“Ba’alané mbamba mfasane wônan, taba’ané ntyel!”

1. Jé Yésus a nga jô beyé’é bé a lat a asu’ulan, a abendé avé a nga ve be?

BONE melu ôsusua na Yésus a wu, beyé’é bé benyine be nga sili nye na: “Ndeme fé ja liti bia na . . . memane ya émo me kuiya?” (Matt. 24:3) Éko éziñe beyé’é bete be mbe be kômbô yem éyoñe Jérusalem a Temple wé bé tyamban. Éyoñe Yésus a nga yalane be, a nji su’u ve na a kate be memane ya nta’ane mame bejuif, a nga kobô fe be ajô ya “memane ya émo,” mme mete bi nga nyiñ éyoñe ji. Yésus a nga jô a lat a melu ya asu’ulane na: “Mfa’a ya môs ôte a awolo éte, môt éziñ a nji yem, to’o beéngele ya yôp, to’o Mon, fo’o ve Ésa.” Jôm te nje a nga lebe beyé’é bé na: “taba’ané ntyel” a “momba’ané.”​—Marc 13:32-37.

2. Amu jé bekristene ya ntete mimbu ôsu be mbe be yiane mombô? Amu jé bekristene be mbe be nyiñi’i nta’ane mam bejuif be mbe be yiane mombô?

² Bekristene be mbe be nyiñi’i Judée ntete mimbu ôsu fe be mbe be yiane mombô asu na be bo teke wu. Yésus a nga kate beyé’é bé mame mé volô be na be yeme na amane ya nta’ane mame bejuif é nto bebé. A nga jô be na: “Éyoñe mia ye yene Jérusalem a too mbôma’ane a minkane bezimbi, yemané na ntyamane wé ô ntoo bebé.” Éyoñ éte ébien, be mbe be yiane tôñ abendé Yésus a “taté na ba tup a ke minkôl.” (Luc 21:20, 21) Ba be nga tôñ abendé éte be nga nyiñ éyoñe nkane bita beromain ô nga zu tyame Jérusalem.

3. Jé bii yen ayé’é di?

³ Den, bia fe bia nyiñe memane ya mbia nta’ane mame nyi. Ajô te bia fe bia yiane ba’ale mbamba mfasan a mombô. Ayé’é di, bia zu yen aval avé bi ne bi mbamba ñyenane mam éyoñe bia yene mame ma boban émo ji, aval avé bi ne ba’ale biabebien, a aval avé bi ne yeme belan éyoñ é li’iya bia.

JEÑE’E NA Ô BI MBAMBA ÑYENANE MAM ÉYOÑE WO YENE MAME MA BOBAN ÉMO

4. Amu jé bia yiane tu’a beme mise mangan aval mame ma boban émo ma tôé minkulane mejô ya Kalate Zambe?

⁴ Bi bili mbamba beamu ya jeñe na bi yem aval avé mame ma boban émo ji ma tôé minkulane mejô ya Bible. E ne mvo’é na bi bo de, amu Yésus a nga kobô ajô ya mame mé boban, mme mete mé volô bia na bi yeme na bi nga nyiñe memane ya mbia nta’ane mame Satan nyi. (Matt. 24:3-14) Nlômane Pierre ô nga lebe bia na bi tu’a fombô aval minkulane mejô mia tôéban, asu na bi ke ôsu a ba’ale ngule mbunan. (2 P. 1:19-21) Kalate a su’ulane Bible a taté a bifia bi: “Nlitane Yésus Krist, ñwô Zambe a nga ve nye na, a liti alo dé mame ma yiane boban ana’ana.” (Nlitan 1:1) Ajô te bia yiane kôme jeñe na bi yeme mame ma boban émo éyoñe ji, a yen aval avé ma tôé minkulane mejô ya Bible. A bi ne bi éva’a ya laane mame mete a bôte bevok.

5. Jé bia yiane sa’ale, ve jé bia yiane bo? (Fombô’ô fe befôtô.)

⁵ Éyoñe bia laan ajô ya minkulane mejô ya Bible, bia yiane sa’ale ôlame ya ke bia ve’e befe’e. Amu jé? Amu bi nji kômbô jô jôm éziñ é ne so nkandane mengam akônda été. Éve’an é ne na, bi ne wô’ô betebe ôsu ya émo be tametan aval avé be ne kôme minju’u miziñe bôte ba tôbane mie, avale be ne so mvo’é a bo na bôte be bo teke beta nyiñe woñ été. Bi nji yiane ve’e befe’e a simesane na mejô mete ma tôé nkulan ajô ya kalate 1 Bethessalonisien 5:3, ve bia yiane jeñe na bi yeme miñye’elane bi kandane bi a lat jam éte. Éyoñe mame bia jô ma so bikpwelé ékôane Yéhôva ja kuli, nalé a volô na akônda é bo nlatan a na bia bese bi “bi avale mfasane da”​—1 Cor. 1:10; 4:6.

