Kalate Paul a nga tili Beéphésien
4 Nde ñhe ma, mbô’ô Tate, ma ye’elane mia na mi wulu avale da yiane bôte be nga bi nloone mi nga looban, 2 a éjote nyul ése* a évôvoé a ôjibi, môt ase a jibi’i bikobe bi môte mbo’o nye’an été. 3 Mi kôme’e jeñ a ngul ése na mi ba’ale élate jenane ya mvo’é, nje éte nsisime Zambe ô nga volô mia na mi bi. 4 Nyul é ne jia, a nsisim ô ne wua, fo’o ve avale mi nga loobane ndi nleme jia; 5 Tate wua, mbunane wua, nduane wua; 6 Zambe wua a Ésa ya biôme bise, nnye ate a dañe biôme bise a zene ya biôme bise e biôme bise.
7 A beta mvam a nga vebane be môt ase ya be bia avale Krist a nga tyi’i na, a ve nye ane mvean ô ne zezé. 8 Amu é ne njôane na: “Éyoñ a nga bete bevôme be ne ôyabe yôp a nga kee minkôm; a nga ve bôt ane mimvean.” 9 Nde bifia “a nga bete” bia tinan aya? Na a nga taté sis e si. 10 Môt émien a nga sis, nnye fe a nga bete yôbe da dañ ôyabe yôp, ndemben a zene jé biôme bise bia ye kui na bi jaléban.
11 A nga telé bevo’o béziñ ane minlôman, bevok ane bekulu mejô, bevok ane bekañete mbamba foé, bevok ane beba’ale a beye’ele, 12 mfa’a ya sôane* mimfufup asu ésaé ya mvolan a lôñe nyule Krist, 13 akekui bia bese bia ye bo nleme wua mfa’a ya mbunan a mfa’a ya nya ñyemane ya yeme Mona Zambe a bo bitôtôlô bi bôt, akekui bia bo éyeka’a é ne njalane ja yiane môt a ne môte Krist. 14 Nde bi nji yiane bo ane bongô, amu nyu a tôñe bifu’u miñye’elane ya bôte ba du’u ba bevok a ye bo ane éfunga é ne mañ été, a mfebe a mintyôa mia kee nye li a li. 15 Ve nkoba’ané benya mejôô, bi yaé fe nye’an été mfa’a ya mame mese be nye, nnye ate a ne nlô, Krist. 16 Be nye nyul ése é ne mbamba nlatane nsamba a ja saé a zene ya binyi’a bise, mbie bite bia ve jôme ja sili. Éyoñ ébu’a ése ja bo ésaé jé nya mvo’é, nalé ate a bo na nyul é yaé a lôñebane nye’an été.
17 Jame di nde ñhe ma jô a bo’olô e Tate été na, mi vo’o ke ke ôsu a wulu ane bôte ya meyoñ, amu ba nyiñe fo’o ve avale zezé* asimesane dap é ne. 18 Asimesane dap é ne dibi été, be ne ôyap a ényiñ é ne be Zambe amu ndiman ô ne be be, amu minleme miap mi ne ayet.* 19 Be ne te yemelane miñye’elane ya mbamba ntaban, kom ése ba bo mvite mame teke wô’ô nyé nge ôson,* ba bo avale nyé mam ése teke kat.
20 Ve mi nji yé’é na Krist a ne nalé, 21 nya ajôô, mi nga wô’ô nye a nyoñe ñye’elan a zene ya be nye, amu benya mejôô be ne be Yésus. 22 Mi nga nyoñe ñye’elane na mi vaa nnôma môt, nnye a wô’an a abo dulu mi mbe mi bili melu mvus, nnye fe a ndaman a zene ya minkômbane medu’ane mié. 23 Nde fe, mia yiane ke ôsu a bo na ngule ja wulu mfasane wônan* é bo mfefé, 24 a na mia yiane jaé mfefé môt, ñwô ô nga téban avale nkômbane Zambe ô ne, nya zôsôô été a nya mbunane été.
25 Nde éyoñe mi vaaya medu’an, môt ase ya be mia a kobô’ô benya mejôô a môt a ne nye bebé, amu bi ne bibu’a bi tii, môt ase a tii a nyi mbok. 26 Wô’ané ôlun, ve te semané; te mia jô’é na nlô jôbô a ke dim nté mi ngenane mi wô’ô ôlun; 27 te veané Diable afôla.* 28 Môt a wup a bo’o te beta wup; ve a saé a ngule na a bo mbamba be mam a mo mé, ndemben a ne bi jôme ya ve môt a yi jôm éziñ. 29 Ébole nkobô é bo’o te kui menyu menan, ve mejô me ne mvaé mfa’a ya ve ngule nyul avale miñyiane mi ne, na bôte ba wô’ô me be yene mfi ya été. 30 Nde fe, te mia bo na mfufube nsisime Zambe a wôk abé,* nnye ate mi nga bi sitam asu môse ya nkôtan a zene ya ntañ.
31 Te mia ba’ale minleme mienan été aval ôviti’i ziñ ése, ôlun, ayaa, memvam a mbia nkobô a jôm ése é ne bo môte mintaé nlem. 32 Ve môt ase a bo’o mbamba nlem a nyu mbok, mi wô’an mintaé, môt ase a jamé’é nyu mbok a nlem ôse, fo’o ve avale fe Zambe a nga jamé mia a nlem ôse a zene ya be Krist.