Tila 2

Ɲɛnamaya banbali jugu

1. K’a masɔrɔ hɛrɛ ani daamu tɛ sɔrɔ ka ye tuma caman, o bɛ ɲininkaliw jumɛn lawuli?

HƐRƐ, dugukolo kan wa? O ka di bɛɛ ye. Nka, mun na mɔgɔ caman tɔɔrɔlen bɛ? Mun de bɛ kow tiɲɛ? Mun na jamanaw bɛ ɲɔgɔn kɛlɛ ani mɔgɔw bɛ ɲɔgɔn kɔniya k’a sɔrɔ hɛrɛ ka di mɔgɔ caman ye? Yala fangamafɛn dɔ de bɛ u bila ka o kojugu ninw kɛ wa? Yala fangatigi yebali dɔ de bɛ jamanaw kunna wa?

2. Kojuguw jumɛn kosɔn mɔgɔ caman bɛ u yɛrɛ ɲininka ni fangajugutigi yebali dɔ sigilen tɛ mɔgɔw kunna?

² Mɔgɔw ka nigɛlɛnya b’an bila ka nin ɲininkali suguw kɛ. E k’i miiri kɛlɛkɛ gasiw la, o minnu bɛ mɔgɔ ninakili minɛ ani ka mɔgɔ jeni, bɔnbu atɔmikiw walima napalimu bɔnbuw, tamɛnɛ kerunnanw, nimanɔgɔsi dagaw, jalakintanw miliyɔn caman fagali, iko a kɛra cogo min na Kanbɔji jamana la, sanji laban ninw kɔnɔ. Yala o ko kolon ninw bɛɛ bɔra u yɛrɛma ten wa? Tiɲɛ don, mɔgɔ bɛ se ka kojugubaw kɛ, nka a ka nigɛlɛnya walew kosɔn, an bɛ se k’an yɛrɛ ɲininka n’a sɔrɔ fangajugutigi yebali dɔ tɛ k’a digi ka bila o la.

3. Bibulu bɛ mun fɔ diɲɛ kuntigiya ko la?

³ Ɲininkali caman kun tɛ. Bibulu b’a jira kɛnɛ kan, ko fɛn hakilima, fangama yebali dɔ de bɛ mɔgɔw ani jamanaw kunna. Bibulu kɔnɔ, Yesu bɛ o fangatigi wele ko “nin diɲɛ kuntigi”. (Yuhana 12:31; 14:30; 16:11.) Jɔnni don?

4. Sendonbaga ye mun jira Yesu la, a ko a bɛ mun fɛn ni a la?

⁴ Walasa k’a dɔn min don, an k’an miiri Yesu ka minisiriya daminɛ la, dugukolo kan. A ka batɛmu kɔ, Yesu taara kungokolon kɔnɔ, yen dafɛn yebali dɔ, min bɛ wele ko Sitanɛ Sendonbaga, o y’a kɔrɔbɔ. A filɛ nin ye, Bibulu b’o kɔrɔbɔli ɲɛfɔ cogo min na: “Sendonbaga taara n’a ye tun kulu jamanjanba dɔ san fɛ, a kɛtɔla ka diɲɛ masayaw ni u nɔɔrɔ jira a la, a ko a ma: ‘Ne bɛna nin fɛn inw bɛɛ di i ma, ni i ye i biri ka batoli wale kelen kɛ ne ye.’”—Matiyu 4:8, 9.

5. a) Mun b’a jira ko diɲɛ kuntigiyaw bɛɛ ye Sendonbaga ta ye? b) Bibulu ka fɔ la, jɔnni ye “nin kow sigicogoya ala ye?”

