Mbamba foé Luc a nga tili

6 A nga bo na, môse Sabbat, nté a mbe a lôte’e mefube mefes, ane beyé’é bé be nga kolé mefes a si’i me mo map été, a di me. 2 Ane bepharisien béziñe be nga jô na: “Amu jé mia bo jam atiñ é nji kañese na é bobane môse Sabbat?” 3 Ve Yésus a nga yalane be na: “Ye mia be tame lañe jame David a nga bo éyoñe ba be bôte bé be nga wô’ô zaé? 4 Ye a nji nyiine nda Zambe a nyoñe belet é mbe asu metuna’a* a di je a ve je bôte béziñe ba be nye be mbe nsamba, belet atiñ é nji kañese na môt éziñ a di je nge ô vaa ve beprêtre étam?” 5 Nde a nga jô be na: “Mona môt a ne Tate ya Sabbat.”

6 Môse sabbat ôfe, a nga nyiine synagogue a taté na a ye’ele bôt. Môt a mbe valé, nnye ate a mbe ñyemelane wo* ya mbo nnôm. 7 Bescribe a bepharisien be mbe be kôme’e fombô Yésus na be yene nge a ye saé môt ate môse Sabbat asu na, be yene zene ya ve nye bijô. 8 Ve Yésus a mbe a yeme’e jame be mbe be simesa’an, nde a nga jô môt a mbe a bili wo ô too ñyemelane* na: “Tebe’e tetele ô zu tebe zañe nda.” Ane a nga tebe tetele valé. 9 Nde Yésus a nga jô be na: “A bôt, ma sili mia na, ye atiñe da kañese na môse Sabbat môt a bo mbamba jame nge mbia jam, a nyii môte* nge wôé môt?” 10 Éyoñ a maneya fombô bôte bese be mbe be bôma’ane nye, ane a nga jô môt ate na: “Same’e wo wôé.” Ane a nga bo nalé, a wo wé ô nga beta bo mvo’é. 11 Ve jam éte é nga bo na be wô’ô mbia ôlun, ane be nga taté na ba fase jame be ne bo Yésus.

12 Môs éziñ a nga kui atane na a ke nkôl, na a ke ye’elan, ane a nga lôte ngumba alu wôé a ye’elane Zambe. 13 Éyoñe tyé é nga lendé, a nga loone beyé’é bé a top 12 ya bebe, a loone be na minlôman: 14 Simon, nnye fe be mbe be loone na Pierre, André monyañe wé, Jacques, Jean, Philippe, Barthélémy, 15 Matthieu, Thomas, Jacques mon Alphée, Simon nnye fe ba loone na, “môt a bo mam a nleme wé ôse,” 16 Judas mone Jacques, a Judas Iscariote nnye a nga bo môt a koñe bôte bevok.

17 Ane a nga siliki a be, a ke tebe vôme si é mbe nje’ese. Beta nsamba beyé’é a mbe valé a beta nsamba bôt. Be mbe be so’o Judée a Jérusalem a minlame mise mia bômane Tyr a Sidon. Be nga zu vô’ôlô nye, a saéban akone dap ése. 18 To’o bôte mbia minsisime mi mbe mi ndeñele’e be nga bo mvo’é. 19 A nsamba bôt ôse ô mbe ô jeñe’e na ô nambe nye, amu ngul é mbe é so’o be nye é nga saé bese.

20 Ane a nga fombô vôme beyé’é bé be mbe a jô na:

“Mevak a mia mia yeme na, mi bili miñyiane ya nsisim, amu Éjôé Zambe é ne énjenan.

21 “Mevak a mia mia wô’ô zaé éyoñe ji, amu mia ye jaé.

“Mevak a mia mia yôn éyoñe ji amu mia ye woé.

22 “Mevak a mia éyoñ ése bôte ba vini mia, éyoñe ba titane mia a éyoñe ba komekane mia, a éyoñe ba ndamane biyôlé bienan* amu jôé Mona môt. 23 Éyoñe nalé a kui, va’an a wô’ô nya mvaé, amu tama yenan! Ma’ane menane me ne abui yôp été; mi yeme’e na, avale te nde fe be nga tibili bekulu mejô be mbe mia ôsu.

24 “Ve éngôngol a mia minkukum, amu mi maneya nyoñe mvolane minleme wo yiane mia.

25 “Éngôngol a mia mia di a jaé éyoñe ji amu mia ye wô’ô zaé.

“Éngôngol a mia mia woé éyoñe ji, amu mia ye wôk ôlun abui a yôn.

26 “Éngôngol a mia éyoñe bôte bese ba jô mbamba be mame mfa’a wônan, amu nne fe bemvamba bap be mbe be jô’ô bivuse bekulu mejô nalé.

