Mbamba foé Jean a nga tili
12 Melu mesaman ôsusua Paska, Yésus a nga suane Béthanie, vôme Lazare a mbe a nyiñi’i, nnye Yésus a nga wômôlô miñwuan. 2 Nde be nga yame nye bidi ya mame ngô’é valé, Marthe a mbe a bela’ane be, a Lazare a mbe môte wua ya bôte be mbe be ja’ak a nye. 3 Nde Marie a nga yoé nde’e* mbon ô ne mbamba menyum, nya mbonô, mbon ô ne beta tañ, a sôé wô mebo me Yésus a fimine mebo mé a ésile jé, nde nda é nga mane jaé a mbamba ényume mbon. 4 Ve Judas Iscariot, wua ya beyé’é bé, nyu a mbe na a zu koñe nye, a nga jô na: 5 “Amu jé mbon ô ne mbamba menyume wu ô nji kuabane bedenier* 300 a ve minzôzoé moné ate?” 6 A nga jô de, sa ke amu a mbe a wô’ô minzôzoé éngôngol, ve amu a mbe ñwuwup, a mbe fe a ba’ale’e nkobe moné, a mbe fe a wubu’u moné be mbe be futi’i été. 7 Nde Yésus a nga jô na: “Jôka’ané nye ne séé. A bo jame di, amu a kômesane ma asu môs éjame mbime jam. 8 Amu minzôzoé mi ne a mia kom ése, ve ma ma ye ke tabe a mia kom ése.”
9 Nde beta nsamba bejuif a nga yeme na a ne valé, ane be nga zu, sa ke ve na be yene Yésus, ve na be yene fe Lazare, nnye a nga wômô miñwuan. 10 Nde bejôô beprêtre be nga bo émo’o na be wôé fe Lazare, 11 amu nnye a nga bo na abui bejuif é ke wôé a buni Yésus.
12 Môs ô nga tya’a valé, beta nsamba bôt a nga so abôk a nga wô’ô na, Yésus a mbe a za’a Jérusalem. 13 Ane be nga nyoñe mebui melen a kui nseñe na ba ke tôbane nye, a be nga taté na ba jô yôp été na: “A Zambe, ba’ale’e nye! Ébotan é bo’o be nyu a so a jôé Yéhôva,* Njô bôte ya Israël!” 14 Éyoñe Yésus a nga yene mon éjakas, a nga tabe nye yôp, fo’o ve aval é ne ntilane na: 15 “Te ko woñ, a ngone ya Sion. Tame yen! Njô bôte wôé le a zu, a too mon éjakas yôp.” 16 Atata’a, beyé’é bé be nji be be yeme’e atinane ya mame mete, ve éyoñe Yésus a nga nyoñe duma, be nga simesane na mame mete me mbe ntilane mfa’a wé, a na be nga bo nye mame mete.
17 A nsamba bôt ô mbe a nye éyoñ a nga jô Lazare na a kôlô soñ a kui atan, a éyoñ a nga wômôlô nye miñwuan ô nga ke ôsu a kañete jam éte. 18 Ajô te nde fe nsamba bôt ô nga tôbane nye, amu ô nga wô’ô na a nga bo étua jam éte. 19 Nde bepharisien be nga jô be be na: “Mia yene na, jame bia bo é nji volô jôm. Tama yenan! Bôte bese ya si be nga tôñe nye.”
20 A begrec béziñe be mbe nsamba bôt ô nga so na, wo zu kañe Zambe beta abôk. 21 Nde begrec bete be nga ke be Philippe, nnye ate a mbe môte ya Bethsaïda ya Galilée, a taté na ba ye’elane nye be jô’ô na: “A monti, bia kômbô yene Yésus.” 22 Philippe a nga ke de kat André. André ba Philippe be nga ke de kate Yésus.