⁵ Sendonbaga tun ye fɛn min ni Yesu Krista la, i miiri o la. O tun ye “diɲɛ masayaw bɛɛ” de ye. Yala diɲɛ kuntigiyaw bɛɛ tun ye Sendonbaga ta ye sɛbɛ la wa? Ɔwɔ, n’o tɛ, a tun na se cogo di k’u ni Yesu la? Yesu ma sɔsɔli kɛ k’a jira k’u tɛ Sitanɛ ta ye, ni kow tun tɛ ten, a tun na a fɔ. Sitanɛ ye jamanaw kuntigi yebali ye tigitigi. Bibulu y’a fɔ k’a jɛya ko: “Diɲɛ kuuru bɛɛ dalen bɛ jugumantigi ka se jukɔrɔ.” (1 Yuhana 5:19). A bɛ Sitanɛ wele ko “nin kow sigicogoya ala”.—2 Korɛntekaw 4:4.

6. a) Kunnafoni minnu dira Sitanɛ ka kuntigiya kan, o b’an dɛmɛ ka mun faamu? b) Sitanɛ b’a ɲini an ka mun kɛ, an ka kan k’a jaabi cogo di?

⁶ O kunnafoni b’an dɛmɛ k’a faamu, kun min y’a to Yesu ko: “Ne ka Masaya sen tɛ nin diɲɛ la” (Yuhana 18:36). O b’an dɛmɛ fana k’a faamu sabu min na, jamanaw b’a ɲini ka ɲɔgɔn kɔniya, ka ɲɔgɔn halaki, k’a sɔrɔ mɔgɔ gansanw bɛɛ bɛ hɛrɛ de fɛ. Ɔwɔ, “Sitanɛ . . . bɛ ka dugukolo kan mɔgɔw bɛɛ lafili”. (Jirali 12:9.) A b’a ɲini k’an fana lafili. A t’a fɛ an ka Ala ka ladiyalan sɔrɔ: ɲɛnamaya banbali. O de y’a to, an ka kan ka siɲɛ ta walasa k’an yɛrɛ tanga a ka kojuguw ma (Efesekaw 6:12). An ka kan ka Sitanɛ ni a ka fɛɛrɛw dɔn walasa ka se k’an yɛrɛ lafasa a ma.

SENDONBAGA YE JƆNNI YE?

7. Mun na mɔgɔ tɛ se ka Sendonbaga ye ɲɛ la?

⁷ Sitanɛ Sendonbaga ye mɔgɔ yɛrɛ-yɛrɛ de ye. Jugumankɛ min bɛ mɔgɔ kelen-kelen bɛɛ kɔnɔ, o tɛ ale ye, iko dɔw b’a miiri cogo min na. Mɔgɔw kɔni tɛ se ka Sendonbaga ye ɲɛ la, iko Ala fana tɛ se ka ye ɲɛ la cogo min na. Ala ani Sitanɛ fila bɛɛ ye hakilimaaw ye, ɲɛnamaya sifaya dɔw don, minnu kɔrɔtalen don, ka tɛmɛn an kan, an ɲɛw tɛ se k’u ye.—Yuhana 4:24.

8. Mun na mɔgɔ caman dalen b’a la ko Ala ye Sendonbaga da?

⁸ Nka dɔw b’a fɔ ko “ni Ala ye kanuya ye, mun na a ye Sendonbaga dila?” (1 Yuhana 4:8). Ala ma Sendonbaga da. Dɔ n’a fɔ tuguni ko “n’a sɔrɔ Ala ye fɛn bɛɛ da, wajibi, a ye Sendonbaga da. Jɔnni wɛrɛ tun na se ka o kɛ? Sendonbaga bɔra min?”

9. a) Mɛlɛkɛw ye maa sifayaw jumɛn ye? b) “Sendonbaga” ani “Sitanɛ” daɲɛw kɔrɔ ye mun ye?

