Kalate ôsu Paul a nga tili Becorinthien
11 Bo’ané bevu bam, fo’o ve avale ma vu Krist.
2 Ma se’e mia, amu mfa’a ya mame mese mia simesane ma, a mia ke ôsu a ba’ale mame mese fo’o ve avale me nga ye’ele mia. 3 Ve ma yi na mi yeme na nlô ya fam ése, ô ne Krist; nde fe, nlô ya minga ô ne fam; nlô ya be Krist ô ne Zambe. 4 Fam ése ja buti jôm éziñe nlô éyoñe ja ye’elan, nge kuli mejô, ja ve njôô* wé ôsone nyul; 5 ve minga ase a bo te buti nlô, éyoñ a ye’elane nge kuli mejô, a ve njôô wé ôsone nyul amu a ne fe ve ane minga ba te sôté nlô. 6 Amu nge minga a bo te buti nlô, a yiane ñhe tabe a ésil é ntoo ntyi’an, ve nge é ne ôson asu minga na a tabe a ésil é ne ntyi’an, nge nlô ô ne nsôtan, a yiane ñhe buti nlô.
7 Amu fame ja yiane ke buti nlô wé, amu é ne éve’ela Zambe, ja ve Zambe duma, ve minga a ve fame duma. 8 Amu fam é nji so be minga, ve minga a nga so be fam. 9 A jame da dañ é ne na, fam é nji téban amu minga, ve minga a nga téban amu fam. 10 Amu jam éte, a amu beéngele, minga a yiane buti nlô wé, amu a liti na a sili émiene si éjôé.
11 Nde fe, ézezañe beyé’é be Tate été, ngal a nji yiane kandan a nnôm, a nnôm a nji yiane kandan a ngal. 12 Fo’o ve avale minga a so be fam, avale te nde fe fame ja so a zene ya be minga; ve biôme bise bia so be Zambe. 13 Miabebiene tyi’ané: Ye da yiane na minga a ye’elane Zambe teke buti nlô wé? 14 Ye avale môta binam a nga téban, da ye’ele ki mia na éyoñe fam é be’e ayap ésil, a ne ôsone jam, 15 ve nge minga nnye a be’e ayap ésil, a ne duma asu dé? Amu ésil é nga vebane be nye ane jôme ja buti nlô. 16 Ve nge môt éziñ a kômbô sañetan ajô ya ñye’elan ôfe, bi nji bi ôfe, ja’a bikôane bi Zambe.
17 Ve éyoñe ma ve melebe ma, me nji se’e mia, amu éyoñe mia tôban, mia bo ke mame ma dañe mvaé, ve mia bo ma ma dañ abé. 18 Jam ôsu, ma wô’ô na, éyoñe mia tôbane bikôane bekristen, nkanda’ane mengam a ne zañe jenan; a me too ndi abim éziñe na, jam éte é ne été. 19 Amu nkanda’ane mengam a ye ñhe fo’o bo be mia, ndembene ba be ne nkañesane be mia, be ne fe kôme yené.
20 Éyoñe mia sulane vôme wua, a nji fo’o bo asu na mi di Tawôlô Tate. 21 Amu éyoñe mia di Tawôlô Tate, môt ase a taté di bidi ya mame ngô’é, ndembene wua a wô’ô zaé, ve nyu mbok a nyuya aval é ne na a nga sok. 22 Ye mi nji bi menda, vôme mi ne di a nyu? Nge na, ye mia biasé ékôane Zambe a bo na, bôte be ne teke jôme be wôk ôson? Jé me ne jô mia? Ye ma yiane se’e mia? Amu mboone wônan, me vo’o se’e mia.
23 Amu mame me nga nyoñe be Tate, mme fe me nga ve mia na, Tate Yésus, alu be mbe na ba koñe nye, a nga to’é belet 24 a éyoñ a maneya ve akiba, a nga be’e je a jô na: “Ndeme ya nyule jame nyi, nje éte ja ye veban asu denan. Kelané ôsu a bo jame di mi simesa’ane ma.” 25 A nga bo fe avale da a élaé, éyoñe be maneya di bidi ya mame ngô’é, a nga jô na: “Nyuna a ne élaé é ne ndeme ya mfefé élate wo zu boban a zene ya metyi mam. Kelané ôsu a bo jame di éyoñ ése mia nyu je asu na mi simesane ma.” 26 Amu éyoñ ése mia di belete nyu, a nyu élaé ji, mia ke ôsu a kañete awu Tate akekui a ye so.
27 Nde, môt ase a di belet a nyu élaé Tate a too ke na a nji yiane bo de, a ye nyoñe mekua, amu a nji semene nyul a metyi me Tate. 28 Môt a taté’é fas émien a yene nge a ne zôsô, éyoñe te nje ñhe a ne di belet a nyu élaé. 29 Amu nyu a di a nyu a teke yem atinane ya nyul, a di a nyu ntyi’ane mejô wé émien. 30 Ajô te nde, abui ya be mia é ne nte’an a minkôkon a abui é wuya.* 31 Ve, nge bia tu’a fase za bi ne, bia ye ke tyi’ibane mejô. 32 Ve éyoñe ba tyi’i bia mejô, bia bi melebe me Yéhôva,* ndembene bi ne bo teke bi mekua a émo. 33 Nde a bobenyañe bam, éyoñe mi sulaneya nsamba na mia di, môt ase a yange’e nyu mbok. 34 Nge môt éziñ a wô’ô zaé, a ja’a nda jé, ndemben éyoñe mia ye zu tôbane nsamba, a bo te nyoñe mekua. Ve mfa’a ya minsili mivo’o mi nga sili, ma ye zu yalane mie, éyoñe ma ye so wôé.