Tila 14

Jɔnni bɛ taa sankolo la, mun kama?

1. Mɔgɔw caman bɛ jaabi jumɛn di n’u ɲininkara ko: Jɔnni bɛ taa sankolo la, ka mun kɛ?

CAMAN b’a miiri ko ‘mɔgɔɲumanw bɛɛ bɛ taa sankolo la’. N’a fɔra ko ka mun kɛ, dɔw b’a fɔ ko: ‘Walasa ka kɛ ni Ala ye’ wala: ‘O bɛ kɛ u taama koɲuman sara ye.’ Bibulu bɛ mun fɔ o koɲɛ la?

2, 3. a) Mun b’a to an dalen b’a la ko dɔw bɛna taa sankolo la? b) Ɲininkali jumɛn bɛ jaabi ɲini?

² Bibulu b’a sɛmɛntiya ko Yesu lakununna ka bɔ saya la, ko a yɛlɛnna sankolo la. Ani fana ko mɔgɔ dɔw bɛna taa a sɛgɛrɛ yen. Su laban min kɛra, sani a ka sa, Yesu y’a fɔ a ka cidenw ye ko: “Ne Fa ka so kɔnɔ, sigiyɔrɔ caman bɛ yen. N’o tɛ, ne tun n’a fɔ aw ye, katuguni ne bɛ taa yɔrɔ dɔ labɛn aw ye. Wa ni ne taara ka yɔrɔ dɔ labɛn aw ye, ne bɛ kɔsegin ka na, ne na aw ladon ne kɛrɛfɛ, walasa ne bɛ yɔrɔ min na, aw fana, aw ka kɛ yen.”—Yuhana 14:1-3.

³ Jɛya la, Yesu tun bɛ k’a fɔ u ye k’u bɛna taa sankolo la ka sigi ale kɛrɛfɛ. Ciden Pol ye o jigiya kuma fɔ tuma caman. Misali fɛ, a y’a sɛbɛn: “Anw kɔni, anw ka fasodenya bɛ sankolow la, an kɔrɔtɔlen sigilen bɛ fana, ka kisibaga, Matigi Yesu Krista makɔnɔ ka bɔ yen yɔrɔ la.” (Filipekaw 3:20, 21; Romɛkaw 6:5; 2 Korɛntekaw 5:1, 2). Mɔgɔ miliyɔn caman ye u sinsin o layiduw kan, ka u dusukun da sankolola ɲɛnamaya kan. Nka, yala mɔgɔɲumanw bɛɛ bɛ taa sankolo la wa?

YALA MƆGƆƝUMANW BƐƐ BƐ TAA SANKOLO LA WA?

4, 5. Dalilu jumɛn b’a jira ko Dawuda ni Job ma taa sankolo la?

⁴ Yesu lakununnen kɔ, ciden Piɛre ko Yahutuw dɔw ma: “Dutigi Dawuda (...) sara, (...) a su donna (...) a kaburu bɛ an cɛma fɔ ka se bi ma. K’a masɔrɔ, Dawuda ma yɛlɛn sankolo la.” (Kɛwalew 2:29, 34). O cogo la, mɔgɔɲuman Dawuda ma yɛlɛn sankolo la. Ayiwa, mɔgɔ tilennen Job dun?

⁵ K’a to tɔɔrɔ cɛma, Job ye Ala deli k’a fɔ : “E! n’i tun sɔnna ka ne dogo Sheɔl kɔnɔ [kaburu], ka ne datugulen mara fɔ i ka dimiya ka ban, n’i tun ye waati latigɛ ne ye, ka i hakili jigin ne la!” Job tun miiri b’a la, ko a mana sa, a na taa kaburu kɔnɔ, yɔrɔ min na, a tɛna bɔ fɔsi kala ma. A tun b’a dɔn k’a tɛ taa sankolo la. Nka, o kɔrɔ tɛ ko jigiya tun tɛ a fɛ dɛ, bawo a ko: “Ni kamalenkɔrɔ sara, yala a bɛ se ka ɲɛnamaya kokura wa? Ne ka jakoya baara donw bɛɛ la [waati min bɛ kɛ kaburu kɔnɔ], ne na makɔnɔni kɛ fɔ ne labi tuma ka se. I na weleli kɛ, ne fana na i jaabi.”—Job 14:13-15.

