Mbamba foé Jean a nga tili

4 Éyoñe Tate a nga yeme na, bepharisien be nga wô’ô na Yésus a bo bôte beyé’é a du be a dañe Jean, 2 akusa bo Yésus émien a nji be a du bôt, ve beyé’é bé mbe be mbe be bo’o de, 3 a nga kôlô Judée a beta ke e Galilée. 4 Ve mfa’a wé, é mbe é yiane na a ke e Samarie. 5 Nde a nga suane tisone ya Samarie ba loone na Sychar, e fefel abôta si Jacob a nga ve mone wé Joseph. 6 Anjeñe Jacob é mbe valé. A nga bo na, Yésus a te’eya a ayabe dulu, a mbe a too anjeñ, a mbe bebé zañe môs.*

7 Ane minga ya Samarie a nga so na a zu labe mendim. Nde Yésus a nga jô nye na: “Va’a ma mendime ya nyu.” 8 (Amu beyé’é bé be nga ke tisone na, ba ke kuse jôme ya di.) 9 Nde minga ya Samarie a nga sili nye na: “Aval avé wo, ô kusa bo mone juif, wo sili ma mendime ya nyu, a too ke na, me ne minga ya Samarie?” (Amu bejuif a bôte ya Samarie be nji wô’an.) 10 Ane Yésus a nga yalane nye na: “Nge wo too ô yeme’e mvean ô ne zezé Zambe a ve, a môt a jô wo na, ‘Va’a ma mendime ya nyu,’ ve ô yia sili nye mendime ya nyu, a a yia ve wo mendime ya ényiñ.” 11 A nga jô nye na: “A Monti, ô nji bi jôme ya labe je mendim a anjeñ é ne édok, nne wo ye ke nyoñe mendime ya ényiñe vé? 12 Ye wo dañe mvamba jangane Jacob, nnye a nga ve bia anjeñe di, nnye a mbe a nya’a mendime ya anjeñe di a bone bé, a benya’a bé?” 13 Ane Yésus a nga yalane nye na: “Môt ase a nyu mendime ma, a ye beta wôk évé. 14 Môt ase a nyu mendime ma ye ve nye, a ye ke beta wôk évé môs éziñ, ve mendime ma ye ve nye, ma ye bo be nye ane anjeñe mendime da ve ényiñe ya nnôm éto.” 15 Minga a nga jô nye na: “A Monti, va’a ma mendime mete, ndembene ma ye ke beta wô’ô évé, nge bo me za’a va kom ése na ma zu labe mendim.”

16 A nga jô nye na: “Kele’e loone nyo nnôm, mia nye mi zu va.” 17 Minga a nga yalane na: “Me nji bi nnôm.” Yésus a nga jô nye na: “Wo bele amu wo jô na, ‘Me nji bi nnôm.’ 18 Amu ô nga bi beyôme betan, a môte mia nye mi too éyoñe ji, a nji bo nyo nnôm. Wo bele mfa’a ôte.” 19 Minga a nga jô nye na: “A Monti, ma yene na ô ne nkulu mejô. 20 Bemvamba bangane be nga kañe Zambe nkôle wu, ve mi mia jô na Jérusalem nnye a ne vôme bôte ba yiane kañe Zambe.” 21 Yésus a nga jô nye na: “A minga, buni’i ma, awolo da zu éyoñe bôte ba ye bo te kañ Ésa nge nkôle wu nge Jérusalem. 22 Mia kañe jôme mi nji yem; bi bia kañe jôme bia yem, amu nkôtane wo taté be bejuif. 23 Ve awolo é nga zu, a é ntoo, éyoñe benya bekañe Zambe ba ye kañ Ésa a nsisim a benya mejôô, amu teke vaa nge beté, Ésa a jeñe bôte ba kañe nye aval éte. 24 Zambe a ne Nsisim a bôte ba kañe nye ba yiane kañe nye a nsisim a benya mejôô.” 25 Minga a nga jô nye na: “Ma yeme na Messie a zu, nnye ba loone na Krist. Éyoñ ése môt ate a ye so, a ye kate bia mame mese ne ngeññ.” 26 Yésus a nga jô nye na: “Ma ma kobô wo nyi, me ne nye.”