6. Jé 2 Pierre 3:11-13 a ye’ele bia?

⁶ Lañe’e 2 Pierre 3:11-13. Nlômane Paul wo volô bia na bi bi mbamba ñyenane mam a lat a minkulane mejô ya Bible. A yi na bi “ba’ale ôsimesan éyoñe môse Yéhôva wo ye bo ô too valé.” Amu jé? Sake amu bia jeñe na bi yeme “môs ôte a awolo” Yéhôva é so Harmaguédon, ve amu bia jeñe na bi yeme belane abim éyoñ é li’iya bia “mfa’a ya ntaban ô ne étyi a bi mimboone mia liti na [bia] ko Zambe woñ.” (Matt. 24:36; Luc 12:40) Nalé a tinane na bia jeñe na bi ba’ale mbamba ntaban, a tabe ndi na jame da tindi bia na bi ve ngule jangan ése asu ésaé Yéhôva é ne nye’an bia nye’e Nye. Asu na bi ba’ale jam éte ôsimesan, bia yiane tabe ntyel a biabebien.

E TABE NTYEL A BIABEBIEN A TINANE AYA?

7. Aval avé bi ne liti na bia tabe ntyel a biabebien? (Luc 21:34)

⁷ Yésus a nga jô beyé’é bé na be bo teke tabe ntyele ve asu mame ma boban émo, be bo fe de asu dap bebien. A nga tu’a ngôné abendé éte kalate Luc 21:34. (Lañek.) Yésus a jô été na: “Taba’ané ntyel a miabebien.” Môt a yeme tabe ntyel a émien a jeñe na a yemelane mone jam ase a ne ndaman élate jé a Yéhôva, a bo fe mame ma sili asu na a sa’ale jam éte. Éyoñ a bo nalé, a ba’ale émiene nye’ane Zambe été.​—Mink. 22:3; Jude 20, 21.

8. Melebe mevé nlômane Paul ô nga ve bekristen?

⁸ Nlômane Paul ô nga jô bekristene na be tabe ntyel a bebien. Éve’an é ne na a nga jô bekristene ya Éphèse na: “Taba’ané nya ntyele na, avale mia wulu é bo te bo ane mekut, ve ane bôte be ne fek.” (Éphé. 5:15, 16) Satan a jeñ éyoñ ése na a ndaman élate bi bili a Yéhôva, ajô te Kalate Zambe a jô bia na “kelané ôsu a yemelan avale nkômbane Yéhôva ô ne” ndembene bi bo ngule ya kamane biabebien aval ôlam ôse Satan a ne telé bia ôsu.​—Éphé. 5:17.

9. Jé bi ne bo asu na bi yemelane nkômbane Yéhôva?

⁹ Kalate Zambe a nji kate bia jam ése é ne ndaman élate jangan a Yéhôva. Bi wô’ô jaé tebe avale bité da sili na bi nyoñe mintyi’an, ve teke na Kalate Zambe a kate bia jame bia yiane bo ne sañesañ. Asu na bi nyoñe mbamba ntyi’an, bia yiane jeñe na bi yemelan “nkômbane Yéhôva.” Bi ne de bo éyoñe bi bili fulu ya yé’é Kalate Zambe mban a bindi mame bia yé’é. Nté bii ve ngule ya wô’ô nkômbane Zambe a jeñe na bi bi “ôsimesane Krist,” nalé é volô bia na bi tu’a wulu ane “bôt be ne fek,” to’o éyoñe bi nji bi metiñe ma kate bia jame bia yiane bo. (1 Cor. 2:14-16) Melame méziñe me ne ti’ibi ya yen, mevo’o ki ayaé ya yen.

10. Mam mevé bia yiane sa’ale?

¹⁰ Bia yiane sa’ale melame méziñ aval ane fulu ya vañe bo befam a binga ayas, mbia nyuane meyok, ôngase, bibole minkobô, ñyenane befilm ba liti évô, ñyenane binga a befam minsoé bingeñgeñ, a mam mefe ma funane malé. (Bsa. 101:3) Nsiñe wongane Diable, a jeñ éyoñ ése na a bi fane ya ndaman élate jangan a Yéhôva. (1 P. 5:8) Nge bi bo teke tabe ntyel, Satan a ne mias mbia mefese minleme miangan été ane miñyamete, mvôl, mebun, ziñ, a ôviti’i ziñ. (Gal. 5:19-21) Atata’a, nkômban ôte ô ne bo teke bo ngul. Ve nge bi bo teke titane wô été été, wo ye ke ôsu a yaé aval ane élo’o é bili nsul a wé telé bia mbia été.​—Jacq. 1:14, 15.

11. Ôlam ôvé ô solô bia yiane sa’ale, a amu jé bia yiane de bo?