6, 7. a) Mun b’a jira ko mɔgɔ si ma taa sankolo la Krista nyɛ? b) Mɔgɔ kantigima fɛn o fɛn sara Krista nyɛ, mun bɛna kɛ olu la?

⁶ Yuhana, min ye Yesu batise, o fana tun ye mɔgɔɲuman ye. O bɛɛ n’a ta, Yesu y’a fɔ ko: “Min ye dɔgɔmanni ye sankolow masaya kɔnɔ, o ka bon n’a ye.” (Matiyu 11:11). O ye k’a fɔ ko Yuhana tun tɛna taa sankolo la. Hadama ani Hawa murutilen kɔ, a ka ca ni san 4 000 ye, Yesu y’a fɔ ko: “Mɔgɔ si ma yɛlɛn ka taa sankolo la, fɔ min jiginna ka bɔ sankolo la, mɔgɔ Denkɛ.”—Yuhana 3:13.

⁷ O cogo la, Yesu ka fɔ la, san 4 000 minnu tɛmɛnna fɔ ka se ale tile ma, mɔgɔ si tun ma yɛlɛn sankolo la o waati kɔnɔ. Dawuda, Job ani Yuhana batisekɛla bɛna lakunun ɲɛnamaya kama dugukolo kan. Sɛbɛ la, mɔgɔ kantigima fɛn o fɛn sara sani Yesu ka sa, olu bɛɛ jigi tun ye ka kɔsegin ɲɛnamaya la dugukolo kan, u jigi tun tɛ sankololataa ye. U na kɔsegin ka na ɲɛnamaya la, ka kɛ Ala ka Masaya marakɔnɔmɔgɔw ye dugukolo kan.—Zaburu 72:7, 8; Kɛwalew 17:31.

MUN NA MƆGƆ KANTIGIMA DƆW BƐ TAA SANKOLO LA

8. Ɲininkaliw jumɛn jaabi dalilu ka bon kosɛbɛ, mun na?

⁸ Mun na Yesu taara sankolo la? A tun bɛna taa mun kɛ yen? O ɲininkali ninnu jaabiw kɔrɔ ka bon kosɛbɛ, katuguni minnu bɛ taa sankolo la, olu ni Yesu bɛ taa jɛ ciya kelenw na. O yɛrɛ de ye u taa kun ye yen yɔrɔ la.

9, 10. Daniɛl ka fɔ la, n’a bɔra Krista la, jɔnni wɛrɛ ka kan ka mara kɛ Ala ka kuntigiya kɔnɔ?

⁹ Iko an y’a ye cogo min na, Yesu bɛna dugukolo kura mara, k’a kɛlen to masakɛ ye, Ala ka sankolola kuntigiya la. Waati jan sani Yesu ka na dugukolo kan, Daniɛl ka kitabu tun y’a fɔ ko: ‘Mɔgɔ Denkɛ’ bɛna “fanga” sɔrɔ. O “mɔgɔ Denkɛ” ye Yesu Krista ye (Marka 14:41, 62). Ani Daniɛl ye nin fɔ ka da o kan ko: “A ka fanga ye fanga kuntaala damadɔnbali ye, min tɛna tɛmɛn, ani a ka masaya, masaya don, min tɛna cɛn.”—Daniɛl 7:13, 14.

¹⁰ An ka nin kɔlɔsi: Daniɛl ka fɔ la, o ‘mɔgɔ Denkɛ’ in man kan ka sigi fanga la, a kelen. Bibulu ko: “O kɔ, masaya, ani fanga (...) dira jamakulu ma, n’o ye Alataala ka senumanw ye. U ka masaya ye masaya kuntaala damadɔnbali ye.” (Daniɛl 7:27). “Jamakulu ma” ani “u ka masaya” daɲɛw b’a jira ko dɔw bɛna kɛ Krista jɛɲɔgɔnw ye, Ala ka kuntigiya kɔnɔ.