⁹ Bibulu b’a ɲɛfɔ, ko Ala ye hakilimaaw caman caman da ka u kɛ iko a yɛrɛ cogo. Bibulu bɛ olu wele “mɛlɛkɛw” wala “Ala denkɛw”, (Job 38:7; Zaburu 104:4; Heburuw 1:7, 13, 14.) Ala ye u bɛɛ da ka kɛ fɛn dafalenw ye. U dɔ la kelen si tun tɛ sendonbaga ye wala sitanɛ. “Sendobaga” daɲɛ kɔrɔ ye mɔgɔ min bɛ nkalon tigɛ ka da dɔ la walasa ka ko se o tigi ma, “sitanɛ” daɲɛ kɔrɔ ye kɛlɛɲɔgɔn ye.

10. a) Jɔnni ye Sendonbaga dila? b) Mɔgɔ tilennen bɛ se k’a yɛrɛ kɛ kojugukɛla ye cogo di?

¹⁰ Don dɔ, Ala denkɛ hakilimaaw dɔ la kelen y’a yɛrɛ kɛ Sendonbaga ye, n’o kɔrɔ nkalontigɛla haramuta min bɛ a mɔgɔɲɔgɔn tɔgɔjugu fɔ, ani, a y’a yɛrɛ kɛ Sitanɛ ye, n’o kɔrɔ Ala kɛlɛɲɔgɔn. A tun ma da ni o cogo ye, nka kɔsa fɛ, a kɛra o ye. An ka misali dɔ ta: Nsonkɛ nsonlama tɛ wolo. Mɔgɔ bɛ se bange denbaya ɲumanba kɔnɔ, ka kɛ ni bangebagaw, ni balimakɛw ani balimamuso tilennenw ye. Nka, o tigi bɛ se ka kɛ nson ye, n’a jarabira nafɔlɔmafɛn na. Cogo di, o tuma, Ala denkɛ hakilimaaw dɔ la kelen y’a yɛrɛ kɛ Sitanɛ Sendonbaga ye?

11. a) Mɛlɛkɛ murutilen tun bɛ Ala sagonako jumɛn kalama? b) A tun ɲɛbɔlen bɛ mun nɔfɛ, o y’a bila ka mun kɛ?

¹¹ Mɛlɛkɛ min labanna ka kɛ Sendonbaga ye, o tun bɛ yen, dugukolo ani Hadama ni Hawa da tuma Ala fɛ (Job 38:4, 7). Ala ye ci fɔ u ye ko u ka denw sɔrɔ minkɛ, o kuma donna o mɛlɛkɛ in tulo la (Jenɛse 1:27, 28). A tun y’a dɔn ko a mɛn o mɛn, dugukolo bɛna fa ni mɔgɔ tilennenw ye, minnu bɛna Ala bato. Dabaga tun sagonako y’o de ye. Nka, o mɛlɛkɛ in tun yadalen bɛ a ka cɛɲɛ ni a ka hakilidiya kosɔn, o kama, batoli min tun ka kan ka kɛ Ala ye, a y’a ɲini ka o sɔrɔ (Ezekiɛl 28:13-15; Matiyu 4:10). Yanni a ka o negelajugu gɛn ka mabɔ a yɛrɛ la, a y’a miiri da o kan, o fana y’a bila ka fɛɛrɛ kɛ walasa ka bonya ni karama sɔrɔ, a tun ɲɛbɔra o min nɔfɛ. A ye mun kɛ?—Yakuba 1:14, 15.

12. a) O mɛlɛkɛ in ye fɛɛrɛ jumɛn kɛ ka kuma Hawa fɛ, a ye mun fɔ a ye? b) Cogo jumɛn na o mɛlɛkɛ in kɛra Sitanɛ Sendonbaga ye? c) Tuma caman, mɔgɔw bɛ fili ka Sendobaga filɛ mun ye?

