Mbamba foé Luc a nga tili
8 Mon éyoñe mvuse ya valé, a nga ke bitisone bitison a minlame minlam a kañete’e, a kate fe mbamba foé ya Éjôé Zambe. A minlôman Awôm a mibaé mi mbe a nye, 2 a binga béziñe be nga mane saébane mbia minsisim, a akon: Marie nye fe be mbe be lo’one na Madeleine, mbia minsisime zangbwale mi nga kôlô be nye; 3 Jeanne minga Chouza, môt a mbe a ba’ale’e biôme ya nda Hérode; Suzanne a abui binga afe, mbe bete be mbe be bela’ane akume dap na be saane be.
4 Éyoñe beta nsamba bôt a nga sulane fufulu a bôte be mbe be so’o bitisone bitison, ane a nga kobô be a bela’ane bive’an a jô’ô na: 5 “Mbé mefup a nga ke miase mvoñe jé. Nté a mbe a kele’e a miase mvoñ, nde mefese méziñe me nga ku mfôme njoñ, ane anone ya yôp é nga mane di me. 6 Mefese mevo’o me nga ku beta mbas akok, éyoñe me faaya, ane me nga mane viele amu si é mbe nkôt. 7 Mefese mevo’o me nga ku biyo été, ane biyo a metô’ô bi nga yaé nsamba, biyo bi mane yametane mefes. 8 Mefese mevo’o me nga ku mbamba si, a éyoñe me nga yaé, fes ése é nga kuli bibuma a lôte 100.” Éyoñ a nga mane jô mame mete a nga bete tyiñe yôp a jô na: “Nyu a be’e melo ya wôk, a wô’ôk.”
9 Ve beyé’é bé be nga sili nye atinane ya éve’an éte. 10 A nga yalane na: “Mia mi bili mvome ya wôk atinane ya mame me Zambe me solô mfa’a ya Éjôé Zambe, ve asu bôte bevok, mame mete me ne fo’o ve bive’an, nde to’o ba fombô, ba fombô teke yene jôm, a to’o ba wôk, ba wô’ô ve teke yem atinan. 11 Atinane ya éve’ane nde di: Fes é ne mejô me Zambe. 12 Mefese me nga ku mfôme njoñ, me ne bôte be nga wô’ô mejô me Zambe, ve Diable a so, a mane vaa mejô me Zambe minleme miap été na be bo te buni, a na be bo te nyiñ. 13 Mefese me nga ku beta ako’o yôp, me ne bôte ba wô’ô mejô me Zambe a nyoñe me a mevak, ve mbôle be nji bi minkañ, ba buni mone nté, ve éyoñe meve’ele me kuiya, be mane kôlô. 14 Mefese me nga ku biyo été, me ne bôte be nga wô’ô mejô me Zambe, ve mame ya si nyu ma tyelé bôte minleme yôp, akum a mimvômane ya ényiñe bi nga mane yametane mefes, a ma bo teke wume bibuma. 15 Mefese me nga ku mbamba si me ne bôte be ne na, éyoñe be wô’ôya mejô me Zambe a mbamba nlem, ba ba’ale me a wum abui bibuma a mbane ya jibi.
16 “Teke môt a ne bo na, éyoñ a bo’éya lambe a buti nye jôme yôp, nge telé nye énoñe si, ve ba telé nye ételé belambe mfa’a ya na bôte ba nyiine be yen éfufup. 17 Amu teke jam éziñ é ne nsolane da ye bo teke yené, teke jam éziñe ba te kôme solé da ye bo teke yené éngeñgeñ. 18 Taba’ané ñhe ntyel a avale mia vô’ôlô, amu nyu a bili jôm, ba ye beta kô’ôlane nye je, ve nyu a nji bi jôm, ba ye vaa nye to’o jôm a buni na a bili.”
19 Nyia wé a bobenyañe bé be nga zu nye yen, ve be nji be kui vôm a mbe amu beta nsamba bôt. 20 Nde be nga ke kate nye na: “Nyua a bobenyoñe be tele nseñ, ba kômbô yene wo.” 21 A nga yalane be na: “Nyia wom a bobenyañe bame be ne bôte ba wô’ô mejô me Zambe a bo avale ma jô.”
22 Môs éziñe Yésus a beyé’é bé be nga bet éfunga, ane a nga jô be na: “Za’ané bi dañ abôñe mañe ya yat.” Ane be nga ke. 23 Ve nté be mbe be bete éfunga, ane a nga ke ôyo. A beta ôkôs a nga vuñe lac été, a éfunga é nga jaé a mendim a taté na ja nyoñe mendime si. 24 Ane be nga vele nye ôyo be jô’ô na: “A Ñye’ele, a Ñye’ele, bi ntoo bebé ya wu!” Ane a nga tebe tetele a bame ôkôs a mintyôa. Ane ôkôs a mintyôa mi nga tebe, a évôvoé é nga bo. 25 Nde a nga jô be na: “Mbunane wônan ô ne vé?” Ve be mbe be ko mbia woñ, a be mbe fe’e ne vema, môt ase a jô’ô nyu mbo’o na: “Nyina a ne za? Amu a bame to’o akôs a mendim, a bia bo nye mewôk.”