27 Éyoñ éte ébien, beyé’é bé be nga suan, be mbe fe’e ne vema amu a mbe a la’an a minga. É ne été na, môt éziñ a nji jô nye na: “Jé wo jeñ?” nge ke na, “Amu jé wo laan a nye?” 28 Nde minga a nga li’i nde’e* mendime jé, a ke tison, a kate bôte na: 29 “Za’a yenané môt a te kate ma mame mese me nga bo. Ye a nji bo Krist nga?” 30 Be nga kôlô tison a taté na ba ke be nye.

31 Nté ôte ôse, beyé’é be mbe be yemete’e nye na: “A Rabbi ja’ak.” 32 Ve a nga jô be na: “Me bili bidi ya di mi ne te yem.” 33 Nde môt ase ya beyé’é bé a nga jô nyu mbo’o na: “Môt a nji soo nye jôme ya di, sa nalé?” 34 Yésus a nga jô be na: “Bidi biame bi ne na, me bo nkômbane nyu a nga lôme ma a mane ésaé jé. 35 Nga mi wô’ô jô na a li’iya ve ngon ényine na be koé bidi? Tama yenan! Ma jô mia na: Beta’ané mis a fombô mefup a yene na, me ntoo bitôtôlô asu nkoéan bidi. Ajô te 36 môt a koé bidi a nyoñe ma’an a a kôane bibuma asu ényiñe ya nnôm éto, ndembene môt a bé a môt a koé be ne va’a nsamba. 37 Amu nalé, mejô ma me ne été: Wua a ne nyu a bé, nyu mbok a ne nyu a koé. 38 Me nga lôme mia na, mi ke koé jôme mi nji bé, bôte bevo’o be nga bé a mi nga yene mfi ya ésaé jap.”

39 Abui besamaritain ya tison éte, é nga buni nye amu mejô minga a nga jô na: “A te kate ma mame mese me nga bo.” 40 Nde éyoñe bôte ya Samarie be nga zu be nye, be nga jô nye na a tabe a be, ane a nga tabe valé melu mebaé. 41 Asu’ulane ya valé, abui bôt é nga buni amu mam a nga jô, 42 a be nga jô minga na: “Bi nji beta buni fo’o ve amu mame wo te jô, amu biabebiene bia te wô’ô nye, a bia yeme na môte nyi a ne fo’o nyii bôte bese ya si.”

43 Mvuse melu mebaé a nga kôlô valé a ke e Galilée. 44 Ve Yésus émien a nga jô na, bôte be ne teke semé nkulu mejô jale dé. 45 Nde éyoñ a nga kui Galilée, bôte ya wôé be nga nyoñe nye abeñ, amu be nga yene mame mese a nga bo abô’ô ya Jérusalem amu be fe be nga ke abôk éte.

46 Ane a nga beta ke Cana ya Galilée, vôm a nga bo na mendime me veñesane woon. A nga bo na, évete njô bôt é mbe valé, mone wé a mbe a konôk e Capernaüm. 47 Éyoñe môt ate a nga wô’ô na, Yésus a soya Judée na a ntoo Galilée, a nga ke be nye a jô nye na a siliki a ke saé mone wé, amu a mbe a ntoo bebé ya wu. 48 Ve Yésus a nga jô nye na: “Nge mi nji yene mesimba a bitua bi mam, mi nji ke ye buni môs éziñ.” 49 Évete njô bôt é nga jô nye na: “A Tate jika’a zu, ôsusu’a na mone mone wom a wu.” 50 Yésus a nga jô nye na: “Bula’ane nda nyo mon a vee.” Ane môt a nga buni mame Yésus a nga jô nye a bulan. 51 Ve a ngenane zene na a bulan, alo dé é nga tôbane nye a jô nye na, mona fame wé a vee.* 52 Nde a nga sili be awolo a nga bo mvo’é. Be nga yalane nye na: “Tit* é nga mane nye nyul angô’é bebé awolo da ya mame ngô’é.”* 53 Ane ésa a nga yeme na, awolo éte ébiene nde Yésus a nga jô nye na: “Nyo mon a vee.” Nde ba nda bôte jé ése be nga buni. 54 Nyuna a ne asimba baa Yésus a nga bo éyoñ a nga kôlô Judée na, a ke Galilée.