Kalate ôsu Paul a nga tili Becorinthien

14 Tôñesa’ané nye’an, ve va’ané ngule ya jeñe* mimveane ya nsisim, ve da dañe mvo’é nge mi ne kuli mejô. 2 Amu nyu a bili mveane ya kobô minkobô mevale meval, a kobô sa ke a bôte ve a Zambe, amu teke môt a wôk, ve a kobô minsolane mi mame mi ne étyi a zene ya nsisim. 3 Ve nyu a kuli mejô, a ve bôte ngule nyul a wônô be, a volô bôte minlem a zene ya nkañete wé. 4 Nyu a kobô minkobô mevale meval a ve émiene ngule nyul, ve nyu a kuli mejô a ve ékôane bekristene ngule nyul. 5 Éyoñe ji, ma kômbô na mia bese mi kobô minkobô mevale meval, ve ma dañe kômbô na mi kuli mejô. E nya ajôô, nyu a kuli mejô a dañe nyu a kobô minkobô mevale meval, nge ô vaa ve na a kôñelan,* ndemben ékôane bekristen é ne bi ngule nyul. 6 Ve éyoñe ji a bobejañ, nge ma so a kobô mia minkobô mevale meval, mvaé fé ma ye bo mia nge ma bo te kate mia mame me nga wô’ô be Zambe, nge a ñyemane mam, nge a nkulane mejô, nge a ñye’elan?

7 É ne avale da a biôme bi nji bo vevee, mbie bite bia kuli éduñ, a ne bo ndiñ nge ke mvet. Nge ô bo te bôme bie avale da yian, aval avé be ne yeme nge wo bôme mvete nge ke loñe ndiñ? 8 Nge toñ é nji loñ avale be ne yemelane je, za a ye kômesan asu bita? 9 Avale te fe, nge mia kobô minkobô mevale meval a belane bifia bi nji bo tyi’ibi ya wôk, aval avé môt a wôk, a ne yeme jame mia jô? E nya ajôô, mia ye fo’o kobô ñyem. 10 Abui minkobô da kobane si nyu, a bôte ba wô’ô mise. 11 Amu nge me nji wô’ô nkobô éziñ, ma ye bo nneñ asu môt a kobô, a nyi a kobô a ye bo nneñ asu dam. 12 Nde fe, amu mi bili beta nkômbane ya bi mimveane ya nsisim, jeñané na mi bi mie nya abuii mfa’a ya ve ékôane bekristene ngule nyul.

13 Nde, nyu a kobô nkobô éziñ, a ye’elane na a bo ngule ya kôñelan. 14 Amu nge ma ye’elane nkobô éziñ, ma ye’elan amu mveane ya mfufube nsisim, ve atyeñe dam é nji wume bibuma. 15 Jé ñhe me ne bo? Ma ye ye’elan a mveane ya nsisim, ve ma ye fe ye’elane nkobô ma wôk. Ma ye yia bia ya ékaña’a a mveane ya nsisim, ve ma ye fe yia bia ya ékaña’a nkobô ma wôk. 16 Nalé momo, nge ki na nge wo yia bia ya ékaña’a a mveane ya nsisim, aval avé nneñ a ne be mia a ne jô na “Amen” mvean akiba wo ve, amu a nji wô’ô jôme wo jô? 17 Nya ajôô, mia ve akiba avale da yian, ve môte mbok a nji bi ngule nyul. 18 Ma ve Zambe akiba amu ma kobô abui minkobô a dañ abime mia bese mia kobô. 19 Ve ékôane bekristen été, da dañe mvaé na me kobô bifia bitane nkobô ma wôk,* mfa’a ya na me ye’ele bôte befe, a lôte na me kobô bifia 10 000 nkobô ôfe.

