Mbamba foé Marc a nga tili

14 A nga bo na, abô’ô Paska a Abô’ô ya belet é ne te mvusu me mbe na ma bobane mvuse melu mebaé, nde bejôô beprêtre a bescribe be nga jeñe zene ya bi Yésus a atyeñe medu’an* a wôé nye. 2 Ve be nga jô na: “Bi nji yiane bo de éyoñ abôk é ne, éko éziñe bôte be ne bo zô’é.”

3 Nté Yésus a mbe a ja’ak* e Béthanie, nda be Simon môt a mbe nzezam, minga éziñ a nga so a bili albâtre, nde’e mbon ô ne mbamba menyum, nya mbonô, mbon ô ne beta tañ. Ane a nga yoé nde’e mbon a taté na a sôé nye wô nlô. 4 Ane bôte béziñe be nga jô, môt ase a jô’ô nyu mbok a wô’ô ôlune na: “Aval éndamane di! Amu mbone wu ô ne beta tañ. 5 Amu ba be ngule ya kuane mbon ô ne mbamba menyume wu, tañe bedenier* a lôte 300 a ve minzôzoé moné ate!” A be nga wô’ô nye mbia ôlun.* 6 Ve Yésus a nga jô na: “Jôka’ané nye ne séé, amu jé mia kômbô ndeñele minga nyu? Ke a te bo ma mbamba jam. 7 Amu minzôzoé mi ne a mia kom ése, a mi ne mie bo mbamba be mam éyoñ ése mia yi; ve ma, ma ye ke tabe a mia kom ése. 8 A te bo jam a be ngule ya bo, a te sôé ma mbon ô ne mbamba menyume wu na a kômesane ma asu éjame mbim. 9 Ma kate fo’o mia na, vôm ase mbamba foé a ye katebane si ése, ba ye fe kañete jame minga nyu a te bo a simesane nye.”

10 Ane Judas Iscariot, môte wua ya minlôman Awôm a mibaé a nga kôlô a ke yene bejôô beprêtre na a koñe Yésus be be. 11 Éyoñe be nga wô’ô de, be mbe beta mevak, ane be nga ka’a na ba ye ve nye minsañe mi moné. Nde a nga taté na, a jeñe fane ya koñe nye be be.

12 Môs ôsu ya Abô’ô ya Belet é ne te Mvusu, éyoñe be wô’ô bo be va’a metuna’a ya Paska, beyé’é bé be nga jô nye na: “Nne wo yi na, bi ke kômesane wo vôme wo ye di abô’ô Paska vé?” 13 Ane a nga lôme beyé’é bé bebaé a jô be na: “Kelané tison, mia ye tôbane môt a be’e nde’e mendim. Tôñané nye 14 a vôm ase a ye nyiin, katané mie ndaa na, ‘Ñye’ele a jô na: “Aba beyeñ é ne vé, vôme me ne di Paska a beyé’é bam?”’ 15 A ye liti mia beta aba nda yôp, aba éte é bili biôme bise ya nda, kômesané bia abô’ô Paska été wôé.” 16 Nde beyé’é be nga kui nseñ a be nga ke nyiine tison, a koone mame fo’o ve avale Yésus a nga kate be, ane be nga kômesan abô’ô Paska.

17 Éyoñe ngô’é é nga kui, Yésus a nga suan a minlômane mié Awôm a mibaé. 18 A nté be mbe be too si be ja’a tebele, Yésus a nga jô na: “Ma bele fo’o ane ma jô mia na, môte wua ya be mia, mia mi too si a di tebele va a ma a ye koñe ma.” 19 Nalé a nga bo be nleme mintaé, nde môt ase ya be be a mbe a sili’i nye na: “Sa ke ma, nga?” 20 A nga jô be na: “A ne môte wua ya minlôman Awôm a mibaé, nyu a dube wo wé éyoñe jia ésua été a ma. 21 Amu Mona môt a ye fo’o ke aval é ne ntilane mfa’a wé, ve ngo’o môt a ye koñe nye. É nga ye dañe bo mvaé asu dé na a bo teke bialé.”