27 “Ve ma jô mia mia vô’ôlô ma na: Kelané ôsu a nye’e besiñe benan, a bo bôte ba vini mia mvaé. 28 Sila’ané Zambe na, a botane bôte ba yi na mbia be mame be kui be mia, a ye’elan asu bôte ba ta mia. 29 Nyu a bibi wo abaé amañ, liti’i fe nye da vok; a nyu a nyoñe wo éyé jôé ya yôp, va’a fe nye éyé jôé ya si. 30 Môt ase a sili wo jôm, va’a nye je, a nge môt a nyoñe biôme biôé, te beta sili nye bie.

31 “Nde fe, avale mia yi na bôte be bo mia, mia fe bo’ané nalé asu dap.

32 “Nge mia nye’e ve bôte ba nye’e mia, mese’esa mevé mia yiane me? Amu to’o bebo minseme ba nye’e bôte ba nye’e be. 33 A nge mia bo mbamba be mame ve bôte ba bo mia mbamba be mam, ôlu’u ôvé mia yiane wô? To’o bebo minseme ba bo avale da. 34 Nde fe nge mia kôlé* ve bôte mia yeme na ba ye bulane mia, ôlu’u ôvé mia yiane wô? To’o bebo minseme ba kôlé bebo minseme bevok, amu ba yeme na ba ye bulane be abim ése ba te kôlé be. 35 Ve kelané ôsu a nye’e besiñe benan, a bo be mbamba be mam, a kôlé be teke yange na be bulane mia, a ma’ane menane ma ye ñhe bo anen, a mia ye bo bone be nyu a ne Ôyabe yôp, amu a ne mbamba nleme mfa’a ya bôte be ne bikalak a mbia be bôt. 36 Kelané ôsu a ko bôt éngôngol avale fe Ésa wônan a ko bôt éngôngol.

37 “Nalé fe, te mia beta tyi’i bôte mejô, ndembene ba ye bo te tyi’i mia mejô; te mia beta ve bôte mekua ndembene ba ye bo te ve mia mekua. Kelané ôsu a jamé,* ndembene ba ye jamé mia.* 38 Biané fulu ya ve, ndembene bôte ba ye ve mia, ba ye sôé jôm é ne mbamba mve’an ényi’a ya éyé jenan été, é too njinan, nse’esan akekui ja fuluku, amu ôve’e mia belane wô na mi ve’e biôme ñwô fe ba ye belane wô asu denan.”

39 Nde a nga ve fe be éve’ane ji: “Ndindim ô vo’o liti ndindim ôvo’o zene nga? Bese bebaane ba ye fo’o ku ébé été, sa nalé? 40 Mongô sikôlô* a vo’o dañe ñye’ele wé, ve môt ase be nga ye’ele nya ñye’elane a ye bo ane ñye’ele wé. 41 Nde amu jé wo fombô mon ékum élok a ne monyoñe dis été, a too ke na beta akôn a ne womiene dis été? 42 Aval avé ô ne jô monyoñe na, ‘A mojañ, za’a me vaa wo mon ékum élok a ne wo dis été, a too ke na beta akôn a ne womiene dis été?’ A môta medu’an! Taté’é vaa beta akôn a ne womiene dis été, nde ñhe wo ye kôme yen aval ô ne vaa mon ékum élok a ne monyoñe dis été.

43 “Amu mbamba élé a vo’o wum ébuma é ne ébol, aval éte fe élé é ne ébol é vo’o wume mbamba ébuma. 44 Ba yemelan élé ése a bibuma bié. Éve’an é ne na, bôte ba kolé ki bibuma ya élé figuier e minsini’i été, nde fe be ne teke kolé bibuma bia ve woone mon élé a be’e biyo. 45 Mbamba môt a kuli mbamba be mame ba so nye nlem été, ve mbia môt a kuli mbia be mame be ne nye nlem été, amu mame me ne njalane nlem été mme ñhe ma kui anyu dé.

46 “Nde, amu jé mia loone ma na, ‘A Tate! A Tate!’ ve mi teke bo mame ma jô? 47 Môt ase a zu be ma a wô’ô mejô mam a bo mame ma jô, ma ye liti mia za a funane nye: 48 A funane môt a nga bo na, asu na a lôñe nda, a taté fak édok ébé, a bo mbôka’a beta ako’o yôp. Nde, éyoñe ndône mendim é nga kui, mendime ya ôsôé me nga zu jimbi nda, ve mendime mete me nji be ngul abui na me tyame je; amu nda éte é mbe mbamba nlôñan. 49 Ve môt a wô’ô mejô mam a teke bo ane ma jô, a funane môt a nga lôñe nda nsele’e yôbe teke mbôka’a. Mendime ya ôsôé me nga zu jimbi je, été été é kpwelé, ane nda éte é nga mane tyamé mbia ntyaman.”