23 Ve Yésus a nga yalane be na: “Awolo é kuiya na Mona môt a nyoñe duma. 24 Ma bele fo’o ane ma kate mia na, nge fese blé ja bo te ku tyia a wu, ja li’i fo’o ve fes, ve nge ja wu, éyoñe te nje ja wum abui bibuma. 25 Nyu ase a nye’e ényiñe* jé a lôte nné a jañele* je, ve nyu ase a vini ényiñe jé si nyu a ye ba’ale je asu ényiñe ya nnôm éto. 26 Nge môt éziñ a kômbô bo ma ésaé, jôké’é nye a tôñe ma, a vôme me ne, mbo ésaé wome fe a ye bo valé. Nge môt a kômbô bo ma ésaé, Ésa wom a ye ve nye duma. 27 Éyoñe ji, nleme wome wo kumetan, a jé nje ma ye jô? A Ésa wom, nyi’i ma awolo di. Ve amu a nga bo na me so si, nnye le. 28 A Ésa wom, va’a éyôlé jôé duma.” Ane tyiñ é nga so yôp é jô’ô na: “Me veya je duma a ma ye beta ve je duma.”
29 Nsamba bôt ô mbe ô tele valé ô nga wô’ô tyiñ éte a taté na wo jô na zo’oyañe ja te bam. Ba bevo’o be nga jô na: “Éngele a te kobô nye.” 30 Yésus a nga yalane na: “E tyiñe mia te wô’ô le é nji kobô asu dam, ve asu denan. 31 Éyoñe ji, awolo ya ntyi’ane mejô ya si nyu é kpwaaneya, éyoñe ji njôô ya si nyu a ye wuaban atan. 32 Ve mfa’a wome nge ma betebane yôp, ma ye dutu kane bôt ése be ma.” 33 Nya ajôô a ne na, a mbe a jô’ô mame mete na, a liti kan awu a ntoo bebé ya wu. 34 Ane nsamba bôt ô nga yalane nye na: “Bi nga wô’ô Metiñe me Moïse na Krist a tabe nnôm éto, aval avé ô ne jô na Mona môt a yiane betebane yôp? Za a ne Mona môt ate?” 35 Nde Yésus a nga jô be na: “Éfufube ja ye bo be mia mone nté, wula’ané éfufup été, nté éfufup é ngenan; nde dibi da ye ke dañe mia, nyu ase a wulu dibi été, a nji yeme vôm a ke. 36 Nté mi ngenane mi bili éfufup, litané na mia buni éfufup, ndembene mi ne bo bone ya éfufup.”
Yésus a nga jô mame ma a ke, a ke sobô be. 37 Akusa bo a nga bo abui mesimba vôme be mbe, be nji buni nye, 38 ndembene mejô me nkulu mejô Ésaïe me ne tôéban, nnye a nga jô na: “A Yéhôva,* za a buni mam a wô’ô me so’o be bia?* A za nnye be nga liti wo Yéhôva?”* 39 Amu a nga bo na be bo teke buni, a ne jam Ésaïe a beta jô di: 40 “A nga dime mise map a bo minleme miap ayet, ndembene ba ye bo te yen a mise map, nge wôk a minleme miap, a kôñelane na me saé be.” 41 Ésaïe a nga kobô mame ma amu a nga yene duma dé a a nga kobô ajô dé. 42 To’o nalé, abui betebe ôsu afe é nga buni nye, ve amu be mbe be ko bepharisien woñ, be nji jô bôt été na ba buni nye, na bôte be bo te titane be synagogue; 43 amu be mbe be nyeke’e duma ya bôt a lôte duma ya Zambe ébien.
44 Ve Yésus a nga yôtane na: “Nyu ase a buni ma, a nji buni fo’o ve ma, ve a buni fe Nyu a nga lôme ma; 45 a nyu ase a yene ma a yene fe Nyu a nga lôme ma. 46 Me nga so be bôte ya si nyu ane éfufup, ndembene môt ase a buni ma a ne bo te tabe dibi été. 47 Ve, nge môt éziñ a wô’ô mame ma jô a teke tôñe me, me nji tyi’i nye ajô, amu me nga so sa ke na me tyi’i bôte bese ya si nyu mejô ve na, me nyii bôte bese ya si. 48 Môt ase a biasé ma a teke bo mame ma jô, a bili môt a tyi’i nye ajô. Mejô ma kobô mme ma ye tyi’i nye ajô melu ma zu.* 49 Amu me nji kobô nkômbane wome mamien, ve Ésa wom a nga lôme ma a nga ve ma atiñe mfa’a ya jame ma jô a jame ma kobô. 50 A ma yeme na atiñe dé da tinan ényiñe ya nnôm éto. Nde jam ése ma kobô, ma kobô fo’o ve aval Ésa wom a nga kate ma.”