Ámohka Ííhtoʼtstsiiwa Isskóóhtsika Iʼsskáániinapsskakssini

Jehovah máátáaksskáakanistsiʼtsimi makáʼpitapii ááhkáóksistotsiʼsi anníhka Matsowáʼpiʼnssimaani. Otákkaamiksi áakiʼtsitapiyaawa ááhkitáyaopissaawa. Áaksikííhtoayaawa makáʼpitapii? Kitáakohkottohkóíssksiniiʼpa ámohka sopowáhtsiʼssini ikkámssaʼtsimmiiniki niitánistsíkamoʼtsitsinikatahpi ámohka Noah. Noah iitsipáítapiiwa oʼtsítskanistsowa ómahksikiipíppoisstoyiimistsi. Ámohka nínaawa iikááhsitapiwa ááhsáíiyikaʼkimaawa ááhkáísapaatooʼsi Jehovah otsitsííhtaanistsi. Nóóhkattsitstsiiʼpa máttsstsíkiiksi ohkáttsitaʼpáíssiiksi stámikakáístotsimiaawa makáʼpiiwa. Otsskáóʼkaʼpissi Jehovah iitánistsiiwa Noah otáakohtsíssitapissi ómahkoʼkakoyiwa ááhkohtáánooksiksistotoahsi makáʼpitapiyi. Aanistsííwa Noah ááhkaʼpistotakssi ómahkááhkioohsaʼtsisi ááhkohtsitsikamotsíípiahsi ostóyi ki otsítapíímiksi.​—Genesis 6:9-18.

Noah ki otsítapíímiksi iitáʼpistotakiyaawa ómahkááhkioohsaʼtsisi. Noah iʼsskáániinapsskoyiiwa matápii áákoʼtssataʼpissi anníhka ómahkoʼkakoyiwa, nóóhkssawá­yisstsii­watsii­yaawa. Stámomaanis­táís­totsi­miaawa makáʼpiiwa. Otáíʼksistsissi ámohka ómahkááhkioohsaʼtsisi, Noah itsípsstsipoʼtoyiiwa kanáómiaʼnistsipiʼkssiiksi ki itáíksowáʼpomaahkaiksi, ki ostóyi ki otsítapíímiksi ohkáttsitsitsípiimmiaawa. Jehovah itómahkssóótamsstaawa. Níítsisámssootaawa níísippiksistsikoyi ki níísippikoʼkoyi. Stámohkanaoʼkakoyiwa kanóʼtakssksááhkoyi.​—Genesis 7:7-12.

Makáʼpitapiiksi áʼtstoomiaawa otsipáítapiiyssoaawayi, nóóhksikamotsíípiayaawa Noah ki otsítapíímiksi. Jehovah ííhtsíssitapiiwa ómahkoʼkakoyiwa ááhkitsitapikamotsiipiahsaawa ííhtsiksíkkaʼpistotsiiʼpi makáʼpiiwa ksááhkoyi. (Genesis 7:22, 23) Naatóyssínaakssini iitssínaiiʼpi áákattoʼtssátaʼpiiwa Jehovah otsitáttáakaanooksiksistotoahsi máátáísstaiksi ááhkáíkamoʼtaʼpaisssaawa. Áíkamoʼtaʼpaissiiksi matápiyi máátáakaanooksiksistotoayaawa, áakomaanistáípaitapiiyaawa annó ksááhkoyi ánistaʼpissi Matsowáʼpiʼnssimaani.​—2 Peter 2:5, 6, 9.

Ánnohk ksístsikóyi iikáwaakáítapiyi áístotsimiksi makáʼpiiwa. Annó ksááhkoyi stámohtohtoiʼtsiiwa áípiyistotakiiksi. Jehovah áísokattohtsíssitapiiwa Otátohkaʼtohtaaniksi ááhkohtáyiʼsskáániinapsskoahsi matápii, ki iikónnatsitapiyi áyisstsííwatoomiksi Jehovah otsíʼpowahsiistsi. Máátáísstaayaawa ááhkáyoohkiitaʼpsssaawa. Máátáísapiʼtsimiaawa Iihtsipáítapiiyoʼpa otánistohtsiʼpoyihpi otáísokiʼtsiiʼpi ki otáíkaiʼtsiiʼpi. Áaksikííhtoayaawa ámoksska matápiyi? Áaksstaoʼnawayoohkíítaʼpssiyaawa? Áakakáyimmiaawa máátáakonawayoohkíítaʼpssiyaawa. Áákattoʼtssátaʼpiiwa makáʼpitapiiksi otsitáakaanooksiksistotoahpiáyi ki máátáakonawaissksipaitapiiyaawa.​—Psalm 92:7.

Annó ksááhkoyi nóóhkssawáakaanooksiksistotsiiʼpa áakaahsitáístsiiwa; áakanistaʼpistotsiiʼpa anní matsowáʼpiʼnssimaani. Ámoksska áwakkaamiksi Iihtsipáítapiiyoʼpa áakomaanistsitáípaitapiiyaawa anníhka Matsowáʼpiʼnssimaani áóʼtstsissi annó ksááhkoyi.​—Psalm 37:29.