Mbamba foé Matthieu a nga tili

5 Éyoñ a nga yene minsamba mi bôt, nde a nga bete nkôle yôp, a tabe si; ane beyé’é bé be nga zu be nye. 2 Nde a nga taté na a kobô a ye’ele mie, a jô’ô na:

3 “Mevak a bôte ba yeme na, be bili miñyiane ya nsisim,* amu Éjôé ya yôp é ne énjap.

4 “Mevak a bôte be bili mintaé minlem, amu ba ye bi mvolane minlem.

5 “Mevak a bôte be ne minlem évôvoé, amu si ja ye bo énjap.

6 “Mevak a bôte ba wô’ô zôsô zaé a évé, amu ba ye jaé.

7 “Mevak a bôte be ne mvam, amu ba ye fe mvamane be

8 “Mevak a bôte be bili minleme mi ne mfuban, amu ba ye yene Zambe.

9 “Mevak a bôte ba dutu bôte bevo’o na be beta tabe mvo’é,* amu ba ye loobane na bone be Zambe.

10 “Mevak a bôte ba tôban étibila’a be buta’ane zôsô, amu Éjôé ya yôp é ne énjap.

11 “Mevak a mia éyoñe bôte ba ve mia mekua, a éyoñe ba tibili mia a lume mia mbia bifia mevale mese amu jôé dam. 12 Va’ané a wô’ané nya mvaé,* amu ma’ane menane me ne abui yôp été; amu mia yeme na avale te fe be nga tibili bekulu mejô be mbe mia ôsu.

13 “Mi ne nku ya si nyu, ve nge nku ô jañele ngule jé, jé ja ye beta ve wô ngule jé? Ô nji beta bo mfi asu jôm éziñ, wo yiane fo’o ke fé na bôte be tibi wô a mebo.

14 “Mi ne éfufube bôte bese ya si. Tison é ne nlôñane nkôle yôp é vo’o sobô. 15 Éyoñe môt a bo’é lambe, a futi ki lambe ate ékate* si, a beté nye ételé belambe mfa’a ya na, éfufube ya lambe ate é faé nda ése. 16 Avale te fe, bo’ané na éfufube jenan é faé be bôte bese, ndembene ba ye yene mbamba be mame mia bo, a ve Ésa wônan a ne yôp été duma.

17 “Te mia simesane na, ma te zu tyame Metiñe me Moïse nge mejô bekulu mejô. Me nga so na, me zu tôé me, sa ke na me zu tyame me. 18 Ma bele fo’o ane ma jô mia na, avale mia yeme na si a yôbe bi vo’o ke lôt, avale te fe mia yeme na, teke mon ékanga ya Metiñe me Moïse a dañe tyôtyoé, nge ke ngabe jia ya ékanga éziñe ya Metiñe me Moïse é ne lôte teke jaléban. 19 Ajô te, môt ase a tyam atiñe da dañe tyôtyoé ya metiñe ma a ye’ele bôte bevo’o na be bo ane nye, a ye loobane na môt a dañe tyôtyoé Éjôé ya yôp. Ve môt ase a tôñe me a ye’ele me bôte befe, a ye loobane na môt a dañ anen* Éjôé ya yôp. 20 Amu ma kate mia na, nge mi nji bo zôsô a dañe bescribe a bepharisien, mia ye ke nyiin Éjôé ya yôp a zen éziñ.

21 “Mi nga wô’ô be jô’ô melu mvuse na: ‘Ô nji yiane wôé môt, ve môt ase a wôé môte mbok, a ye yalan ajô dé aba mejô. Nne ba ye ke tyik ajô dé wôé.’ 22 Ve me ma jô mia na, môt a ke ôsu a wô’ô monyañ ôlun, a ye yalan ajô dé aba mejô; a môt ase a jô monyañe mbia éfia amu a biasé nye, a ye yalan ajô dé beta aba mejô; ve môt ase a jô môte mbo’o na: ‘Ô ne zezé jôm!’ A ye wuabane mbe’e nduane ya Géhenne.*

23 “Nge wo kee mveane wôé na wo zu ve wô autel,* éyoñ éte wo simesane valé na, monyoñ a bili ajô éziñ a wo, 24 li’i mveane wôé valé, fefel autel, bula’ane ke taté kôm a monyoñ, mvuse ya valé, za’a ve mveane wôé.

