Kitáakanistohtohkott­ssksinimaʼt­soo­kooyi Iihtsipáítapiiyoʼpa

Kitáakohkottohtssksinimaʼtsookoo Iihtsipáítapiiyoʼpa Jehovah ikakáókstoommiiniki Naatóyssínaakssini. Akáísamowa Iihtsipáítapiiyoʼpa óhtsspíísaoʼtakiwa matápiyi ááhkitssínaiʼsaawa otsiksímsstaanistsi. Ámostsska otssínaiiʼpoaawayi níítsínihkatooʼpiaawa Naatóyssínaakssini. Ánnohk ksistsikóyi áakohkottohtssksinimaʼtsootsspi Iihtsipáítapiiyoʼpa áíʼkakókstooʼki Naatóyssínaakssini. Jehovah otsíʼpowahsiistsi, tsááhtaoʼ ohtáyiinapsskakihpi, ótohkaniitáísinaiʼsaawa Naatóyssínaakssini, áakattohkottánistsinihkatooʼpa Iihtsipáítapiiyoʼpa Otsíʼpowahsini. Áakohkottomaiʼtsiiʼpa anní Naatóyssínaakssini, Jehovah máátonawaisáyiwa. “Máátáakohkottssáyiwa Iihtsipáítapiiyoʼpa.” (Hebrews 6:18) Iihtsipáítapiiyoʼpa Otsíʼpowahsini íkamoʼtaʼpiiwa.​—John 17:17.

Naatóyssínaakssini iitsínohtooʼpa sákakaʼpiistsi Iihtsipáítapiiyoʼpa ííhkokkiwa. Niʼtománistsiiwa amá nínaawa áakitssínamoyiiwa ókoʼsiksi. Ííhtsitsinikatooʼpa Iihtsipáítapiiyoʼpa otsiksísttowahsini otsitáakoohkíítaʼpistotsiʼsi annó ksááhkoyi otsitáaksstonnátsiʼtaamaʼpiihpi​—áakánistsinaattsiwa matsowáʼpiʼnssimaani. Ííhtsitsinikatooʼpa otsííkiihpi isskóóhtsika, otáíkiihpi ánnohk, ki otáaksikííhtoahpi íssoohtsika áómaiʼtakiiksi ókoʼsiksi. Áakattsítohkottohtsspommootsspa ááhkssksiniʼsi ááhkanistohkottaiʼtsiʼsi áíiyikiʼtsiiʼpistsi ki ááhkanistohkooniʼsi ááhkanistáíʼtaamaʼpssoʼsi.​—2 Timothy 3:16, 17.

Jehovah Otátohkaʼtohtaaniksi awakkáámiiyaawa Iihtsipáítapiiyoʼpa; kitáakohkottohtsspommookiaawa kitááhkotsistapiʼtsiʼsaawa Naatóyssínaakssini íssksinimáʼtstohkssiistsi. Káákaanistsísaawa kitáísstaahsi kitááhkohtssksinimaʼtsookoohsi anní Naatóyssínaakssini ki kimáátáaksiponihtaisskookiaawa. (Matthew 10:8) Kitáóhkottsitsspáítsinohkanoo áʼyáóhkanoosaawa ámoksska Jehovah Otátohkaʼtohtaaniksi. Ámostsska otsitáwáátsimoyihkaahpoaawaistsi niitáínihkatooʼpiaawa Jehovah Otátohkaʼtohtaaniksi Otsitáóhkanoohpiaawa. Ikkamáítsinohkanoiniki otsitáwáátsimoyihkaahpoaawáyi, kitáakitapikkamomatapssksiniiʼpi Iihtsipáítapiiyoʼpa otokakísskskaʼtakssiistsi.

Kitáakáttohkottohtaissksinimaʼtsookoo Iihtsipáítapiiyoʼpa káákáíssaʼtsimmiiniki otáʼpistotakssiistsi. Iitssínaiiʼpi anní Naatóyssínaakssini: “Iihtsipáítapiiyoʼpa áʼpistotsíma sspóóhtsi ki annó ksááhkoyi.” (Genesis 1:1) Jehovah otáʼpistotsiʼsi sspóóhtsi ohkáttsitáʼpistotoyiiwa naatóʼsiyi. Tsá niitánistohtssksinimaʼtsootsspa Iihtsipáítapiiyoʼpa ikkámohkottaʼpistotoasi naatóʼsiyi? Otsskonátaʼpissi naatóʼsiwa ki iihtáíksistohsoyoʼpa ki iihtáwaanaʼkimaoʼpa ki máátáakonawááhtssakaʼsiwa, stámohtsínakowa Jehovah otsstónnatsskonátaʼpsssi ki otsstónnatokákssi.

Stáminakowa Jehovah otawáákomímmokissi áakitáíssaʼtsiiʼpi otáʼpistotákssiistsi. Ísskskaʼtsit ámostsska Jehovah ohkókkiistsi áísaisskiistsi oowátooʼpistsi annó ksááhkoyi, ohkanáómiaʼnistoohkíítsinaattsiyaawa ki ohkanáyoohkíítsipokoyaawa. Stámohtsínakowa Iihtsipáítapiiyoʼpa Jehovah ohtááhsitapissi ki ohtsikímmapiiyipitsiwa ki otáísokitsiihtatahsi ki otáwáákomimmahsi matápii.​—Psalm 104:24.