22 Nté be mbe be kele’e ôsu a di, Yésus a nga to’é belet, ane a nga mane ye’elan.* Nde a nga be’e je, a ve je beyé’é bé a jô’ô be na: “Nyoñané, belete nyu é ne ndeme ya nyule jam.” 23 A nga nyoñe fe élaé a ve Zambe akiba, a ve be je, ane bese be nga nyu je. 24 A a nga jô be na: “Élaé ji é ne ndeme ya metyi mame ya élat, mme ma ye fo’o sôébane si asu abui bôt. 25 Ma kate fo’o mia na, ma ye ke beta nyu woon akekui môse ma ye beta nyu nye mfefé nyuan Éjôé Zambe.” 26 Éyoñe be nga mane yia bia ya ve Zambe duma,* ane be nga kui nseñ a ke Nkôle Beolivier.

27 Yésus a nga jô be na: “Mia bese mia ye kolé ôbak ajô dam, amu é ne ntilane na: ‘Ma ye bibi mba’ale mintômba, a mintômba mia ye mialan.’ 28 Ve éyoñe ma ye wômô, mia ye zu koone ma Galilée.” 29 Ve Pierre a nga jô nye na: “To’o bôte ba bese ba kolé ôbak ajô dôé, ma me vo’o de bo.” 30 Ane Yésus a nga jô nye na: “Ma bele fo’o ane ma jô wo na, den, alu ébiene di, ôsusua na nnôme kup a loñ, wo ye jô biyoñe bilale na ô nji yeme ma.” 31 Ve a nga jaé ba’alane biyoñe biyoñe na: “To’o da sili na me wu a wo, me vo’o jô na me nji yeme wo.” Ba bevo’o bese fe be nga taté na ba jô avale da.

32 Nde Yésus a beyé’é bé be nga ke vôme ba loone na, Gethsémané, ane a nga jô beyé’é bé na: “Taba’ané si va nté ma ye’elan.” 33 Ane a nga kee Pierre, Jacques a Jean, a nlem ô nga taté na wo bo nye mbia mintaé* a nga bo fe mbia éyôé. 34 Nde a nga kate be na: “Nleme wo bo ma* mbia mintaé, mintaé ve ane ma zu wu, taba’ané va, mi mombô.” 35 Ane a nga ke ôbe nté a kute meboñe si a taté na a ye’elane Zambe na, nge nalé a ne boban, nju’u wo yange nye ô ke nye ôyap. 36 Ane a nga jô na: “Abba,* a Ésa wom ô ne ngule ya bo mame mese, bo’o na élaé ji é ke ma ôyap, ve sa ke ane nkômbane wom ô ne, ve ane nkômbane wôé ô ne.” 37 A nga bulan a koone be be too ôyo, ane a nga jô Pierre na: “A Simon, ye wo ke ôyo? Ye ô nji bi ngule ya mombô awolo da? 38 Momba’ané a ye’elan éyoñ ése na, mi bo teke ku meve’ele été. Nsisim ô ne ngul,* ve nsôn ô ne atek.” 39 Ane a nga beta ke a ye’elan, a sili’i ve jame da. 40 Ane a nga beta so a zu koone be be kele’e ôyo, amu ôyo ô mbe be mis. Nde be nji yeme jame be ne yalane nye. 41 Ane a nga zu koone be éyoñe lale a jô be na: “Aval éyoñe di mi mia ke ôyo a wo’on! Abim éte da yian! Tama yenan! Awolo ba kee Mona môte mo bebo minseme na be wôé nye é kuiya. 42 Kôla’ané si, bi ke! Tama yenan! Môt a koñe ma a nga zu.”

43 A ngenan a kobô’ô, e teme na Judas, wua ya minlôman Awôm a mibaé, a nga suan a nsamba bôt ô bili minkpwaté mekôn a mimbeñ, bejôô beprêtre, bescribe a bemvendé ya ayoñe be nga lôm. 44 Môt a nga koñe nye a nga ve be ndem, a jô’ô be na: “Môte ma ye nyañ amañ, nnye le, biané nye, mi kee nye a kôme ba’ale nye.” 45 A nga ke tetele be Yésus a jô nye na: “A Rabbi!” A wubane nye a nye’an ôse. 46 Nde be nga bi nye a kee nye. 47 Ve môte wua ya ba be mbe valé, a nga vaa nkpwaté mekône wé abam, a bibi ôlo beta prêtre a tyi’i nye alo. 48 Ve Yésus a nga jô be na: “Ye mia te zu bi ma a minkpwaté mekôn, a mimbeñ, ane mia zu bi ñwuwup? 49 Môs ane môs, me nga jaé tabe Temple été a mia me ye’ele bôt, ve mi nji bi ma. Ve mame ma me nga bobane mfa’a ya na Mintilane mi tôéban.”

