Kalate baa Paul a nga tili Becorinthien

13 Éyoñe lale ji ma so be mia. “Anyu* bengaa bebaé nge belale nde da yiane yemete ajô.” 2 Akusa bo me nji bo a mia éyoñe ji, a ne ve ane nge me ne a mia éyoñe baa; ma taté ve bôte be nga bo nsem éyoñe ya mvus a ba bese bevok abendé na nge ma beta so wôé, ma ye ke kamane bôte bese ba yiane nyoñe melep, 3 amu mia jeñe ndeme na Krist, nnye ate a nji bo nte’ane zañe jenan, ve ngule zañe jenan, nnye a tu’a fo’o kobô a zene jam. 4 Amu, é ne été na a nga tyebe élé amu nte’an, ve a vee amu ngule Zambe. E nya ajôô, bia fe bi ne nte’an a nye, ve bia ye nyiñe nsamba a nye amu ngule Zambe é ne be mia.

5 Kelané ôsu a yemelane nge mi ne mbunan été; kelané ôsu a yemelan avale bôte mi ne. Nge na, ye mi nji beta yemelane na Yésus Krist a ne jôme jia a mia? Nga ve a nji beta yene mia mvaé. 6 Me too fo’o ndi na, mia ye kôme yemelane na a yene bia mvaé.

7 Éyoñe ji bia ye’elane Zambe na mi bo te bo jôm é ne abé, sa ke amu bia yi na bi yené mvaé, ve na mi bo jam é ne mvaé ja’a bia bo teke yené mvaé. 8 Amu bi vo’o bo jôm éziñe ja wosane benya mejôô, ve ji ja su’u benya mejôô. 9 Bi ne fo’o mevak éyoñ ése bi ne nte’an, ve mi mi tele ne bip. Amu jame te nde bia ye’elane mfa’a ya nsôane wônan. 10 Jôme te nje ma tili mame ma nté me ngenane teke so, ndemben éyoñe ma ye so, me bo teke belane ngule Tate a nga ve ma a njet, ve na me ve mia ngule nyul, sa ke te’elane mia.

11 A bobejañ, ma ke luu ôbut me jô’ô na, kelané ôsu a bo mevak, kelané ôsu a jô’é na be sôane mia, kelané ôsu a veane ngule nyul, kelané ôsu a bi ôsimesane wua, kelané ôsu a nyiñe mvo’é a bôte bevok; a Zambe ya nye’an a mvo’é a ye tabe a mia. 12 Môt ase a wuba’ane nyu mbok* a ôsesa. 13 Mimfufube mise mia batane mia.

14 Beta mvame Tate Yésus Krist a nye’ane Zambe a bibotane bia nyoñ a zene ya mfufube nsisime bi tabe’e be mia bese.