Mbamba foé Marc a nga tili

7 Ane bepharisien a bescribe béziñe be so’o Jérusalem be nga zu koone nye. 2 A be nga yene beyé’é bé béziñe be ja’a teke sôbe mo, nalé a tinane na, be teke sôbe mo avale metume me mbe me jô’ôk. 3 (Bepharisien a bejuif bese ba yeme na, môt a yiane sôbe mo akekui ékuteboñ, ôsusua na a di mfa’a ya na be ke ôsu a tôñe metume me bôte ya melu mvus. 4 Nde fe na, éyoñe ba so makit, be vo’o di teke taté woban. Be mbe be bili abui metum afe be nga ye’ele be, a be ngenane be kele’e ôsu a tôñe me aval ane mbaptizô bilaé, mbaptizô mendek, a mbaptizô bisua bi mvot.) 5 Nde bepharisien a bescribe be nga sili nye na: “Amu jé beyé’é bôé be ne teke tôñe metume me bôte ya melu mvus, ve ba di teke sôbe mo?” 6 A nga jô be na: “A bôte medu’an, nkulu mejô Ésaïe a nga bele éyoñ a nga kobô ajô denan a jô’ô na, ‘Bôte ba, ba jô ve anyu anyu na, ba kañe ma, ve minleme miap mi ne ma ôyap. 7 Ba ke ôsu a kañe ma zezé, amu ba ve bôte miñye’elane mi bôte binam. 8 Mia bele li’i metiñe me Zambe a tôñe metume me bôt.”

9 A nga jô be na: “A atyeñ ése, mia kôme jeñe mezene ya bene tôñe metiñe me Zambe asu ya na mi tôñe metume menan. 10 Éve’an é ne na, Moïse a nga jô na, ‘Semé’é ésa wôé ba nyia wôé a na, ‘Môt ase a kobô ésa wé nge nyia wé ébiasé a yian awu.’ 11 Ve mi mia jô na, ‘Nge môt a jô ésa wé nge nyia wé na: “Jôm ése me bili, wo too ve bu’ubane je é ne corban (nalé a tinane na, me ka’aya je Zambe.)”’ 12 Éyoñe mia jô nalé mia bo na môt a bo teke beta bo nyia nge ésa jôm éziñ. 13 A zen éte mia bo na bôte be biasé mejô me Zambe, amu metume menane mi nga ve bôt.” 14 Ane a nga beta loone nsamba bôt a jô wô na: “Mia bese vô’ôlané ma, a wôk atinane ya mejô mam. 15 Sa ke jôme ja nyiine be môte nje é ne bo na a bo mvit; ve biôme bia kui be môte mbie bia bo na a bo mvit.” 16 *——

17 Éyoñ a nga li’i nsamba bôte nseñ a nyiine nda été, ane beyé’é bé be nga jô nye na a kate be atinane ya éve’an. 18 Nde a nga jô be na: “Ye mia fe mia kate wô’ô jame ma jô ane be? Ye mi nji yeme na, sa ke jôme ja so atane ja nyiine be môte nje ja bo na a bo mvit, 19 amu éyoñe ja nyiin, ja ke ki nleme wé été, ve ja ke nye ôsañ a su’ulane ke éduk.” Nde a nga jô na bidi bise bi ne mfuban. 20 A nga beta jô na: “Jôme ja kui be môte nje ja bo na a bo mvit. 21 Amu na, minleme mi bôt été mmie mbia be asimesane ba so: mvite mame ya bisôk,* wup, mewôé me bôt, 22 mejian, minyamete, mbia be mam, medu’an, mvite mame teke wô’ô nyé nge ôson,* mekômba’a, mbia nkobô, mebun a mbia mboon ase. 23 Mbia be mame bete bese ba so môte nlem été a mbe ba ve môte mvit.”

24 A nga kôlô valé a ke nlame Tyr a Sidon. Éyoñ a keya kui wôé, ane a nga nyiine nda été. A nji be a yi na bôte be yeme de, ve a nji be ve sobô. 25 Été été, minga ngo jé é mbe é bili mbia nsisim, a nga wô’ô be kobô’ô ajô dé, a nga so a ku nye mebo. 26 Bemvamba be minga ate be mbe begrec, ve a nga bialé Phénicie, a nga ye’elane nye biyoñe biyoñe na a vaa mbia nsisim a mbe be ngo jé. 27 Ve a nga jô nye na: “Jô’é bongô be taté di a jaé, amu é nji bo mvo’é ya ve bone bemvu bidi* bongô ba yiane di.” 28 Ve a nga yalane nye na: “Wo bele fo’o a Tate, ve bone bemvu be wô’ô di menyume bidi ma ku tebele si éyoñe bongô ba di.” 29 A nga jô nye na: “Amu wo te jô nalé, kelek, mbia nsisim a kôlôya be ngo jôé.” 30 Nde, éyoñ a nga bulane nda jé a nga ke koone ngo jé é bôô énoñ, mbia nsisim a kôlôya be nye.

31 Éyoñe Yésus a nga kôlô ngoto ya Tyr, a nga lôte Sidon, mvuse ya valé a nga bulane na a ke mfa’a ya mañe ya Galilée a lôte Décapole.* 32 E wôé be nga soo fe nye môt a too ndôndok, a kate fe kobô, ane be nga ye’elane Yésus na a beté nye mo nyul. 33 A nga kee nye fefel, vôme nsamba bôt ô nji be, a futi anyui dé melo me môt, éyoñ a maneya tui menden, ane a nga nambe fe ôyeme wé. 34 Mvuse ya valé a nga bete mis e yôp été, a vebe ngul a jô nye na: “Effata,” nalé a tinane na, “Yombô’ô.” 35 Ane melo me môte me nga yombô, a nga bo ngule ya belan ôyeme wé a taté na a kobô ne sañesañ. 36 Ane a nga ve be atiñe na be bo te kate môt éziñe jam éte, ve éyoñ a nga dañe jô be nalé, be nga viane ke kate bôt abui jam éte. 37 Bôte bese be mbe fe’e ne vema a be nga jô na: “Jôm ése a bo é ne ve mvaé, a bo na to’o mindôndo’o mi wôk, a na mimvumvu’u mi kobô.”