11. Mun b’a jira ko Krista ka kalanden fɔlɔw bɛna masaya kɛ n’a ye?

¹¹ Yesu ye su laban min kɛ ni a ka ciden kantigima tan ni kelen ye, a ko u ma, k’u bɛna kɛ kuntigiw ye ale kɛrɛfɛ Masaya kɔnɔ. “Aw ye, aw, minnu tora ni ne ye tuma bɛɛ ne ka kɔrɔbɔli tɔɔrɔw kɔnɔ; wa ne bɛ jɛ siri ni aw ye, iko ne Fa ye jɛ siri ni ne ye cogo min na, masaya dɔ ko la.” (Luka 22:28, 29). Kɔsafɛ, ciden Pol ni Timote sen donna o jɛ la, nin kumaw bɛ o seereya kɛ, Pol ye kuma minnu fɔ Timote ye ko: “Ni an taara a fɛ ka tɔɔrɔ muɲu, an na sigi masaya la fana n’a ye.” (2 Timote 2:12). Ciden Yuhana fana ye mɔgɔw kofɔ, minnu “bɛna sigi masaya la dugukolo kunna” ni Krista ye.—Jirali 5:9, 10; 20:6.

12. Ibrahima “bɔnsɔn” kunkan kow jumɛn b’a jira ko nyɛmɔgɔ dɔw bɛna fara Krista kan?

¹² O la sa, minnu bɛ taa sankolo la, olu taa kun ye ka mara kɛ ni Krista ye, Ala ka sankolola kuntigiya kɔnɔ. Yesu ye “bɔnsɔn” kunbaba ye, Ala ye mɔgɔ dɔw fara a kan, minnu fana bɛna kɛ “bɔnsɔn” dɔw ye, iko Bibulu b’a fɔ cogo min na, ko: “Ni aw ye Krista ta ye, tiɲɛ na aw ye Ibrahima bɔnsɔn ye, ani cɛntabagaw ye, layidu dɔ sabu la.”—Galasikaw 3:16, 29; Yakuba 2:5.

HADAMADEN JOLI BƐ TAA SANKOLO LA?

13. a) Mun na denyɛrɛninw tɛ taa sankolo la? b) Yesu ye Masaya sɔrɔbagaw kofɔ cogo di?

¹³ Komi u welelen bɛ walasa ka dugukolo mara kɛ, o la sa, mɔgɔ minnu bɛ taa sankolo la, olu ye Yesu ka kalanden kɔrɔbɔlenw ye. O ye k’a fɔ ko, denyɛrɛninw ani denmisɛnninw minnu ma kɔrɔbɔ fɔlɔ krecɛnya sira kan, olu tɛ taa sankolo la (Matiyu 16:24). Nka, n’u sara, u na kɔsegin ɲɛnamaya la dugukolo kan (Yuhana 5:28, 29). O cogo la, mɔgɔ minnu welelen bɛ ka taa sankolo la, olu hakɛ man ca iko minnu bɛna ɲɛnamaya kɛ dugukolo kan, Ala ka Masaya fanga kɔrɔ. Yesu y’a fɔ a ka kalandenw ye ko: “Kana siran, sagakuluni, katuguni a diyara aw Fa ye ka masaya di aw ma.”—Luka 12:32.

14. “Saga kuluni” min bɛ taa sankolo la, o ye mɔgɔ joli ye?

¹⁴ U bɛna kɛ nyɛmɔgɔ joli ye? Yala u hakɛ bɛna dan Yesu ka cidenw ni a ka kalanden fɔlɔw dɔrɔn ma wa? Ayi, “sagakuluni” dan tɛ olu ye, Jirali 14:1, 3 ka fɔ la: “O kɔ, ne y’a ye, Sagaden [Yesu Krista] jɔlen filɛ Siɔn [sankolola ta] kulu kan, waa kɛmɛ ni waa binaani ni waa naani bɛ n’a ye (... ) minnu sanna [wala tara] ka bɔ dugukolo kan.” A kɔlɔsi ko mɔgɔ 144 000 dɔrɔn de yera Sagaden kɛrɛfɛ sankolola Siɔn kulu kan (Heburuw 12:22). O la sa, k’a fɔ ko mɔgɔɲumanw bɛɛ bɛ taa sankolo la, Bibulu n’o yɔrɔ ka jan, nka a b’a fɔ k’a jɛya ko kantigima 144 000 minnu kɔrɔbɔra, k’olu dɔrɔn de bɛna taa sigi masaya la ni Krista ye.

