Tsá Kitáakánistohkottoʼtssat­sik­soʼ­kowammawa Iihtsipáítapiiyoʼpa?

1. Iihtsipáítapiiyoʼpa kítaʼyáyisstsiiwatooma kanáwaatsimoyihkaanistsi?

Iihtsipáítapiiyoʼpa áwammiiwa kanáítapii áakáítapaatsi­moyih­kaah­saawa. (Psalm 65:2) Noohkssawáyisstsiiwatooma kanáwaatsimoyihkaanistsi. Ááhkamáʼpssayisstsiiwatooma áátsimoyihkaani iihtóʼtstsiiwa amá nínaawa áakitáóhkoʼmistotoyiiwa otohkíímaani. (1 Peter 3:7) Iihtsipáítapiiyoʼpa máátáyisstsiiwatooma otáátsimoyihkaanoaawayi ámoksska Israelites otaʼyáókaʼpihkaʼssaawa. Iitóóhkainakowa iitáʼpssákakaʼpiiwa áátsimoyihkaani. Iihtsipáítapiiyoʼpa áakánoohksisstsiiwatooma amá iipahtsáʼpssiwa ikkamáátsimihkaʼsisi ki ikkamítskiisi otsípahtsaʼpssini.​—Okstóót Isaiah 1:15; 55:7.

Issáʼtsit áísaiksisttoohsini Iihtsipáítapiiyoʼpa Kítaʼyáyisstsiiwatooma Kanáwaatsimoyihkaanistsi?

2. Tsá áakanistáwaatsimoyihkaoʼpa?

Áátsimoyihkaani iikaatowáʼpiiwa, káátsiʼtsítapiwa áakáítapaatsimoyihkaoʼpa Áʼpistotookiwa, Jehovah (Matthew 4:10; 6:9). Áípahtsaʼpssoʼpa, káátohtáísapinihkatsimatawa Iihtsipáítapiiyoʼpa Jesus otsínihkaʼsimi tská iihtsíʼniwa kitsípahtsaʼpssinnoonistsi. (John 14:6) Jehovah máátáísstakkiwa ááhkáómaanistooʼsaawa isínaiiʼpistsi áátsimoyihkaanistsi. Áísstakkiwa ááhkohtoʼtáátsimoyihkaoʼsi kósskitsipahpinnoona.​—Okstóót Matthew 6:7; Philippians 4:6, 7.

Áʼpistotookiwa áóhkottóóhtsimi máátáísaanistooʼpistsi áátsimoyihkaanistsi. (1 Samuel 1:12, 13) Áwammokiwa ááhkaatsimoyihkaoʼsi aʼyáísstaoʼki, anní áíʼtsipookakioʼki, aʼyáaksisttohkihtsoʼki, áakitáaksooyoʼpa, ki aʼyáíiyikiʼtakioʼki.​—Okstóót Psalm 55:22; Matthew 15:36.

3. Iitáómaiʼtakiiksi Jesus Christ máakáóhkanooyaawa?

Máátsikkinísiiwa ááhkáíksoʼko­wam­mahsi Iihtsipáítapiiyoʼpa tská iitsspíópaooʼpa matápii máátsitáómaiʼtakiiksi Iihtsipáítapiiyoʼpa ki tókskammiksi áíkkahsítapiʼtsimiaawa otsiksísttowahsini otáaksíkkinaaʼpissi ksááhkoyi. (2 Timothy 3:1, 4; 2 Peter 3:3, 13) Káátssokaʼpiiwa ááhkáóhpokaʼpaissiimahsaawa áómaiʼtakiiksi, ááhkitáwaahkomimmotsiiyoʼsi.​—Okstóót Hebrews 10:24, 25.

Áakitáóhpokaʼpaissiimayaawa matápii áwaakomimmiiksi Iihtsipáítapiiyoʼpa iihtáísspommootsspa ááhkoʼtssatsiksoʼkowammahsi Iihtsipáítapiiyoʼpa. Jehovah Otátohkáʼtohtaaniksi otsitáóhkanoohpiaawa iitáóhkottsísstsiiwatayaawa áómaiʼtakiiksi ki iitáwaahkomimmotsspa.​—Okstóót Romans 1:11, 12.

4. Tsá kitáakánistohkottoʼtssatsiksoʼkowammawa Iihtsipáítapiiyoʼpa?

Kitáakohkottoʼtssat­sik­soʼ­kowam­mawa Jehovah kitáakitohtáíssk­skaʼ­taki kitánistohtokákihpi Otsiʼpówahsini. Iihtáísskskaʼtsit otánistaʼpaisspi, otánistáókakiaaniihpi, ki otsiksísttowahsiistsi. Aʼyáíssksaʼtsimmiiniki Naatóyssínaakssini áakssokaʼpiiwa kitááhkáótoomaatsimoyihkaahsi, kitáakohtsiistapáíniiyiʼtsiiʼpa Iihtsipáítapiiyoʼpa otákomimmotsiiyssini ki otokakísskskaʼtakssini.​—Okstóót Joshua 1:8; Psalm 1:1-3.

Kitáakohkottoʼtssatsiksoʼkowammawa Iihtsipáítapiiyoʼpa ikkamáísstakatainiki ki ikkamitáómaiʼtakiiniki. Kitomáíʼtakssini áakitamitsskonnátaʼpiiwa ikkamáísskskaʼtsimmiiniki kitohtáómaiʼtakihpi.​—Okstóót Matthew 4:4; Hebrews 11:1, 6.

5. Tsá kitáakanistohtohkoyikííhpa ikkamóʼtssatsiksoʼkowammainiki Iihtsipáítapiiyoʼpa?

Jehovah áíkimmiiwaiksi otáwaakomimmokiksi. Áakohkottohtsspómmoyiiwaiksi ááhkssawaʼpohpáttskiʼsi otomáíʼtakssoaawayi ki otánistoʼtsítsikiʼtsiʼsoaawayi omanistáípaitapiiyssini. (Psalm 91:1, 2, 7-10) Áíʼsskaaniinapsskookiwa ááhkssawáístotsiʼsi makáʼpipáítapiiyssini, ámostsska iihtáwaakánohsoʼpistsi ki máátohtáíʼtaamipaitapiiyoʼpiaawa. Jehovah áíssksinimaʼtsookiwa isstohkanáísoksipaitapiiyssini.​—Okstóót Psalm 73:27, 28; James 4:4, 8.