Mbamba foé Jean a nga tili
18 Éyoñ a nga mane jô mame mete, Yésus a nga kui nseñ a beyé’é bé, a tyi’ilane mbi’ili ya Cédron,* vôm afup é mbe, a nga nyiin été a beyé’é bé. 2 Judas, nkoñe wé, nye fe a mbe a yeme’e vôm ate amu Yésus a beyé’é bé be mbe be kele’e vôm ate éyoñ ése. 3 Ane Judas a nga soo nkane bezimbi bejôô beprêtre a bepharisien be nga so be bili ngôé a belambe a bikpwelé mewosan. 4 Ane Yésus, amu a mbe a yeme’e mame mese ma yiane kui nye, a nga tebe ôsu a jô be na: “Mia jeñe za?” 5 Be nga yalane nye na: “Yésus ya Nazareth.” A nga jô be na: “Ma nyi.” Judas, nkoñe wé a mbe fe nsamba ôte.
6 Ve éyoñe Yésus a nga jô be na, “Ma nyi,” be nga bulane mvus a ku tyia. 7 Nde a nga beta be sili na: “Mia jeñe za?” Be nga jô na: “Yésus ya Nazareth.” 8 Yésus a nga yalane na: “Me kateya mia na ma nyi. Nge ma mia jeñ, jôka’ané bôte ba be ke.” 9 Mejô mete me nga tôé jam a nga jô na: “Ba bese ô nga ve ma, teke wua ya été a nga jañ.”
10 Ane Simon Pierre, nyu a mbe a bili nkpwaté mekôn a nga té wô a bibi ôlo beta prêtre, a tyi’i nye alo ya mbo nnôm. Éyôlé ôlo ôte é mbe Malkus. 11 Ve Yésus a nga jô Pierre na: “Futi’i nkpwaté mekôn abame dé été. Ye me nji yiane nyu élaé Ésa wom a nga ve ma?”
12 Ane bezimbi a évete bezimbi a bivete bejuif be nga bi Yésus a ka’a nye mo. 13 Be nga taté kee nye be Anne, amu a mbe ntyi fame Caïphe, nnye a mbe beta prêtre mbu ôte. 14 Nya ajôô, Caïphe nnye a mbe nyu a nga lebe bejuif na é ne mfi asu dap na, môte wua a wu asu bôte bese.
15 Simon Pierre a ñyé’é mfe a mbe a tôñe’e Yésus. Ñyé’é ate, be mbe be yeme’e nye be beta prêtre, a a nga ke a Yésus nseñe beta prêtre, 16 ve Pierre, a mbe a tele mbé si.* Ane ñyé’é mfe, nyu beta prêtre a mbe a yeme’e, a nga kui atan a kobô mba’ale mbé na a nyiñili Pierre e nda été. 17 Mbo ésaé minga, nyu a mbe a ba’ale’e mbé a nga jô Pierre na: “Nga wo fe ô ne ñyé’é wua ya beyé’é be môte nyi?” A nga jô na: “Teké’é.” 18 A nga bo na, alo a bezimbi be mbe be bôma’ane mbe’e nduane be nga kôban, amu avep é mbe a be mbe be woba’ane nduan. Pierre fe a mbe a tele a be, a woba’ane nduan.
19 Ane njôô beprêtre a nga sili Yésus minsili mfa’a ya beyé’é bé, a mfa’a ya ñye’elane wé. 20 Yésus a nga yalane nye na: “Me nga kobô bôt été, me mbe me jaé ye’ele synagogue, a e Temple vôme bejuif bese be mbe be so’o a tôkan, a me nji jô jôm éziñ asoé. 21 Amu jé wo sili ma minsili? Sili’i bôte be nga wô’ô mame me nga jô be. Tame yen! Bana ba yeme mame me nga jô.” 22 Éyoñ a nga mane jô mame ma, mone bezimbi wua ya ba be mbe be tele valé, a nga bibi Yésus abaé asu a jô nye na: “Ye nne wo yalane njôô beprêtre nalé nga?” 23 Yésus a nga yalane nye na: “Nge ma te kobô mbia jam, kate’e* ma de; ve nge ma te jô jam é ne été, amu jé wo bibi ma?” 24 Ane Anne a nga lôme nye be beta prêtre Caïphe a too nka’atane mo.
25 Simon Pierre a mbe a tele valé a woba’ane nduan. Nde be nga jô nye na: “Wo fe ô ne môte wua ya beyé’é bé, sa nalé?” A nga sôô de a jô na: “Teké’é.” 26 Mbo ésaé beta prêtre, nyu a mbe évuvumane môte Pierre a nga tyik alo, a nga jô na: “Ma te wo yen afup a nye, sa nalé?” 27 Ve Pierre a nga beta de sôô, nnôme kup a nga loñ été été.
28 Ane be nga vaa Yésus be Caïphe a kee nye nda ngovina. A mbe mame ya ndibe tyé. Ve bebiene be nji nyiine nda ngovina na be bo teke ve bebiene mvit, ndembene be bo ngule ya di Paska. 29 Nde Pilate a nga kui atan vôme be mbe a jô na: “Mia jô na môte nyi a te bo mbia jame mbé?” 30 Be nga yalane nye na: “Nge môte nyi a nji be mbia môt,* bi nji ye zuu nye be wo.” 31 Ane Pilate a nga jô be na: “Nyoñané nye miabebiene mi tyi’i nye ajô avale metiñe menane ma jô.” Bejuif be nga jô nye na: “Atiñ é nji kañese na bi wôé môt.” 32 Jam éte é nga tôé bifia Yésus a nga kobô éyoñ a nga kat aval awu a mbe na a yiane wu.
33 Ane Pilate a nga beta nyiine nda ngovina, a loone Yésus a jô nye na: “Ye ô ne Njôô bejuif?” 34 Yésus a nga yalane na: “Ye nsili ôte wo so be womien, ye bôte befe mbe be nga kate wo de?” 35 Pilate a nga yalane na: “Ye me ne mone juif? Ayoñe dôé a bejôô beprêtre, mbe ba te zuu wo be ma. Jam avé ô nga bo?” 36 Yésus a nga yalane na: “Éjôé jam é nji nyoñe ngap a mame ya si nyu, nge Éjôé jam é mbe é nyoñe ngap a mame ya si nyu, beyé’é bame be nga ye wosane na me bo te vebane be bejuif na be wôé ma. Ve aval é ne, Éjôé jam é nji so vôme nyi.” 37 Ane Pilate a nga sili nye na: “Nde, ye ô ne njô bôt?” Yésus a nga yalane na: “Womiene wo jô na me ne njô bôt. Amu jame di nde me nga bialé de, amu jame di nde me nga soo de si nyu, na me kañete benya mejôô. Môt ase a ne ngame benya mejôô a vô’ôlô tyiñe jam.” 38 Pilate a nga jô nye na: “Jé é ne benya mejôô?”
Éyoñ a maneya jô nalé, a nga beta kui atan, vôme bejuif be mbe a jô be na: “Me nji yene mbia jame be nye. 39 Nde fe, avale metume menane ma jô, ma yiane suu mia môte Paska. Nde ye mia yi na me suu mia njôô bejuif?” 40 Be nga beta yôtane na: “Sa ke môte nyi, ve Barabbas!” Barabbas ki a mbe ñwuwup.