20 A bobejañ, te boané ayôme bongô mfa’a ya ñwô’ane mame wônan, ve mi bo ayôme bongô mfa’a ya mame me ne abé; a bo benya bôtô mfa’a ya ñwô’ane wônan. 21 E Metiñe me Moïse été é ne ntilane na: “‘A minkobô beyeñ a biyaé beyeñ, ma ye kobô bôte ba, a to’o nalé, ba ye bene vô’ôlô ma,’ nne Yéhôva* a jô nalé.” 22 Ajô te, minkobô mi nji bo ndem asu bôte ba buni, ve asu bôte be nji buni, a too ke na nkulan ajô ô nji bo ndem asu bôte be nji buni, ve asu ba ba buni. 23 Nde nge ngum ékôane bekristene wo tôkane vôme wua, a na bôte bese ba kobô minkobô mevale meval, ve nge beyeñ nge ki bôte be nji buni ba nyiin, ye ba ye ke jô na mi ntoo mekute nga? 24 Ve nge mia bese mia kuli mejô nsamba, a na môt a nji buni nge ki nneñ a nyiin, ye a ye ke bi melep a tu’a fas émien amu mame mese mia te jô? 25 Nde minsolane mi mame ya nleme wé, mia ye kulan aval é ne na, a ye kute meboñe si a luu asu dé si, a a ye kañe Zambe a jô’ô na: “Zambe a ne fo’o ézezañe jenan.”

26 Nde a bobejañ, jé ja yiane boban? Éyoñe mia tôkan, nyina a yia same wua, nyi mbok a bili ñye’elan, nyi mbok a kate nkulane jame ya Zambe, nyi mbok a kobô minkobô mevale meval a nyi mbok a kôñelan. Mame mese me boba’ane mfa’a ya ve bôte ngule nyul. 27 Nge môt éziñ a kobô abui minkobô, nge a dañedañe kobô, a kobô’ô mibaé nge milal, a a kobô’ô nkobô ôse éyoñe jé, a môt a yiane kôñelan.* 28 Ve nge môt a kôñelan* a nji bo, a yiane dip anyu ékôane bekristen été, a kobô’ô émien a kobô’ô fe Zambe. 29 Bekulu mejô bebaé nge belale be kobô’ô, a ba bevo’o be jeñe’e atinan. 30 Nge môt éziñ a too valé a bi nkulan ajô wo so be Zambe, nté a ngenan a too si valé, e môt a too a kobô’ô a tabe’e évôl. 31 Amu mia bese mi ne bo minkulane mejô môt ase éyoñe jé, ndembene mia bese mi ne yé’é a bi ngule nyul. 32 Bekulu mejô ba yiane yem avale ba belane mimveane ya nsisime ya kuli mejô be bili. 33 Amu Zambe a nji bo Zambe ya jo’ojo’o ve nyi ya mvo’é.

Aval é ne bikôane bekristene bise ya mimfufup, 34 binga be tabe’e bivôl bikôane bekristen été amu é nji bo mvo’é asu dap na be nyoñe nkobô, ve ba yiane sili bebiene si éjôé, avale Metiñe me Moïse fe ma jô. 35 Nge ba kômbô yé’é jôm éziñ, be sili’i beyôme bap nda, amu é ne ôson asu minga na a kobô ékôane bekristen été.

36 Ye mejô me Zambe me nga so be mia, nge na, ye mi ne susu’a bôt é nga bi me?

37 Nge môt éziñ a simesane na a ne nkulu mejô, nge na a simesane na a bili mveane ya nsisim, a yiane yeme na mame ma tili mia, me ne atiñe Tate. 38 Ve nge môt éziñ a dimine jame di, Zambe fe a ye dimine nye.* 39 Nde a bobejañ, kelané ôsu a jeñ a ngul ése na mi bi mveane ya kuli mejô, ve jame da, te mia tyilané bôte na be kobô minkobô mevale meval. 40 Ve bo’ané na mame mese me bobane mvo’é été a mbamba nta’ane mam été.*