Iihtsipáítapiiyoʼpa Otákkaamiksi Áakitayáópiiyaawa Áóʼtstsissi Matsowáʼpiʼnssimaani

Matsowáʼpiʼnssimaani máátáakitotoisapiiwa niitáípaitapiiyoʼpa ánnohk annó ksááhkoyi. Iihtsipáítapiiyoʼpa máátonawáísstatooma annó ksááhkoyi ááhkohtoiʼtsissi áʼsokaʼpiiwa ki íkkihkinaʼpiiwa ki matápii ááhkáísttsohkoyssaawa tsááhtaoʼ ááhkáókohkoyssaawa. Íssoohtsika, Iihtsipáítapiiyoʼpa áakanatsístotsima kánoʼtakssksaahkoyi áakitánistsinaattsiwa matsowáʼpiʼnssimaani. Tsá áakánistsinaattsiwa anníhka matsowáʼpiʼnssimaani? Ááhkkippssaʼtsiiʼpa niitánistsitsínikatooʼpi anní Naatóyssínaakssini:

Sokáʼpssiiksi matápii. Iihtsipáítapiiyoʼpa otákkaamiksi áakookóówatoomiaawa matsowáʼpiʼnssimaani. Kiánnikáyi áakitohkanáísoksistotootsiiyiyaawa ki áakóhpoʼkisapipaitapiiyaawa Iihtsipáítapiiyoʼpa otsíkamoʼtokákihtsimaanistsi.​—Proverbs 2:21.

Áakákaowa aoówahsini. Áóʼtstsissi matsowáʼpiʼnssimaani máátáakattsitstsiiʼpa áíponiaakiiksi. Iitssínaiʼpi anní Naatóyssínaakssini: “Áakákaowa aoówahsini annó ksááhkoyi.”​—Psalm 72:16.

Áakoksisstssiʼtsimiaawa áʼpoʼtakssini ki áakohkanaatsowáʼ­pook­óóyi­yaawa. Annó ksááhkoyi anistáʼpissi matsowáʼpiʼnsimaani kanáítapiiksi áakááwattokóóyiyaawa ki áakáyaahsaʼpoʼtakiyaawa.​—Isaiah 65:21-23.

Áakohkanáíkkinaaʼpiiwa kánoʼtakssksaahkoyi. Máátáakattsitstsiiʼpi matápiiksi áíitsskaiksi tsááhtaoʼ iihtáíʼniiksi awahkáóótsiiyssini. Iihtsipáítapiiyoʼpa Otsíʼpowahsini iitssínaiʼpi: “[Iihtsipáítapiiyoʼpa] áakssikáaattsstooma awahkáóótsiiyssini.”​—Psalm 46:8, 9.

Áakssokinaapiayaawa matápii. Anní Naatóyssínaakssini iksísttoyiwa: “Máátáakattsitstsiiʼpi matápii ááhkawaanissi [áóʼtstsissi anníhka matsowáʼpiʼnssimaani]: ‘Nitáísttsiistomi.’” (Isaiah 33:24) Máátáakohkattsitstsiiʼpi máátáípomatooyiiksi tsááhtaoʼ iiyáápstsiiyiiksi tsááhtaoʼ kátaʼyóóhtsimiiksi tsááhtaoʼ kátaʼyáíʼpoyiiksi.​—Isaiah 35:5, 6.

Máátáakattsitstsiiʼpi matápii áísttsohkoyiiksi tsááhtaoʼ áíkkihkiniiʼtakiiksi tsááhtaoʼ áíʼniiksi. Iihtsipáítapiiyoʼpa Otsíʼpowahsini iitssínaiiʼpi: “Iʼnssíni máátáakattsitstsiiʼpa, tsááhtaoʼ óyimmáhsiiksi tsááhtaoʼ áípiwasaiʼniiksi tsááhtaoʼ ísttsohkoyiiksi. Ámostsska máátáakattsitaistsiiyaawa.”​—Revelation 21:4.

Máátáakattsitstsiiʼpi makáʼpitapiyi. Jehovah iksísttoyiwa: “Makáʼpitapiyi ki máátsstakaanaʼpssiiksi áakohtsíkahksinoʼtoayaawa annó ksááhkoyi.”​—Proverbs 2:22.

Matápii áakáwaakomimmotsiiyiyaawa ki áakáíyiniʼyimmotsiiyiyaawa. Máátáakattsitstsiiʼpi iyóómokokakihtsimaani tsááhtaoʼ makáʼpokakihtsimaani tsááhtaoʼ áónootsskiiksi tsááhtaoʼ áíkaimmotsiiyiiksi. Matápii máátáakattáísttsikaanihksiksimsstaayaawa, íkkinaʼpiiwa áakánistaʼpaissiyaawa ki áakohpoʼkisapipaitapiiyaawa Iihtsipáítapiiyoʼpa otsíkamoʼtokakihtsimaanistsi.​—Isaiah 26:9.