¹² Mɛlɛkɛ murutilen kumana Hawa fɛ sa dɔ sababu fɛ, iko bolininkumalatigi bɛ se a la cogo min na, k’a kɛ iko dendennin bɛ kuma, mɔgɔw ɲɛkɔrɔ. Nka, o mɛlɛkɛ murutilen in, Bibulu bɛ min wele ko “daminɛ-la-sa”, ale yɛrɛ de kumana Hawa fɛ (Jirali 12:9). A ko Ala ye nkalon tigɛ Hawa ye, k’a bali ka dɔnniya sɔrɔ, a ka kan ni min ye (Jenɛse 3:1-5). O ye nkalon fin ye, min fɛ, a y’a yɛrɛ kɛ sendonbaga ye. A kɛra fana Ala kɛlɛɲɔgɔn ye wala sitanɛ. O de y’a to, k’a miiri ko Sendonbaga ye danfɛn gerema ye, min bɛ mɔgɔtɔɔrɔyɔrɔ dɔ kunna ni bere tuloma ye a bolo, dugu jukɔrɔ, o tɛ tiɲɛ ye. Mɛlɛkɛ fangabatigi don, nka a ka jugu.

DIƝƐ BƆNƐMAKOW SABABU

13. a) Hawa ka jaabi kɛra mun ye? b) Sendobaga ye mun fɔ?

¹³ O nkalon fɛ, Sendonbaga tun bɛ min ɲini, a y’o sɔrɔ. Hawa dara a ka kuma la, ka Ala kanbila. Hawa y’a cɛ fana kɔnɔnasu o ka Ala ka sariyaw cɛn (Jenɛse 3:6). Tiɲɛ yɛrɛ la, Sendonbaga ko mɔgɔw bɛ se ka u yɛrɛ mara ka ɲɛ Ala kɔ. Ani fana, a wasora, k’a fɔ ko ale bɛ se ka Hadama ni Hawa bɔnsɔnw bangetaw bɛɛ kunnatiɲɛ Ala ma.

14. Mun na Ala ma Sitanɛ halaki o yɔrɔnin bɛɛ la?

¹⁴ Tiɲɛ don, Ala tun bɛ se ka Sitanɛ halaki o yɔrɔnin bɛɛ la. Nka, o tun tɛna a to, Sitanɛ ka ɲininkali lawulilenw ka jaabiw sɔrɔ, ɲininkali minnu tun bɛ se ka siga bila mɛlɛkɛ caman hakili la, olu minnu ɲɛ y’a kow bɛɛ ye. O kama, Ala ye waati labila Sitanɛ ye, a ka se k’a ka kuma fɔlenw jira tiɲɛ ye. O kɔ kɛra mun ye?

15, 16. a) Waati labilalen ye mun jira Sendobaga ka kumafɔlenw ko la? b) Sisan koba jumɛn waati surunyara?

¹⁵ Waatiw y’a jira ko mɔgɔw tɛ se k’u yɛrɛ mara a ɲɛ ma, ni Ala ka dɛmɛ tɛ. U ka fɛɛrɛ tigɛlenw si ma ɲɛ. Mɔgɔw tɔɔrɔla kosɛbɛ hadamadenw ka kuntigiyaw kɔrɔ, o minnu ɲɛmɔgɔya bɛ Sitanɛ bolo, Bibulu ka fɔ la. A yera fana ko Sitanɛ tɛ se ka hadamadenw bɛɛ kunnatiɲɛ u ka Ala bato dabila. Sanga ni waati bɛɛ la, mɔgɔw sɔrɔla minnu ye Ala ka sira mara ka to kantigiw ye. Misali fɛ, i bɛ se k’a kalan Bibulu kɔnɔ ko Sitanɛ y’a ɲini ka dɛsɛ Job ka Ala ka baara dabila.—Job 1:6-12.

¹⁶ Sitanɛ ka kuma fɔlenw yera nkalonw ye. A ka kan ni halakili ye a ɲɛ ma, bawo ale de kɛra murutili daminɛbaga ye Ala kama. O ye hɛrɛ ko ye, k’a dɔn ko an sera waati la, waati min kɔnɔ, Ala bɛna dan bila Sitanɛ ka fanga la. O halakili magɛn sen daɲɛ fɔlɔ ɲɛfɔtɔ, Bibulu bɛ sankolo la kɛlɛba dɔ kuma fɔ, min kɛra hadamadenw ɲinɛma. An b’a kalan ko:

17. a) Bibulu bɛ sankolo kɔnɔ kɛlɛ kofɔ cogo jumɛn? b) O kɔ kɛra mun ye sankolo la ani dugukolo kan?

