OL YANGFALA OLI ASKEM
?Mi Mas Mekem Wanem Blong Kamgud Moa Blong Storian?
Long haf ya
?From wanem i gud blong toktok stret long fes blong man?
Samfala oli talem se i had blong toktok stret long fes blong man mo i mekem oli wari, oli ting se i moa isi blong sanem teks mesej.
“I had moa blong toktok stret long fes blong man, from we yu no save jenisim o ravemaot ol tok we yu talem.”—Anna.
“Teks mesej i olsem ol tok we oli rikodem finis, be taem yu toktok stret long fes blong man, hemia i olsem wan plei we oli mekem long fored blong ol man. !Taem mi stap toktok, mi stap tingbaot nomo se mi no mas mestem long ol toktok blong mi!”—Jean.
Samtaem long laef blong yu, bambae yu mas save olsem wanem blong toktok stret long fes blong man. Olsem taem yu wantem faenem ol niufala fren, faenem mo holem wan wok, o taem yu rere blong frenem wan boe o gel.
Be i gat sam gud nius, hemia se yu no nid blong fraet bitim mak blong toktok stret long fes blong narafala. Nating se yu wan man blong sem, yu save lanem fasin ya.
“Yumi evriwan i save mestem samtaem long ol toktok blong yumi, mo yumi sem from. Yu no mas tingting tumas long ol mastik blong yu.”—Neal.
?Olsem wanem blong statem wan storian?
Askem sam kwestin. Tingbaot wan topik we ol man oli laekem blong tokbaot, nao traem statem wan storian long topik ya. Maet yu askem wan kwestin olsem:
“Long yia we i pas, ?yu mekem wan trip i go samples?”
“Websaet ya i nambawan. ?Yu bin luk samtaem?”
“?Yu yu harem nius ya se . . . ?”
Blong tokbaot wan samting we yutufala i save gud, traem tingbaot samting we yutufala i bin mekem tugeta, o samting we yutufala i laekem blong mekem. Maet yutufala i go long sem skul o yutufala i mekem sem kaen wok. Ale yu save askem kwestin long saed blong samting ya.
“Tingbaot sam kwestin long wan topik we yu yu laekem blong tokbaot, mo we yu wantem harem ansa blong ol narafala long hem.”—Maritza.
Lukaot gud: Yu no mas askem plante tumas kwestin. Mo lukaot gud se yu no askem ol kwestin we oli mekem hem i sem, maet ol kwestin olsem: “?Wanem samting we yu yu fraet moa long hem?” o “?From wanem yu werem klos we i blu oltaem?” Laswan kwestin ya i save givim tingting se yu no laekem ol klos blong hem.
Blong mekem se i no saon olsem wan intaviu we yu askem kwestin mo hem i givim ansa, i gud se bifo o afta we hem i ansa long kwestin blong yu, yu talem tingting blong yu long saed ya. Hemia i mekem se i kam olsem wan storian.
?Yu yu stap askem tumas kwestin?
Advaes blong Baebol: “Ol tingting blong man oli olsem wota long wan wel we i dip, be man we i gat fasin luksave i save pulumaot.”—Ol Proveb 20:5, Good News Bible.
Lesin gud. Blong mekem wan storian i gohed gud, i impoten moa blong lesin gud i bitim we yu toktok gud.
“Mi traehad blong lanem wan niufala samting long saed blong man we mi storian wetem hem. Afta, mi traem rimemba samting we man ya i talem, olsem nao, mi save tingbaot wan kwestin blong askem nekis taem mitufala i storian.”—Tamara.
Lukaot gud: Yu no mas wari long nekis samting we bambae yu talem. Sipos yu lesin gud, bambae yu naf blong talem wan samting afta we hem i toktok.
Advaes blong Baebol: “Evri man i mas rere oltaem blong lesin, i no mas hariap blong toktok.”—Jemes 1:19.
Soemaot long hem se yu rili wantem save hem. Bambae yu harem gud moa blong storian sipos yu rili kea long man we yu toktok long hem.
“Taem yu mekem hem i harem se yu rili wantem save samting we hem i stap talem, bambae yutufala i harem gud blong storian, nating se i gat sam taem we yutufala i no save wanem blong talem.”—Marie.
Lukaot gud: Yu no pusum nus tumas long bisnes blong hem. Sipos yu talem se: “Hemia wan naes sot. ?Yu pem hamas long hem?” ating naoia yu go tumas.
Advaes blong Baebol: “Yufala i no mas tingbaot yufala nomo, be yufala i mas tingbaot ol narafala man tu.”—Filipae 2:4.
?Bambae yu mekem wanem blong finisim wan storian? Yangfala Jordan i talem se: “Traem finisim storian wetem wan gudfala tingting. Maet yu talem samting olsem: ‘Mi glad se yumitu save storian,’ o ‘Pasem wan gudfala dei,’ hemia i save mekem i isi blong storian bakegen nekis taem.”