Mbamba foé Marc a nga tili
2 Ve mvuse bone melu, a nga beta bulane Capernaüm, ane foé é nga mialane na a ntoo nda. 2 Nde abui bôt é nga tôkane valé, aval abui é mbe na, teke fe vôme ya telé abo, to’o mbé si. Ane a nga taté na a kate be mejô me Zambe. 3 A bôte be nga zuu nye ñyemelane môt, bôte benyine be mbe be be’e nye. 4 Ve be nji be ngule ya kee nye be Yésus, amu nsamba bôt ô mbe abui. Ane be nga vaa andile vôme Yésus a mbe, éyoñe be maneya vaa de, ane be nga suu énoñe nkôkon ô mbe ô bôô si. 5 Éyoñe Yésus a nga yen abime mbunane be mbe be bili, nde a nga jô môt a mbe ñyemelane na: “A mon, me maneya jamé wo minseme miôé.” 6 Ve bescribe béziñe be mbe valé be too si, be sili’i minleme miap été na: 7 “Amu jé môte nyu a kobô ana? A kobô Zambe ébiasé, za a ne jamé minseme mi môt, ane ô vaa Zambe?” 8 Ve été été, Yésus a nga yeme mame môt ase a mbe a simesa’ane nleme wé été, éyoñe bescribe be mbe be la’an. Nde a nga jô be na: “Amu jé mia simesane mame ma minleme mienan été? 9 Jé ja dañe tyi’ibi ya jô ñyemelane môt, ye na, ‘Me maneya jamé wo minseme miôé,’ nge ke na, ‘Tebe’e tetele, nyoñe’e énoñe jôé a wulu?’ 10 Ve mfa’a ya na mi yeme na Mona môt a bili ngule ya jamé minsem e si va,” a nga jô môt a mbe ñyemelane na: 11 “Ma jô wo na, tebe’e tetele, nyoñe’e énoñe nkôkone jôé a bulane nda jôé.” 12 Ane a nga tebe tetele a été été, a nga to’é énoñe nkôkone jé a wulu bôte bese be lô nye. Nde bese be mbe fe’e ne vema a be nga ve Zambe duma be jô’ô na: “Bi ngenane teke tame yen avale jame di.”
13 A nga beta ke abôñe mañ a nsamba bôt ô nga zu wo tôñe nye, ane a nga taté na a ye’ele be. 14 Nté a mbe a lôte’e valé, a nga yene Lévi mon Alphée a too wofise ba nyoñe toya, ane a nga jô nye na: “Za’a bo ñyé’é wom.” Été été, a nga tebe tetele a tôñe nye. 15 Mvuse ya valé, Yésus a mbe a ja’a* nda jé été, nde abui benyoñe toya a bebo minsem é nga zu tabe si a di a Yésus a beyé’é bé, amu abui ya be be é mbe é tôñe’e nye. 16 Ve bescribe be mbe bepharisien, éyoñe be nga yene na a di a bebo minsem a benyoñe toya, be nga taté na ba sili beyé’é bé na: “Ye ñye’ele wônan a di a benyoñe toya a bebo minsem?” 17 Éyoñ a nga wô’ô nalé, Yésus a nga jô be na: “Dokita a nji bo mfi asu bôte be ne mvo’é minsôn, ve asu minkôkon. Me nga so na me zu loone bebo minseme sa ke bôte be ne zôsô.”
18 Beyé’é be Jean a bepharisien be mbe be tyii bidi amu Zambe. Nde be nga so a sili nye na: “Amu jé beyé’é be Jean a beyé’é bepharisien ba tyi bidi amu Zambe, ve beyé’é bôé teke tyi bidi amu Zambe?” 19 Nde Yésus a nga jô be na: “Bemvôé be fame ja lu’u minga, be nji bi amu ya tyi bidi nté ôse a ngenan a be, sa nalé? Nté ôse môt a lu’u minga a ngenan a be be vo’o tyi bidi. 20 Ve môse wo zu, éyoñe fame ja lu’u minga ja ye li’i be, éyoñe te nje ba ye tyi bidi môs ôte. 21 Môt éziñ a vo’o nyoñ éfus éyé é ngenane mvo’é na a beté abaka éyé é ntoo ntuk, nge a bo nalé, éyé é ngenane mvo’é ja ye limiti ji é ntoo ntuk, a bo na abé é dañe nen. 22 Nde fe na, môt éziñ a vo’o futi mfefé woone mende’e me ékôp me ntoo minnôm, nge a bo nalé, woon a ye tube mende’e me ékôp, a ba ye jañele woon a mende’e me ékôp mese, ve ba futi mfefé woone mimfefé mende’e me ékôp.”
23 A nga bo na, nté a mbe a lôte’e mefube mefese môse Sabbat, beyé’é bé be nga taté na ba kolé mefese nté be mbe be kele’e. 24 Nde bepharisien be nga jô nye na: “Tame yen! Amu jé beyé’é bôé ba bo jam atiñ é nji kañese na é bobane môse Sabbat?” 25 Ve a nga yalane be na: “Ye mia be tame lañe jame David a nga bo éyoñ a nga ke a jeñe bidi, amu ba be bôte bé be mbe be wô’ô zaé? 26 Avale nkañete Abiathar, beta prêtre wo jô, ye a nji nyiine nda Zambe a di belet é mbe asu metuna’a,* belet atiñ é nji kañese na môt éziñ a di je nge ô vaa ve beprêtre, a ve je bôte ba be nye be mbe nsamba?” 27 Nde a nga jô be na: “Sabbat a nga téban asu môta binam, môta binam a nji téban asu Sabbat. 28 Nde, Mona môt a ne Tate to’o môse Sabbat.”