¹⁷ “Kɛlɛ dɔ funtira sankolo la: Mishɛl [Yesu lakununnen] ni a ka mɛlɛkɛw ye dragɔn kɛlɛ, dragɔn fana ni a ka mɛlɛkɛw ye kɛlɛ kɛ nka a ma se sɔrɔ, wa sigiyɔrɔ fana ma sɔrɔ u ye tun sankolo la. O kosɔn Dragɔn kunbaba kerunna, daminɛ-la-sa, min bɛ wele ko Sendonbaga ani Sitanɛ, min bɛ ka dugukolo kan mɔgɔw bɛɛ lafili; a kerunna dugukolo kan, a ka mɛlɛkɛw fana kerunna a fɛ. ‘O de kosɔn, aw ka ɲagali, sankolow, ani aw minnu sigilen bɛ yen! Bɔnɛ bɛ dugukolo ni kɔgɔji ma, katuguni Sendonbaga jiginna aw yɔrɔ, a dusu bɔlenba, a y’a dɔn minkɛ ko a ka waati tuma surunyara.’”—Jirali 12:7-9, 12.

18. a) O sankolola kɛlɛ kɛra tuma jumɛn? b) Mun bɛ ka kɛ dugukolo kan kabini Sitanɛ “kerunna” a kan?

¹⁸ O kɛlɛ kɛra tuma jumɛn na sankolo la? Ko bɛɛ b’a jira k’o kɛra diɲɛ kɛlɛba fɔlɔ waati la, o min daminɛna 1914 san na. Iko a bɛ Jirali kɔnɔ cogo min na, Sitanɛ gɛnna ka bɔ sankolow la o tuma de la, o kɔrɔ ye ko kabini o tuma, an b’a ka “waati tuma surunman” kɔnɔ. O ye Sitanɛ ka diɲɛ “laban donw ” ye. Sariya tigɛnsɔnya barika bonyali, kɔnɔgan kow, kɛlɛw, kɔngɔw, banaw, o n’a ɲɔgɔnna, ye o ko darula ye.—Matiyu 24:3-12; Luka 21:26; 2 Timote 3:1-5.

19. a) Sisan, Sitanɛ jijalen bɛ ka mun kɛ? b) An bɛ hakili sɔrɔ ka mun kɛ?

¹⁹ A y’a dɔn minkɛ k’o “waati tuma surunman” bɛ ɲini ka se a dan na, Sitanɛ cɛsirilen bɛ, walasa ka mɔgɔw kunnatiɲɛ Ala ma. A sago ye ka taa ni mɔgɔ camanba ye a fɛ, halakili kɔnɔ. O de y’a to, Bibulu b’a kofɔ iko waraba konbotɔ min b’a ɲini ka mɔgɔ dɔ dumu (1 Piɛre 5:8, 9). N’an t’a fɛ a k’an minɛ, an ka kan k’a dɔn cogo min na a bɛ mɔgɔ kɛlɛ ani sira minnu fɛ a bɛ mɔgɔw lafili.—2 Korɛntekaw 2:11.

SITANƐ BƐ MƆGƆW LAFILI COGO MIN NA

20. a) Yala Sitanɛ ye jo sɔrɔ a ka kɛlɛtigɛkow la wa? b) Mun na an ka kan k’an sigi n’a ye, ko Sitanɛ ka dibidibikow bɛna kɛ mɔgɔ ɲɛkɔrɔ iko fɛn minnu tɛ kojuguw ye, iko yɛrɛ nafamafɛnw.

