Kalate baa Pierre a nga tili
3 A bôte ma nye’e, éyoñe baa ji ma tili mia kalate, a e kalate nyi aval ane nyi ôsu, ma jô mia na mi belane mbamba mfasane wônan a zene ya bo mia mimba’alane ya mame mi nga yem, 2 asu na mi simesane mejô me nga jôbane* melu mvus a zene ya mimfufube bekulu mejô a atiñe Tate a Nkôté wongan a nga kalan a zene ya minlômane mienan. 3 Taté’é yemané na, melu ma su’ulan, bekpwe’ele ba ye so a bikpwe’ele biap, ba ye bo de be tôñe’e minkômbane miap bebien 4 a be jô’ô na: “Éyoñe be nga jô na a ye bo valé* é ne vé? Amu na, ataté éyoñe bemvamba bangane be nga mane wu azukui éyoñe ji, mame mese me ne avale da ane atata’a ya ntéane biôm.”
5 Amu ba vañe dimine jame di, e melu mvus, yôp a si bôte ba wulu bi nga tebe vôme mendime me nji bo a ézezañe mendim a zene ya mejô me Zambe; 6 a na a mezene mete, bôte ya éyoñ éte be nga tyamban a nyoñe mendim été. 7 Ve a zene ya mejô mete, yôp a si ya éyoñe ji bi ne nnaan asu nduan a bia ye ke ôsu a tabe nnaan akekui môse ntyi’ane mejô a njañane ya bôte be ne te semene Zambe.
8 Ve jame da, a bôte ma nye’e, mi bo te vuane jame di, na mfa’a Yéhôva* môse wua ô ne ane toyini mimbu a toyini mimbu é ne ane môse wua. 9 Yéhôva* a nji bo njeme mfa’a ya tôé ngaka’a jé, avale bôte béziñe ba simesan ajô ya njem, ve a ne ôjibi a mia amu a nji yi na môte wua a jañ, ve a yi na bôte bese be kôñelane minlem. 10 Ve môse Yéhôva* wo ye so aval ane ñwuwup, môs ôte, yôp da ye lôt a beta éduñ,* ve biôme bi ntoo ayôñ abui bia ye mane nyemé, a si a mimboone ya été mia ye yené ne ngeññ.
11 Mbôle biôme bite bise bia yiane mane nyemé avale te, kelané ôsu a fas avale bôte mia yiane bo mfa’a ya ntaban ô ne étyi a bi mimboone mia liti na mia ko Zambe woñ, 12 nté mia yange a ba’ale ôsimesan* éyoñe môse Yéhôva* wo ye bo ô too valé, môs ôte yôp da ye kalane nduane minkaba’a été, a biôme bia ye nyemé amu ngul ayôñ. 13 Ve bia yange mfefé yôp a mfefé si aval a nga bo ngaka’a, a zôsô a ye tabe été.
14 Ajô te, a bôte ma nye’e, mbôle mia yange mame mete, jeñané a ngul ése na a koone mia teke ayeñ, teke bijô a mvo’é été. 15 Nde fe, yenané ôjibi Tate wongan, fo’o ve avale monyañe wongane bia nye’e Paul fe a nga tili mia amu fek é nga vebane be nye, 16 a kobô ajô ya mame mete bekalate bé bese. Ve, mame méziñe ya été me ne ayaé ya wôk, a mame mete, bôte be ne ndiman* a ba be nji yeme mbunan été ba ndamane me, fo’o ve avale ba bo fe Mintilane mivok asu njañane wop bebien.
17 Ajô te, a mia bôte ma nye’e, amu mi nga yeme jam éte ôsusua, taba’ané ñhe ntyele na, mi bo teke yale fé a be, a zene ya ékobe bôte ba tyame metiñ, a jañele été nsisime jenan.* 18 Ve, kelané ôsu a yaé beta mvam a ñyemane mia yeme Tate wongan a Nkôté wongane Yésus Krist. Duma é bo’o be nye ataté éyoñe ji akekui nnôm éto. Amen.