MUN NA U SUGANDIRA KA BƆ DUGUKOLO KAN

15. Mun na Ala ye Masaya nyɛmɔgɔw sugandi hadamadenw cɛla?

¹⁵ Mun na o nyɛmɔgɔw ma sugandi mɛlɛkɛw cɛla fɔ mɔgɔw? K’a masɔrɔ sɔsɔli kɛra dugukolo de kan, ko Jehowa ka fanga dagalen tɛ. Dugukolo de kan, mɔgɔw ka kantigiya ni Ala ye, o tun na se ka kɔrɔbɔ ni Sendonbaga ka kɛlɛ kow ye. Dugukolo de kan fana, Yesu y’a ka kantigiya jira ni Ala ye, kɔrɔbɔli kow senfɛ, k’a ni di kunmabɔnafolo ye hadamadenw bɛɛ kosɔn. A filɛ o ye, kun min y’a to Jehowa ye “sagakuluni” mɔgɔw labɛn, ka u fara a Denkɛ kan, Masaya kɔnɔ. U ka kantigiya fɛ ni Ala ye, u b’a jira ko Sendonbaga ye nkalontigɛ a kɛlen k’a fɔ ko mɔgɔw bɛ baara kɛ Ala ye k’a da nata kan. O la sa, a tun ka kan, Jehowa ka a yɛrɛ nɔɔrɔbɔ mɔgɔw sababu fɛ.—Efesekaw 1:9-12.

16. Mun na an ka kan ka kɛ waleɲumandɔnbaaw ye k’a masɔrɔ Masaya kuntigiw ye u ka ɲɛnamaya kɛ dugukolo kan?

¹⁶ O ye hɛrɛ ye sa, mɔgɔw ka na an mara, minnu ye u ka kantigiya jira ni Ala ye dugukolo kan, dɔw yɛrɛ ye u ni di saraka ye Masaya kosɔn (Jirali 12:10, 11; 20:4)! Mɛlɛkɛw ma o kɔrɔbɔliw ɲɔgɔn dɔn. Mɔgɔw kunkow ma u sɔrɔ. O kama, u tɛ se k’u yɛrɛ bila mɔgɔ dafabaliw nɔ na, walasa ka se k’an kunkow faamu. 144 000 tɛ ten, olu minnu ye o kunko suguw bɛn. Dɔw ye jogo jalakitaw bɔ u yɛrɛ la, o kama, u b’a dɔn, cogo min na, o ka gɛlɛn (1 Korɛntekaw 6:9-11). O kama sa, u na kɛ mɔgɔw ye, minnu na u ka marakɔnɔmɔgɔw faamu dugukolo kan.—Heburuw 2:17, 18.

ALA KA KƆNGEREGASIƆN

17. “Kɔngeregasiɔn” daɲɛ kɔrɔ ye mun ye?

¹⁷ Bibulu ka fɔ la, Krista ye Ala ka kɔngeregasiɔn Kuntigi ye, a kɔnɔmɔgɔw bɛ Yesu ka se kɔnɔ (Efesekaw 5:23, 24). O kama, “egilisi” wala “Ala ka kɔngeregasiɔn” daɲɛ kɔrɔ tɛ so ye, nka Krecɛn kulu dɔ (1 Korɛntekaw 15:9). O tuma, an bɛ minnu matarafa, a bɛnnen bɛ ka olu wele ko Krecɛnw ka kɔngeregasiɔn, iko “Lawodisekaw ka kɔngeregasiɔn” kofɔlen bɛ Bibulu kɔnɔ cogo min na, ani Pol ka lɛtɛrɛ kɔnɔ Filemɔn ma, a ko “kɔngeregasiɔn min bɛ i ka so [Filemɔn ta]”.—Kolosekaw 4:16; Filemɔn 2.

18. a) Jɔn ni jɔn ye “Ala ɲɛnama ka kɔngeregasiɔn” kɔnɔmɔgɔw ye? b) O kɔngeregasiɔn in bɛ wele ni daɲɛw jumɛn ye Bibulu kɔnɔ?