²⁰ Sitanɛ bɛ fɛɛrɛ minnu kɛ walasa mɔgɔw ka tugu a nɔfɛ, i kana a miiri k’olu lasaa ka di. Mɔgɔlafiliŋana don. A ka fɛɛrɛw kegunya barika bonya kosɔn, bi bi in na, mɔgɔ caman tɛ da a la yɛrɛ ko fɛn ɲɛnama don. Olu ɲɛna, kojugu ni juguya ye an delikow ye fɔ abada. Sitanɛ bɛ kow kɛ iko kojugukɛlabaw minnu b’u yɛrɛ dogo maasɛbɛya ɲɛ kɔfɛ. Bibulu ko: “Sitanɛ yɛrɛ b’a yɛlɛma ka a yɛrɛ kɛ tuma bɛɛ, mɛlɛkɛ yeelentigi ye.” (2 Korɛntekaw 11:14). O de y’a to, a ka dibidibikow bɛ kɛ mɔgɔ ɲɛkɔrɔ iko fɛnjuguw tɛ, tuma dɔw la yɛrɛ, u bɛ kɛ iko fɛn nafamaw.

21. Sitanɛ ka fɛɛrɛw dɔ la kelen ye mun ye?

²¹ I kana ɲinɛ ko Sitanɛ y’a yɛrɛ kɛ i n’a fɔ Hawa teri. Ni kegunya ye, a ye o bila ka fɛn kɛ, o miiri la, a nafa tun b’a la (Jenɛse 3:4-6). Bi bi in na, a bɛ o cogo kelen na. A ka baaradenw sababu fɛ, Sitanɛ bɛ jijukɔrɔsaya kɛ, ka dusu don mɔgɔw kɔnɔ, walasa u ka kuntigiyaw makoɲɛkow ta ka bila Ala ka baara ɲɛ. O nana ni fasokanunciya ye, o min kɛra kɛlɛjuguba caman kun ye. Nin san labanw la, Sitanɛ ye mɔgɔw digi u ka kow latigɛ, ka jɛkuluw sigi sen kan hɛrɛ ani ɲɛsuma ko la. O dɔw la kelen ye Nasiɔn Zuniw ka Ɔrganizasiɔn ye. Nka, yala hɛrɛ bɛ diɲɛ na wa? Abada! O ɔrganizasiɔn ye mɔgɔw kunnatiɲɛ Ala ka hɛrɛlaselan ma: Krista, “hɛrɛ Kuntigi” ka Masaya.—Esayi 9:6; Matiyu 6:9, 10.

22. Sitanɛ t’a fɛ an ka dɔnniya jumɛn sɔrɔ?

²² Walasa ka ɲɛnamaya banbali sɔrɔ, fɔ an ka Ala, a Denkɛ-Masa ni a ka Masaya dɔn (Yuhana 17:3). Da o la: Sitanɛ t’a fɛ i ka o dɔnniya sɔrɔ, a dun bɛna ko bɛɛ kɛ walasa ka i bali o la. Cogo di? A bɛna kɛlɛ wuli i la, ɲagaribɔliw n’a ɲɔgɔnnaw sira fɛ. Bibulu ko: “Mɔgɔ minnu b’a fɛ ka taama Alaɲɛsiran kɔnɔ ni Krista Yesu ye, olu bɛɛ fana bɛna tɔɔrɔ.”—2 Timote 3:12.

23. a) Sitanɛ bɛ se cogo di ka an baramɔgɔw ni an teri dɔw bila k’an dusu faga. b) Mun na, abada i man kan k’a to u ka se i la?