26 Ane be nga kui ngoto bôte ya Gérasa, nje éte é ne e kindi’i fok ya mañe ya Galilée. 27 Nné ane Yésus a nga sis éfunga, ane môte ya tison éte a nga zu tôbane nye, mbia minsisime mi mbe be nye. A nga bo ayap éyoñ teke jaé éyé éziñ, a nji be a nyiñi’i nda été, ve a mbe a nyiñi’i mesoñ été. 28 Éyoñ a nga yene Yésus, a nga yôn a ku si ôsu wé, a jô tyiñe yôbe na: “Me bili ajô avé a wo, a Yésus Mona Zambe a dañe mbetane yôp? Ma ye’elane wo, te tibili ma.” 29 (Amu Yésus a nga ve mbia nsisim abendé na a kôlô be môt ate. Biyoñe biyoñe mbia nsisim a mbe a biik nye, be nga ju’u tiñeti nye a bengôkop a mengata’a, be ba’ale’e nye, ve a mbe a téé mengata’a mete, a mbia nsisim a mbe a bo’o na a ke bevôme bôte be nji bo.) 30 Yésus a nga sili nye na: “Ô ne jôé na za?” A nga yalane na: “Bizuk,” amu abui mbia minsisim é nga nyiine be nye. 31 A mi nga ke ôsu a ye’elane nye na a bo te ve be abendé na mi ke édok ébé été.* 32 Beta mbame bengôé a mbe a kele’e a di nkôl, nde mbia minsisime mi nga ye’elane nye na a lôme mie mi ke nyiine bengôé été, ane a nga kañese. 33 Nde mbia minsisime mi nga kôlô be môt ate a ke nyiine be bengôé, ane bengôé be nga valé mbil, a koo nkôme tyia yôp a ke ku mañ été. 34 Ve éyoñe beba’ale bengôé be nga yene jam é nga kui, ane be nga tup a ke kañete de bôte ya tison a minlame mia bômane tison éte.
35 Ane bôte be nga kôlô na ba ke yene jame da te boban, be nga zu koone Yésus a môte mbia minsisime mi mbe mi jô’é nye a be’e biyé a fe’e jé ése, a too si mebo me Yésus, ane be nga ko mbia woñ. 36 Bôte be nga yene jam ése é nga boban, be nga kañete avale môte mbia minsisime mi mbe a jô’é nye a nga bo mvo’é. 37 Nde beta nsamba bôte ya ngoto ya Gérasa a nga jô Yésus na a kôlô be ngoto, amu be nga ko mbia woñ. Ane a nga dañ éfunga a ke. 38 Ve môte mbia minsisime mi nga kôlô be nye a nga ke ôsu a ye’elane nye na a kômbô ke a nye, ve a nga ben, a nga jô nye na: 39 “Bula’ane nda jôé, ô ke kañete jame Zambe a te bo asu dôé.” Ane a nga ke a kañete tison ése jame Yésus a nga bo asu dé.
40 Éyoñe Yésus a nga bulan, beta nsamba bôt a nga nyoñe nye a mbamba nlem, amu bese be mbe be yange’e nye. 41 Ve kaso wua ya synagogue a too jôé na Jaïrus a nga suan. Ane a nga ku Yésus mebo a ye’elane nye na a ke nda jé. 42 Amu susu’a* mona minga a mbe a bili a too bebé mimbu 12 a mbe a du’uk.
Nté Yésus a mbe a kelek, nsamba bôt ô mbe ô tôñe’e nye a yemete nye. 43 Minga éziñ a mbe valé, e zu koone metyi me kuiya nye nyule mimbu 12, a teke môt a nga bo ngule ya saé nye. 44 A nga zu nye mvus a nambe nye meze’ele ya éyé ya yôp, ane metyi me nga ji’a tebe.* 45 Yésus a nga sili na: “Za a te nambe ma?” Éyoñe bese be nga sôô ajô éte, Pierre a nga jô na: “A Ñye’ele, minsamba mi bôte mia bômane wo a mia yemete wo.” 46 Ve Yésus a nga jô na: “Môt a te nambe ma, amu ma te wô’ôtane ngul é kôlô’ô be ma.” 47 Éyoñ a nga yene na jam a te bo é nji sobô, nde minga a nga so a nyeñeba’an, ane a nga ku Yésus mebo a kate bôte bese amu jé a nga nambe nye, a aval a te bo mvo’é été été. 48 Ve Yésus a nga jô minga na: “A ngo jam, mbunane wôé ô saéya wo. Kele’e mvo’é.”
49 A ngenan a kobô’ô, môte kaso ya synagogue a nga lôm a nga suan a jô na: “Ngo jôé é wuya; te beta ndeñele Ñye’ele.” 50 Éyoñ a nga wô’ô mejô mete, Yésus a nga jô Jaïrus na: “Te ko woñ, biik ve mbunan, a a ye nyiñ.” 51 Éyoñ a nga kui nda, a nji kañese na ba môte mfe be nyiine nda été, nge ô vaa ve Pierre, Jean, Jacques, a ésa ba nyia mon. 52 Ve bôte bese be mbe be yônôk, be kutu’u tôé amu mintaé be mbe be wô’ô nye. Ane a nga jô be na: “Te mia beta yôn amu a nji wu, ve a ne ôyo.” 53 Ane be nga fukane vioé a kpwe’ele nye, amu be mbe be yeme’e na a wuya. 54 Ve Yésus a nga bi nye wo a jô nye na: “A mona minga, kôlô’ô si!” 55 Ane a nga wômô* a tebe tetele été été, ane a nga jô be na be ve nye jôme ya di. 56 Meva’a me nga jaé bebiaé bé nleme ne lut, ve a nga ve be abendé na be bo te kañete môt éziñe jame da te boban.