Ba ke Yésus be Anne, mvuse ya valé e be Caïphe

Éyoñe be biya Yésus a ka’a nye ane mbia môt, ba ke nye be Anne, nnye ate a mbe beta prêtre éyoñe Yésus a nga bo na beye’ele ya Temple be kam a biyalane a mbe a va’a be, e zu koon a nga’an ésoé. (Luc 2:42, 47) Bone be Anne béziñ be nga bo fe ésaé ane beta prêtre, a nnôme ngone wé Caïphe nnye a bili éto éte éyoñe ji.

Nté Yésus a ngenane be Anne, Caïphe a bi éyoñe ya mane tôkane bôte ya Sanhédrin. Aba mejô ete é bili bibu’a 71, mfulane a beta prêtre a bôte befe be nga jaé saé valé.

Anne a bôône Yésus minsili “ajô beyé’é bé, a mejô a nga ye’ele bôt.” Yésus a yalane nye tyi’ibi na: “Me nga kobô bôt atan: melu mese me nga ye’ele bôt menda me Zambe a temple, vôm Bejuif bese be nga bo be sula’an; me nji kobô asoé. Wo sili me [minsili] amu jé? Sili’ bôt be nga wô’ô me kôbô’ô, za ajô me nga kobô be: bôte bete mbe be ayeme mejô me nga jô.”​—Jean 18:19-21.

Évete éziñ é ne valé ja latane Yésus abaé amañ a komekane nye a jô’ô na: “Ye wo ayalan njô beprêtre nalé?” Ve mbôle Yésus a yeme na a nji bo jam éziñ é to abé nde a yalane nye na: “Nge me ate kobô abé, kate’e me de: nge me ate kobô mvaé, wo abibi me amu jé?” (Jean 18:22, 23) Mvuse ya valé, Anne a bo na be ke Yésus be nnôme ngone wé ba loone na Caïphe.

Awolo di, bibu’a bise ya Sanhédrin beta prêtre, bemvendé ya ayoñ, a bescribe, be mbe be maneya sulan. Ba ke tôbane nda Caïphe. Mboan ôte ô ne ékotekot amu atiñ é nji kañese na be kobô ajô alu ya môse Pâque, ve jam ete é nji kamane be na be ke ôsu a mbia mboane wop.

Nsamba bôt ôte ôse ô ne tyiñe jia. Éyoñ a nga wômôlô Lazare, Sanhédrin a nga nyoñe beta ntyi’ane na Yésus a yian awu. (Jean 11:47-53) Fo’o ve bone melu be nga tôñe valé, betebe ôsu ya miñyebe be nga bondé fe’e ya bi Yésus a wôé nye. (Matthieu 26:3, 4) Ôwé, ôsusua na ba kobô ajô dé, be mbe be tyi’iya na Yésus a yiane wu!

Akusa bo ajô te da koban ékotekot, beta prêtre a bôte befe ya Sanhédrin ba jeñe bengaa be ne zu bo’olô a miñsos na Yésus a ne mbia môt. Ba yene abui bôt, ve ba kate kui na be wô’an. Nde bôte bebaé ba su’ulane so a jô na: “Bi nga wô’ a jô’ô na, Me aye tyame temple nyô a ne nlôñan a mo, a lôñe mfe môse mila a ne te nlôñan a mo.” (Marc 14:58) Ve to’o nalé, mejô map me ne ve selan.

Caïphe a sili Yésus na: “Ye wo te yalan ajô da? Za ajô bôte ba be abo’olô wo?” (Marc 14:60) Yésus a tabe évôl éyoñ a wô’ô minsos bivuse bengaa bi bia laan. Nde Caïphe, Beta Prêtre a tyendé fatane mboane minsili.

Caïphe a kôme yeme na Bejuif be nji wô’ô jam afe abé ane éyoñe môt a jô na a ne Mone Zambe. Ôsusua, éyoñe Yésus a nga loone Zambe na, Ésa wé, Bejuif be nga kômbô nye wôé amu be nga jô na “a bo émien a Zambe nté nkôñe wua.” (Jean 5:17, 18, Mfefé Nkôñelan; 10:31-39) A zene ya ôsimesan ôte, Caïphe a vañe sili Yésus na: “Me ajô wo asu Zambe a vee, na, kate’e bia nge ô ne Krist, Mone Zambe!” (Matthieu 26:63) É ne été na, Yésus a yeme na a ne Mone Zambe. (Jean 3:18; 5:25; 11:4) Ve nge a nji kate jam ete éyoñe ji, be ne simesane na, a nji beta meme na a ne Mone Zambe a Krist. Nde Yésus a jô na: “Yaa me le: mi aye yene Mone môt a to si mbo nnôm ô ne ngu, a za’a minkute ya yôp.”​—Marc 14:62.

Éyoñ a wô’ô jam ete, Caïphe a wô’ô abui ôlun a nyabe fe ngômesane jé a jô’ô na: “A te biasé Zambe: jé bi abeta jeñe bebo’olô? Éyoñe ji mi wô’ôya ane a biasé Zambe. Mi asimesan aya?” Bôte ya Sanhédrin ba tebe a tyi’i ajô ékotekot été a jô na: “A yiane awu.”​—Matthieu 26:65, 66.

Bevo’o ba taté na ba kpwe’ele Yésus a bibi nye bikuta. Bevo’o ki ba latane nye mebaé memañ a tui nye menden asu. Mvus éyoñ be maneya bibi nye mebaé a bikuta, ba jô nye a ébiasé ése na: “Kulu’ mejô: za a te bibi wo?” (Luc 22:64) Miabebien yenan aval ba bo Mone Zambe a to ke na, ba te tyi’i nye ajô é nji yiane tyi’iban e zañ alu!