²³ I bɛ sɛbɛnniw kalan min kɛ, a dɔ rɔ, o man di i baramɔgɔw dɔw wala i teriw dɔw ye. Yesu Krista y’a fɔ ko: “Ɔwɔ, mɔgɔ juguw bɛna kɛ a yɛrɛ ka so kɔnɔ mɔgɔ dɔw ye. Mɔgɔ min b’a fa wala a ba fɛ ka tɛmɛn ne kan, o tigi man kan ni ne ye; ani, mɔgɔ min b’a denkɛ wala a denmuso fɛ ka tɛmɛn ne kan, o tigi man kan ni ne ye.” (Matiyu 10:36, 37). Baramɔgɔ dɔw bɛna a ɲini ka i dusu faga, k’a masɔrɔ u tɛ Bibulu tiɲɛ ɲumanbaw dɔn, a dɔ rɔ, u kɔnɔ jɛlen don. Nka, ni e ye Ala ka kuma kalan dabila o kɛlɛ gɛlɛyaw kosɔn, Ala bɛna mun miiri e ko la? O bannen kɔ, e na se cogo di k’i baramɔgɔ wala i teri inw dɛmɛ u k’a faamu ko ɲɛnamaya ko ani saya ko de dulonnen bɛ Bibulu kɔnɔkow dɔnniya ni a dɔnbaliya la? Nka, i bɛ ko minnu kalan, n’i sinsinnen tora olu kan, lahala o bɛna laban ka u bila u fana ka tiɲɛ kalan.

24. a) Sendonbaga bɛ fɛɛrɛ wɛrɛw jumɛn kɛ walasa mɔgɔw kana ɲɛnamaya sɔrɔ cogo dɔn? b) E ka miiri la, yala Ala ka Kuma kalan ko dalilu ka bon tiɲɛ na wa?

²⁴ Sitanɛ bɛ se fana ka i digi ka jantaraya wale dɔw kɛ, minnu man di Ala ye (1 Korɛntekaw 6:9-11), wala a bɛna i bila i k’a miiri ko i ka baara ka ca kojugu Bibulu kalan ma. Nka, n’an miirila a ɲɛ ma, yala fɛn bɛ sɔrɔ min ka fisa ni o kalan ye wa? Fosi kana i bali ka o dɔnniya sɔrɔ, o min bɛ se ka taa ni an ye ɲɛnamaya banbali fan fɛ, alijinɛ kɔnɔ dugukolo kan!

25. Ni an taara a fɛ ka Sitanɛ kɛlɛ, a na dɛsɛ ka mun kɛ an na?

²⁵ Bibulu ka fɔ la, ni ‘i ye Sendonbaga kɛlɛ’, “a na boli k’a mabɔ i la”. (Yakuba 4:7.) Yala o kɔrɔ ye ko a bɛna i tɔɔrɔla dabila wa? Ayi, a bɛna a ɲini tuma bɛɛ ka i sama ka a sago kɛ, nka, ni i ye i jija ka taa a fɛ, k’a kɛlɛ, a tɛna se ka i kunnatiɲɛ Ala ma. I teliya a fɛ o tuma, ka Bibulu dɔnniya sɔngɔgɛlɛnba sɔrɔ, ani k’a sira taama. O ye fɛnba ye min na i dɛmɛ walasa i kana bin Sitanɛ ka janw dɔ la kelen kɔnɔ: nkalon diinɛ.

[Sɛbɛn ɲɛ 16 ani 17nan ja]

Sitanɛ tun na se cogo jumɛn na, ka diɲɛ kuntigiyaw bɛɛ ni Yesu la, ni u tun tɛ a ta ye?

[Sɛbɛn ɲɛ 19nan ja]

Nin nsonkɛ ma wolo ten; o cogo kelen na, Sendonbaga ma da “Sendonbaga”.

[Sɛbɛn ɲɛ 20 ani 21nan ja]

Sitanɛ n’a ka mɛlɛkɛw kerunna dugukolo kan tuma min na, kɛlɛ banna sankolo la. An bɛ o nɔfɛtaw ɲɛgan kow kɔnɔ sisan.

[Sɛbɛn ɲɛ 24nan ja]

A dɔ rɔ, u bɛna i kɛlɛ walasa i kana taa a fɛ ka Bibulu kalan.