25 “Nge ô bili ajô a môt éziñ, aval ajô ba yiane tyik aba mejô, kôme’e de avôl avôle nté mi ngenane teke kui aba mejô, amu môt ate a za kee wo be ntyi’i mejô, ntyi’i mejô a za kee wo be mba’ale mimbôk, mba’ale mimbô’ô ki a za futi wo nda mimbôk. 26 Ma kate fo’o wo na, ba ye ke suu wo nté ô ngenane teke ya’ane tañ ése akekui nsañe moné wôé wo dañe tyôtyoé.*

27 “Mi nga wô’ô be jô’ô na: ‘Ô nji yiane bo mejian.’ 28 Ve me ma jô mia na, môt a ke ôsu a fombô minga éziñ, akekui a bi nkômbane ya jô’ôbô a nye, a boya mejian a minga ate nleme wé été. 29 Nde, nge dise dôé ya mbo nnôme da tindi wo na ô bo nsem,* ték de, ô wua de fé. Amu é ne mvo’é na ébu’a jia ya nyule jôé é jañ, a dañe na be wua nyule jôé ése Géhenne.* 30 Nde fe, nge wo wôé ya mbo nnôme wo tindi wo na ô bo nsem,* tyi’i wô, ô wua wô fé. Amu é ne mvo’é na ébu’a jia ya nyule jôé é jañ, a dañe na be wua nyule jôé ése Géhenne.*

31 “Nde fe, mi nga wô’ô be jô’ô na: ‘Môt ase a tyam aluk a minga wé, a yiane ve nye kalate ntyaman aluk.’ 32 Ve ma jô mia na, nge môt a tyam aluk a minga wé, a too ke na a nji bo mvite mame ya bisôk,* a teléya nye été é ne tindi nye na a bo mejian. Nde fe, môt a lu’u minga a tele aval été éte a bo mejian.

33 “Mi nga wô’ô fe ane ba jô bemvamba benane na: ‘Ô nji yiane kane ngana teke tôé je, wo yiane tôé bengaka’a bese wo bo Yéhôva.’* 34 Ve ma jô mia na, te mia kane ngana éziñ, a nyoñe yôp ane ngaa amu é ne éto njôane Zambe, 35 nge kane ngana mi nyoñe’e si ane ngaa amu é ne ételé mebo jé, nge kane ngana mi nyoñe’e Jérusalem ane ngaa, amu Jérusalem a ne tisone beta Njô bôt. 36 Te mia kane ngana mi nyoñe’e nlô wônan ane ngaa, amu ô vo’o bo na kongo ésile jia é bo éfumulu nge ke évindi. 37 Bo’ané ve na éyoñe mi jôya na, ‘Ôwé,’ a bo fo’o ve ôwé; éyoñe ke mi jôya na, ‘Teké’é’ a bo fo’o ve teké’é, amu jame mia beta beté valé, da so be mbia môt.

38 “Mi nga wô’ô be jô’ô na: ‘Dise da tañe dis, asôñe da tañ asôñ.’ 39 Ve me ma jô mia na: Te bulan abé ba abé, ve nge môt a bibi wo abaé amañe ya mbo nnôm, va’a fe nye da vok. 40 Nge môt a kômbô kee wo be betyi’i mejô, a nyoñe wo éyé jia, va’a fe nye éyé jôé ya yôp ô be’e;* 41 a nge môt a bili éjôé éziñ a bi wo na ô be’e mbe’e éziñ tañe kilimita jia, bo’o de tañe kilimita ébaé. 42 Nge môt a sili wo jôm éziñ, va’a nye je; te bene ve môt ékôla* nge a sili wo je.

43 “Mi nga wô’ô be jô’ô na: ‘Wo yiane nye’e môte mbok a vini môt a siñe wo.’ 44 Ve, ma jô mia na: Kelané ôsu a nye’e bôte ba siñe mia, a ye’elane Zambe asu bôte ba tibili mia, 45 ndembene mia ye liti na mi ne bone be Ésa wônane ya yôp, amu a bo na vian ô faé asu mbia be bôt a asu mbamba be bôt. A bo fe na mveñ é noñ asu bôte be ne zôsô a ba be ne bikotekot. 46 Amu nge mia nye’e bôte ba nye’e mia, ma’ane mevé mia yiane me? Nga bôte ba nyoñe toya fe ba bo nalé? 47 Nge mia batane fo’o ve bobenyoñ, étua jam évé mia bo? Nga bôte ya meyoñe fe ba bo nalé? 48 Mia yiane ñhe bo ne seleñe teke ayeñ, aval ane Ésa wônane ya yôp a ne ne seleñe teke ayeñ.