Kalate baa Paul a nga tili Becorinthien
6 Amu bia saé fufulu a nye, bia fe bia lebe mia na mi kañese beta mvame Zambe a bo te sube nsôñane ya été. 2 Amu a jô na: “Me nga vô’ôlô wo mbamba éyoñ, a me nga volô wo môse ya nyiian.” Tame yen! Éyoñe ji é ne mbamba éyoñ. Éyoñe ji é ne môse ya nyiian.
3 Bi nji ve môt éziñ amu ya kolé ôbak a zen éziñ, ndemben ésaé nkañete jangan é ne bo te yené abé; 4 ve mfa’a ya mezene mese, bia nyiñ ane bebo bisaé be Zambe, bia bo mbane ya jibi minju’u mevale meval, bia tôbane bitibila’a a mbia biyoñ, a minjuk, 5 bia wu ébôm, bia fetebane mimbôk, ba tibili bia, bia saé ngul abui, melu méziñe teke ke ôyo, a bia wu zaé; 6 bia nyiñe mbamba ényiñ, binyiñe biangane bia wô’an a ñyeman, bi ne ôjibi, bi ne mbamba nlem, bia jô’é mfufube nsisime na a wulu binyiñe biangan, nye’ane wongan ô ne teke medu’an, 7 bia kobô benya mejôô, bi too ngule Zambe ndi; bi bili bikpwelé ya zôsô e wo ya mbo nnôm* a wo ya mbo ngal,* 8 bi bili duma a bia woban ôson, ba ve bia mekua a se’e bia. Ba yene bia ane bôte medu’an, ve bia kobô benya mejôô, 9 aval ane bôte be nji yeme Zambe, ve Zambe a yeme bia, aval ane bôte be ne bebé awu,* ve bi ne vevee, ane bôte ba tôbane fonos,* ve be nji wôé bia, 10 bôte ba simesane na bi ne éyôé, ve bi ne kom ése mevak, na bi ne azoé, ve bia ve abui bôte mbamba be biôm, na bi nji bi jôm, ve bi bili biôme bise.
11 Bi nga yoé menyu mangan asu na bi kobô* mia, a bôte ya Corinthe, a bi nga yoé minleme miangane ne ngeññ. 12 Bi nji futi minné* mfa’a ya mintaé bia wô’ô mia, ve mi mia futi minné mfa’a ya nye’ane wônane mia nye’e bia. 13 Nde ma kobô mia ane bone bam, mia fe bo’ané ane bia, yoéané minleme mienan ne ngeññ.*
14 Te mia bo élat* é ne te yian a bôte be nji buni. Amu, amvôé avé é ne zañe zôsô a ntyamane metiñ? Nge na, za ajôô éfufup é bili a dibi? 15 Ngbwa fé é ne bo zañe Krist a Bélial?* Nge na, môt a buni* a bili élat évé* a môt a nji buni? 16 A njika’ane mame mbé a ne zañe temple Zambe a bengulemelan? Amu bi ne temple vevee Zambe, avale Zambe a nga jô na: “Ma ye tabe zañe jap a wulu zañe jap, a ma ye bo Zambe wop, a ba ye bo bôte bam.” 17 “‘Ajô te, kôla’ané zañe jap a kandan a be,’ nne Yéhôva* a jô nalé, ‘a te beta nambané jôm é ne mvit’”; “‘a ma ye nyoñe mia.’” 18 “‘A ma ye bo mia Ésa, a mia ye bo bobefame bam a bengone bam,’ nne Yéhôva,* Nyu a bili ngul ése a jô nalé.”