¹¹ Ôlame wua ô ne teke ji’a yené bia yiane sa’ale ô ne mbia mewoso. Tame ve’ele fase jame di. Wo saé a môt éziñ a nji bo Ngaa Yéhôva. Nkômbane wôé ô ne na ntabane wôé ô bo na môt ate a yeme na Bengaa be Yéhôva be ne mbamba be bôt, ajô te wo jeñe na ô bo mbamba nlem a mvam. Ô ne kañese na ô bo ô kele’e di a môt ate biyoñe biziñ. Mvuse ya valé, ô taté na wo bo de mban. Biyoñe biziñe môt ate a kobô ajô mvine mame ya bisôk éyoñe mia nye mi ne nsamba, atata’a wo bo ve ane ô nji wôk. Ane éyoñe ja lôt, ô nga mane yemban a avale minkobô mite. Éyoñ éte môt ate a bañete wo môs éziñe na mi ke nyu mon élaé éyoñ ésaé é maneya, ô kañese. Asu’ulane ya été, ô nga taté na wo yene mam ane nye. Ye wo simesane na dé sili ayab éyoñ asu na ô taté na wo bo mam ane môt ate? É ne été na bi ne mbamba nlem a bia semé bôte bese, ve bia yiane yeme na bi ne taté na bia vu bôte bia be be bia wulu nsamba. (1 Cor. 15:33) Nge bia ba’ale biabebien avale Yésus a nga jô, bii kui na bi sa’ale mbia mewoso a bôte ba semé ki memvinda me Yéhôva binyiñe biap. (2 Cor. 6:15) Nalé é volô fe na bi yeme yen ôlam Satan a sa’ale wô.

YEME’E BELAN ÉYOÑE JÔÉ

12. Jé beyé’é be Yésus be mbe be yiane bo nté be mbe be yange’e na be zu tyame Jérusalem a temple wé?

¹² Beyé’é be Yésus be nji be be yiane tabe mo me ba’a be yange’e na be zu tyame Jérusalem a temple wé. Yésus a nga ve be ésaé ya bo. A nga jô be na be kañete mbamba foé “e Jérusalem, e Judée ase a Samarie a mfa’a si ja dañ ôyap.” (Mame mi. 1:6-8) Beta ésaé fo’o Yésus a nga ve be! Éyoñe ba ve ngule ya kañete bôte bevok, ba belan éyoñe jap avale da yian.

13. Amu jé bia yiane yeme belan éyoñe jangan? (Becolossien 4:5)

¹³ Lañe’e Becolossien 4:5. Bia tabe ntyel a biabebien éyoñe bia tu’a fas avale bia belan éyoñe jangan, amu “éyoñ a ndôba’ane” bi ne kui be môt ase ya be bia. (Eccl. 9:11) Awu é ne bi bia atemetem.

14-15. Aval avé bi ne yeme belan éyoñe jangan? (Behébreu 6:11, 12) (Fombô’ô fe fôtô.)

¹⁴ Bi ne yeme belan éyoñe jangan éyoñe bia bo nkômbane Yéhôva a yemete élate jangan a nye. (Jean 14:21) Bia yiane ‘tebe ne bip, teke feñelan, bi bi kom ése abui ésaé ya bo be Tate.’ (1 Cor. 15:58) Bi nji yi na éyoñ asu’ulane dé kui, a ne bo asu’ulane ya mbia nta’ane mame nyi, nge ke memane ya ényiñe jangan, bi taté na bia jôban.​—Matt. 24:13; Rom. 14:8.

¹⁵ Melu ma, Yésus a ke ôsu a tebele beyé’é bé nté ba kañete mbamba foé ya Éjôé Zambe si se. A tôé ngaka’a a nga bo be. A zene ya ékôane Yéhôva, Yésus a yañele bia ésaé nkañete, a ve fe bia bikpwelé bia sili asu na bi kañete mbamba foé. (Matt. 28:18-20) Bia liti na bia bo abime dangan éyoñe bi ne ayôñ ésaé nkañete a ésaé ya bo bôte beyé’é, a éyoñe bia mombô nté bia yange na Yéhôva a zu tyame mbia émo nyi. Éyoñe bia tôñe melebe bia koone me kalate Behébreu 6:11, 12, bia ye bi ndi nleme jangan a mo mebaé “akekui asu’ulan.”​—Lañek.

16. Bia yiane nyoñe ntyi’ane ya bo jé?

¹⁶ Yéhôva a maneya tyi’i môs a awolo a ye tyame mbia émo Satan nyi. Éyoñe môs ôte wé kui, Yéhôva é tôé minkulane mejô mié mise mi ne Kalate mejô mise a nga bo a lat a mfefé émo. Biyoñe biziñe bi ne simesane na môse Yéhôva wo langan. Ve bia yiane ba’ale ôsimesane na môs Yéhôva “wo ye ke bem!” (Habak. 2:3) Ajô te bia yiane nyoñe ntyi’ane ya ke ôsu a ‘fombô ve Yéhôva’, nalé a ye liti na bia “yange Zambe ya ñyiane [wongan].”​—Mich. 7:7.