50 Ane beyé’é bé bese be nga li’i nye étam a tup. 51 Ve mone ndôman éziñ a mbe a be’e fo’o ve éyé ya yôp é too a nya ndomboo, a mbe a tôñe’e nye ôbe nté, ane be nga kômbô bi nye. 52 Ve a nga lik éyé jé é too a nya ndomboo a tup a too nsoé.*

53 Ane be nga kee Yésus be beta prêtre, ane bejôô beprêtre bese a bemvendé a bescribe be nga tôkan. 54 Ve Pierre a nga ke a tôñe nye ôbe nté akekui nseñe beta prêtre; éyoñ a nyiineya été wôé, ane a nga ke tabe si a bebo bisaé ya nda a wobane nduan. 55 Ane bejôô beprêtre a Sanhédrin* ase be nga ke ba jeñe mame ya bo’olô Yésus na, be wôé nye, ve be nji yene jam éziñ. 56 É ne été na, abui bôt é nga bo’olô nye mame me nji be été, ve mame be nga bo’olô nye me mbe me sela’an. 57 Nde fe, bôte béziñe be nga so a bôte nye ajô, be jô’ô na: 58 “Bi nga wô’ô nye a jô’ô na, ‘Ma ye tyame temple nyi, nnye ate be nga lôñ a mo a ma ye lôñe mfe tañe melu melal, nnye ate a ye ke bo nlôñan a mo.’” 59 Ve to’o be nga jô mame mete, mejô map me nga selan.

60 Nde beta prêtre a nga tebe tetele zañe jap a sili Yésus na: “Wo dip anyu aya? Ye wo wô’ô ki mame bôte ba ba jô na ô nga bo?” 61 Ve a nga tabe évôl teke yalane nye, beta prêtre a nga beta nye sili na: “Ye ô ne Krist Mone Nyu a ne Ébotan?” 62 Nde Yésus a nga yalane nye na: “Ôwé, ma me ne nye, a mia ye yene Mona môt a too mbo nnôme Zambe ya ngul ése a za’a minkut été.” 63 Nde beta prêtre a nga nyabe biyé bié a jô na: “Bebo’olô ba beta volô bia jé? 64 Nga miabebiene mia te wôk ane a kobô Zambe ébiasé, bi bo nye aya?”* Ane bese be nga tyi’i na a yian awu. 65 Bôte béziñe be nga tui nye menden, ba bevo’o be nga buti nye asu a lume nye bikuta a jô nye na: “Nge ô ne nkulu mejô kate’e bia, za a te bibi wo?” Nde fe, be nga bibi nye mebaé asu, ane bezimbi ya nda mejô be nga kee nye.

66 Nté Pierre a mbe a tele nseñe ya nda mejô mfa’a ya si, ane mbo ésaé minga a mbe a saék be beta prêtre a nga so. 67 Éyoñ a nga yene Pierre a woba’ane nduan, a nga fombô nye mis été a jô nye na: “Wo fe ô mbe a Yésus nyu, môte ya Nazareth.” 68 Ve a nga sôô de a jô’ô na: “Me nji yeme môte wo jô nye le, nge yeme jame wo jô.” Ane a nga kôlô valé a ke mfa’a ya mbé ya akak. 69 A ngenan a tele valé, ngone minga é mbe é saék valé é nga yene nye, ane é nga kate bôte be mbe valé na: “Môte nyi a ne wua ya be be. 70 Ane a nga beta sôô de. Mvuse mon éyoñ, bôte be mbe be tele valé be nga beta taté na ba jô Pierre na: “Teke vaa nge beté, ô ne wua ya be be, amu ô ne môte ya Galilée.” 71 Ve a nga taté na a sôô jam éte* a kane’e ngana a jô’ô na: “Me nji yeme môte mia jô nye le!” 72 Été été, nnôme kup a nga loñ éyoñe baa, ane Pierre a nga simesane jame Yésus a nga jô nye na: “Ôsusua na nnôme kup a loñe biyoñe bibaé, wo ye jô biyoñe bilale na, ô nji yeme ma.” Ane nlem ô nga bo nye mbia mintaé, a taté na a yôn.