ˈCƖƐCƖƐKÏBHË 7

ˈSaa kää gbëaa ˈmö, ˈmö -n nɩ ˈcɩa

Lwiikö 1:3

ˈSAA -N ˈKÄÄ NƲ: Mää -n -sɛɛ -naˈa wɛlɩɩ ˈn -n bhïlaa, kɩ dlɩ ˈwʋ nɩɩ yɩ kä gbëaa ˈmö. -N ˈkäa ˈyukwlipʋnɩwaa kwänɩ wa ˈkɩ ˈylɩmö nɩɩ, ˈsaa wa ˈnʋä ˈmö kä gbëaa ˈmö.

SƐƐ -N ˈKÄÄ ˈZƲ:

-N -kä -lu a wɛlɩɩ bhïlaa yi, kɩ dlɩ ˈwʋ nɩɩ yɩ kä gbëaa ˈmö. ˈSaa -n bhïlaa nɩ -glɛ Lagɔ ˈa wɛlɩɩ ˈwʋ. -N -kä bhɛnɩ, zeli ˈmö cuu, -mä Biblë ˈmö. -N -kä sɩasɩ a wɛlɩɩ bhïla, -n -kä -lu a ˈtɩtɩ -sɛɛ yi, -n -kä nɩkpɛ a wɛlɩɩ ˈwʋ pälɩ, -n -käˈɛ -lii -mimii a wɛlɩɩ bhïla yi, vɩɛ sasɛ yɩ wɛlɩ ˈmö ˈwë, -n ˈkia dlɩ ˈwʋ -kä nɩɩ, yɩ kä gbëaa ˈmö.
Mää -n -sɛɛ -naˈa wɛlɩɩ ˈn -n bhïlaa, nʋnii sasɛ libho ˈmö. -N -kä Biblë a gbɛlʋ ˈmö -sɛsɛnɩɛ yi, ˈsaa Zoova yɩbhää ɔ -kaɲɩ ˈcɩa, -naˈbhë -n kä -n ˈkɩ ˈmö ˈnʋ ˈwë, nzɩ -n ˈkä bhïla. ˈN yɩ -ɲɛ Biblë ˈmö a kïbhï -miˈla ˈwuë nɩ mönɩ yɔwʋ, ˈn sɛɛ “sasɛ libhonʋɲɔ” gbää -mä -aˈa ˈbɔgwɩɩ ˈmö, yɩ nɩ mönɩ yɔwʋ. (Mat. 24:45) Käböbɔgwɩ -yɩ ˈnɩɛ Biblë ˈwʋ -glɛ, ɛ -kä ghladio ˈmö a wɛlɩɩ, ɛ -käˈɛ tleviziɔ ˈmö a -nɩɩ, sɛ yɩ gbää ˈtɩɩ, gbä -sɩbhä.

-N -kä -lu a wɛlɩɩ bhïla dɔˈwʋ -wʋ, -n -käˈɛ -lii -mimii zɛlɩ, ti -gömö ˈpä. ˈNɛmanɩ -naɲɩ ˈwʋ. Wa -kä nɩɩ “nɩkpa -mumuë,” -n -kä bhïla, tɩ nɩɩ “nɩkpa ˈwuë.” Wa -käˈɛ nɩɩ “ˈtɛɲɩ -mɛmɛ ˈmö,” tɩ nɩɩ “zila ˈwuë ˈmö.” Wa -käˈɛ nɩɩ “yɩˈɩɛ ˈyli ˈwlʋnɩ,” tɩ nɩɩ “yɩˈɩɛ -kamä ˈyli ˈwlʋnɩ.”
Kwänuë, wa ˈki ˈylɩmö nɩɩ, ˈsaa -n bhïlaa kä gbëaa ˈmö. -N -kä Biblë a gbɛlʋ ˈmö zɛlɩ ˈwë, -n -käˈɛ -lu a wɛlɩɩ bhïla ˈwë, ˈyɩbhänuë ˈkïbhï ˈwʋ ˈnɛgösɛ, pälɩˈɛ wɛlɩɩ ˈwʋ yɩ ˈkʋa kwänɩ. -Lɛ a dɔˈwʋ, ˈsaa -n -sɛnɩɛ ˈmö, waˈbhï wa ˈki ˈmö ˈnʋ.