Kalate Paul a nga tili Beromain

13 Ngule ya bijôé ja so be Zambe, a jôme te nje bôte* bese ba yiane bie bo mewôk. Bijôé bise bi ne, bi tele bité biap a ngule Zambe. 2 Nde ñhe, nyu ase a bo te bo éjôé mewôk, a tebe nta’ane mame Zambe ngame yat; ba bese ba tebe éjôé ngame yate ba ye dutu ayaa be bebien. 3 Amu bôte ba jôé bete, be ne bôte bia yiane ko woñ, sa ke amu mbamba be mam; ve amu mbia be mam. Ye ô nji kômbô ko éjôé woñ? Kele’e ôsu a bo mame me ne mvaé, wo ye bi mese’esa ma so be éjôé. 4 Amu éjôé é ne asu dôé mbo ésaé Zambe asu mvo’é jôé. Ve nge wo bo mbia jam, ko woñ amu é nji be’e nkpwaté mekône zezé, é ne mbo ésaé Zambe, nyu a kun, mfa’a ya liti ayaa* be nyu a bo mbia be mam.

5 Nde é ne mfi na mi bo éjôé mewôk, sa ke ve amu ayaa, ve amu mone môte ya nleme wônan. 6 A ne fe amu nalé nye mia ya’ane betoya; amu betebe ôsu ya éjôé be ne bebo bisaé asu bôt. Zambe a nga telé be ôsu éyoñ ése, asu jam éte. 7 Bula’ané bôte bese jôme mi bili be, nyu a sili toya, mi ya’ane nye avale toya ése; nyu a yi na mi ko nye woñ, mi ko nye woñ, nyu a yi na mi ve nye duma, mi ve nye duma.

8 Te biané môte mvôla éziñ, nge ô vaa ve na môt ase a nye’e nyu mbok, amu nyu a nye’e môte mbok a tôé Metiñe me Moïse. 9 Amu nkobe metiñe wu, “Ô nji yiane bo mejian, ô nji yiane wôé, ô nji yiane wup, ô nji yiane nyamete,” a metiñe mevo’o mese, ô ne tabe ñwôlekan a mejô ma: “Wo yiane nye’e môte mbok ane wo nye’e womien.” 10 Nye’an ô ne te bo môte mbo’o mbia be mam; nye’ane wo tôé mame Metiñe me Moïse ma jô.

11 A bo’ané jame di amu mia yeme biyoñ, na awolo ya vee ôyo é kpwaaneya, amu nyiiane wongan ô ntoo bebé a lôt éyoñe bi nga bo bebuni. 12 Alu é ntoo abui, a môs ô ntoo bebé; njô’ané mimboone mi mame ya dibi, a jaé bikpwelé ya éfufup. 13 Nyiñané ényiñ é ne mvaé ane bizôñ amôs, teke bo mbia mebôk,* teke nso’ane meyok, teke mbia nkeane binoñ a teke mvite mame teke wô’ô nyé nge ôson,* teke môman, teke éviele. 14 Ve mi jaé Tate Yésus Krist, a te bôndané fe’e ya jalé minkômbane ya minsôn.