Sipos i gat wan Krieta we i waes mo i gat lav, from wanem hem i letem ol man we hem i wokem oli stap safa? ?From wanem i gat ol defdefren relijen? ?From wanem hem i letem ol man blong hem oli mekem plante nogud samting?’
Sayens i no save ansa long ol kwestin ya. Be hemia i no min se i nogat ansa. Blong talem stret, plante man oli faenem ol stret ansa insaed long Baebol.
Sipos yu wantem save from wanem sam saentis we oli stadi Baebol oli bilif se i gat wan Krieta, visitim jw.org mo lukaotem ol video ya Tingting Blong Ol Narafala Long Stamba Blong Laef.