¹⁸ Nka, ni Bibulu bɛ “Ala ɲɛnama ka kɔngeregasiɔn” kofɔ (1 Timote 3:15), a kan bɛ Krista ka kalanden kulu dɔ de ma, minnu bɛ wele fana “bangelen-fɔlɔw ka kɔngeregasiɔn, minnu tɔgɔ sɛbɛnnen bɛ sankolow la”. (Heburuw 12:23.) O cogo la, Krecɛn minnu jigiya ye ka ɲɛnamaya kɛ sankolo la, ni u hakɛ ye 144 000 ye, olu bɛɛ lajɛlen de ye “Ala ka kɔngeregasiɔn” o ye. Bi bi in na, u tɔ tɛ bɛrɛ ye. Krecɛn minnu jigiya ye ka ɲɛnamaya kɛ fɔ abada dugukolo kan, olu bɛ hakili senu ka sira ɲini “Ala ka kɔngeregasiɔn” kɔnɔmɔgɔw kɔrɔ. Bibulu b’o wele fana nin daɲɛw fɛ: “furumuso, Sagaden ka muso”, “Krista farikolo”, “Ala ka Batosoba”, “Ala ka Israɛl” ani “Jerusalɛm kura”.—Jirali 21:9; Efesekaw 4:12; 1 Korɛntekaw 3:17; Galasikaw 6:16; Jirali 21:2.

KO KURA, ALA SAGONATA KƆNƆ

19. Ala ye ko kura jumɛn ɲɛsigi walasa k’a sagonata fɔlɔ tiimɛ ka ɲɛsin dugukolo ma?

¹⁹ Hadama kɛlen kɔ ka mɔgɔw siya sama ka taa jurumu ni saya sira kan, Jehowa ma a sagonata yɛlɛma dugukolo ni mɔgɔw ta fan fɛ. Yɛlɛmali fɛn o fɛn tun mana kɛ, o tun na se ka mɔgɔw bila k’a miiri ko Ala dɛsɛra k’a sagonata fɔlɔ tiimɛ. Kabini daminɛ la, a tun b’a fɛ ka dugukolo kɛ alijinɛ ye, danfɛn hɛrɛmaw ka sigi a kɔnɔ, kɛnɛya dafalen na. Hali bi a sagonata y’o de ye. Ko kura kelenpe min donna a ko la, o ye ko Ala ye kuntigiya sigi senkan, walasa k’a sagonata ɲɛnabɔ koɲuman. An ka segin a kan, k’a fɔ ko a Denkɛ Yesu Krista ye o sankolola kuntigiya Kuntigi ye, ko mɔgɔ 144 000 tara mɔgɔw cɛma, minnu bɛna kɛ a jɛɲɔgɔnw ye a ka masaya la.—Jirali 7:4.

20. a) Jɔn ni jɔn ye “sankolo kuraw” ni “dugukolo kura” kɔnɔmɔgɔw ye? b) I ka kan ka mun kɛ walasa k’a jira k’i b’a fɛ ka kɛ “dugukolo kura” kɔnɔmɔgɔ ye?

²⁰ O sankolola nyɛmɔgɔw de bɛna kɛ Ala ka kow sigicogoya kura “sankolo kuraw” ye. Wa jɔni bɛna kɛ o kuntigiya marakɔnɔmɔgɔw ye? Bibulu ka fɔ la, olu bɛna kɛ “dugukolo kura” ye. (2 Piɛre 3:13; Jirali 21:1-4.) Job, Dawuda ani Yuhana batisekɛla, ɔwɔ, mɔgɔ kantigimaw fɛn o fɛn nana diɲɛ na, Krista nali tuma ɲɛ dugukolo kan, olu bɛɛ bɛna kɛ “dugukolo kura” mɔgɔw ye. Nka, mɔgɔ camanba wɛrɛw fana bɛna kɛ “dugukolo kura” mɔgɔw ye, minnu bɛna kisi bi diɲɛ sigi cogoya jugu halaki tuma, olu sen b’a la. Yala e na sɔrɔ u cɛla wa? Yala a nege b’i la ka kɛ Ala ka kuntigiya marakɔnɔmɔgɔ ye wa? Ni i ko ɔwɔ, cogoya damadɔw bɛ yen, fɔ i ka olu sira ta.

[Picture on page 121]

Yala nin mɔgɔɲumanw taara sankolo la wa?

Masakɛ Dawuda

Job

Yuhana batisekɛla

[Picture on page 122]

A ye su laban min kɛ n’a ka cidenw ye, Yesu ko u ma, k’u bɛna kɛ kuntigiw ye ale kɛrɛfɛ a Fa ka Masaya kɔnɔ.