Kalate Paul a nga tili Beromain

14 Nyoñané bôte be bili mbunan ô ne nte’ane mvo’é, ve te tyi’ané bôte bevo’o mejô amu asimesane dap da selan a éndenan.* 2 Môt éziñ a bili mbunane ya di jôm ése, ve môt a bili mbunan ô ne nte’an a di ve bijebejeba. 3 Môt a di a bo’o te biasé môt a nji di, a nyu a nji di a bo’o te tyi’i nyu a di mejô, amu Zambe a nga nyoñe nye mvo’é. 4 Wo ô ne za na, ô tyik éza mbo ésaé mejô? Nge a tele nge ku, a ne asu masa wé. Ôwé, a ye tebe tetele amu Yéhôva* a ne bo na a tebe tetele.

5 Môt éziñ a simesane na môs éziñe wo dañe wu ôvok, môte mbok a simesane na mimôse mise mi ne avale da, môt ase a tuka’a tabe ndi ya jam a simesane nleme wé été. 6 Môt a semene ngumba môs a bo de amu Yéhôva,* nde fe nyu a di a di amu Yéhôva* amu a ve Zambe akiba, a nyu a nji di a nji di amu Yéhôva,* ve akusa bo nalé, a ve Zambe akiba. 7 Nya ajôô, teke môt éziñe ya be bia a nyiñ amu émien étam, a teke môt éziñ a wu amu émien étam. 8 Amu nge bia nyiñ, bia nyiñ amu Yéhôva,* a nge bia wu bia wu amu Yéhôva.* Nde, bité bite bibaé, amu nge bia nyiñe nge wu, bi ne bôte be Yéhôva.* 9 Amu, jôme te nje Krist a nga wu a beta nyiñ, ndemben a ne bo Tate ya miñwuan a Tate ya bevevee.

10 Ve amu jé wo tyi’i monyoñe mejô? Nge na, amu jé wo biasé fe monyoñ? Amu, bia bese bia ye tebe ôsu éto ntyi’ane mejô Zambe. 11 Amu é ne ntilane na: “‘Ane me vee,’ nne Yéhôva* a jô nalé, ‘aboñ ése da ye kutebane si, a ôyem ôse wo ye yemelane bôt été na, me ne Zambe.’” 12 Nde, môt ase ya be bia a ye tebe ôsu be Zambe na a tyi’iban ajô avale mimboone mié mi ne.

13 Nde môt éziñ a bo’o te tyi’i nyu mbok ajô, ve môt ase a nyoñe ntyi’ane ya bo te bôé akok, nge jôm éziñe ja kolé monyañ ôbak ôsu. 14 Ma yem a me too ndi nleme be Tate Yésus na, jôm éziñ é nji téban é too mvit, a ne fo’o ve éyoñe môt a simesane na jôm éziñ é ne mvit, éyoñe te nje ja bo mvit. 15 Amu nge monyoñ a wôk ôlun amu bidi, ô nji beta wulu avale nye’ane wo jô. Te bo na monyoñ a ku amu bidi wo di, môte Krist a nga wu a butane nye. 16 Nde ñhe, te bo na bôte be kobô mbamba jame wo bo abé. 17 Amu Éjôé Zambe é nji tinane na e di a e nyu, ve ja tinane na zôsô, a mvo’é, a mevak, a mfufube nsisim. 18 Amu nyu ase a saane Krist ane ôlo aval éte a yené mvaé mise me Zambe a yené fe mvaé mise me bôt.

19 Nde, ntôñesa’ané mame ma ve mvo’é, a mame ma bo na môt ase a bo na môte mbok a bo ngul. 20 Te ndaman ésaé Zambe fo’o ve amu bidi. Nya ajôô a ne na, biôme bise bi ne mfuban, ve a ye bo mbia jame na môt a di bidi bia bo na nyu mbok a kolé ôbak. 21 É ne mvaé ya bo te di tit, nge nyu woon, nge bo jôm éziñ é ne bo na monyoñ a kolé ôbak. 22 Mbunan ô bili, kele’e ôsu a ba’ale wô zañe mia Zambe. Mevak a môt a nji tyik émien ajô a zene ya mam a nye’e. 23 Ve nge a bili bisô nleme wé été, a mbili mekua nge a di, amu a di a teke tu’a yeme nge jam a bo é ne mvaé nge abé. Ôwé jôm ése é nji boban a mbunan é ne nsem.