Sɛ wa ˈkaɲɩɛ sasɛ ˈmö ˈnʋʋ, a nɩ bhïla ˗sɩbhä

ˈSaa Zezwii nʋ ɔ ˈnɩ?

VIDEO: Zezwii ˈa ˈwʋpälɩwɛlɩɩ ˗yɩ tulaa sɛɛ ˗aa Dɩba ˈzʋnɩɲɩɛ ˈyli

1. A nɩ ylɛ VIDEO, a ˗käˈɛ ˗waa, a nɩ zɛlɩ Matie 6:​25-27 ˈmö. ˈN a nɩ yɩlɩ nimïyɩbhäkïbhï ˈlɛ yɔwʋ:

1. (1) Wɛlɩ a ˗mi Zezwii pälɩ ɔ ˈwʋ nzɩ ɔ ˈkä tula nɩɩ Zoova ˈzʋnɩɲɩ bhʋlʋbhlʋ ˈyli ˈnɩ?

2. (2) Zezwii ˗yi abhlɩ ˗lii a ˗bɛ zɩɩ a dɔˈwʋ, ˗maa sɛ ɔ ghlɛnɩ ɔ yɩ wɛlɩɩ ˈmö ˈnɩ? ˗Yɩ kä ɔ ˈŋlɩ ˈn ˈɔ ˈcɩacɩasa ˈla nɛnɩ ɔ ˈnɩ?

ˈSaa ˗a cɩɛ ɔ Zezwii a dɛ ˈnɩ?

2. Wɛlɩ a ˗mi nɩkpa bhɛnɩɛ wa ˈkä sasɛ ˈmö ˈnʋʋ, ˗a ˗kii ˈmö ghlɛnɩɩ, wa yi ˈwlumö ˈzʋ, ˈn yɩ yi wa dila kɛ zɩ.

A nɩ˗gänɩ Zezwii ˈa gbäpöö

3. A nɩ tɩ ˗bɛ ˈwʋ bhïla. A ˗ɲʋa ˈsɔ ˗kä wɛlɩkïbhë yɔwʋ yɩlɩ dɔˈwʋ ˗wʋʋ, sɛɛ a ˗yiɛ wɛlɩkïbhë ˈla a za, a nɩ tɩ ˈmö ˗sɛnɩ ˗këkëkë. ˈBɔgʋʋ a ˗wʋä ˈmö ˈcɩɛnɩ dɔˈwʋʋ, wʋ ˈmö a kïbhï mö a nɩ pɩɛnɩ ˈwʋ. A ˗kɔɔ ˈkïbhë ˈwʋ ˈyɩbhänɩɩ, a nɩ ˗kʋnɔ dlɩˈmökpaanɩsɛ ɔ ˈkä a zɛmösɛnaa sɛ tɛlɩ, nzɩ ɔ ˈkä bhïla. Ɔ ˈnɩ kïbhë ˈla a zɛmösɛna ˗yii, ˈn ɔ ˗käˈɛ wɛlɩ a ˗mi ˗ɲɛ Biblë a ˈcɩawɛlɩɩ ˈsɔ ˈnɩɛ yɔwʋ mönɩ bhïlaa, a nɩ ˈyɩbhänɔ kïbhë ˗mämaa ˈwʋ, ˗a ˈkɔɔ kwänɩ nzɩ ɔ ˈkä sasɛ ˈmö ˈnʋ. A ˗kä ˈylɩmö nɩɩ ɔ ci ˈmö ˈnʋʋ, a bhɛnɩ a ˈkä ˈyukusɛ mö.

4. ˗Mɔ a ˈcɩaa Biblë a ˈsaa ɔ ˗yiɛ, a nɩ ghlɛnii ˈmö a ˈkɔ ˗lii ˗mimii ɔˈɔɔ ˗yi ˈcɩa. A yɩɛ, a ˗kä ˈcɩɛcɩɛkïbhëa ˗a bhïla glusɛsʋ a wɛlɩɩ yɔwʋ yɩlɩɛ yii, nɩkpɛ ˗kä ˈku ˈwë a ˈsaa plɩɛ ˈwʋ a wɛlɩɩ ɔ ˈcɩɛɛ, a nɩ ligbanii ˈtikïyie ˈwʋ ˈwʋ.

5. ˈWʋpälɩwɛlɩɩ a ˈkää ˈmö ghlɛnɩɩ, a nɩ ˈpäni sasɛ dlɩ cɛ. A ˗kä wɛlɩkïbhë ˈwʋ pälɩɛ yii, a nɩ ˈyɩbhä bhʋlʋbhlʋ aɲɩ nimï:

1. (1) ‘Wa yi ɔ sasɛ ˈwʋpälɩwɛlɩ ˈlɛ ˈmö ˈnʋ ˗a?’

2. (2) ‘˗Mɔ n ˈcɩa Biblë, ɔ yi ɔ ˗pa ˗minɩ ˈlɛ ˈmö ˈnʋ ˗a?’

3. (3) ‘Sɛ n ˈkä ɔ ˈzʋ ɔ ˈkä dɛsɛkäkïbhëa ˈwʋ ligbanɩ nzɩ ˈwʋpälɩwɛlɩɩ a ˈyize tɔa ˈwlumö tʋʋ ˈnɩ?’