Mbamba foé Matthieu a nga tili

10 A nga loone beyé’é 12 ékôan a ve be ngule ya vaa mbia minsisim, a saé aval akon ése a éyem ése.

2 Biyôlé minlôman 12 bi: Simon, nnye fe ba loone na, Pierre a André monyañe wé; Jacques mone Zébédée a Jean monyañe wé; 3 Philippe a Barthélémy; Thomas a Matthieu nyoñe toya; Jacques mon Alphée a Thaddée; 4 Simon môte ya Canaan;* a Judas Iscariote nyu a nga su’ulane koñe nye.

5 Yésus a nga lôme bôt 12 bete, a ve be mebendé ma: “Te mia ke be bôte ya meyoñ, nge nyiin e tison éziñe ya Samarie; 6 ve bo’ané mbane ya ke be mintômba ya Israël mi nga jañ. 7 Éyoñe mia ye ke, kañetané bôte na: ‘Éjôé ya yôp é ntoo bebé.’ 8 Mi saé minkôkon, mi wômôlô mimbim, mi saé minzezam, a vaa mbia minsisim. Mi nga nyoñ e zezé, mia fe va’ané e zezé. 9 Te mia futi gôlôt, nge argent, nge ke mvot e bikpwaé bienan été, 10 te mia nyoñ ékpwaé bidi asu dulu, nge biyé bibaé,* nge besilefase minkole befe, nge ke ntum, amu mbo ésaé a yiane bidi bié.

11 Tison ése nge ke nlam ôse mia ye nyiin, jeñané môt a tele été ja yiane na a kañese mia a foé mia kañete, taba’ané be nye, akekui mia ye kôlô valé. 12 Éyoñe mia ye nyiine nda été, mi taté batane bôte ya nda éte. 13 Nge ba kañese mia, mvo’é mia te jô je na é bo a be ja ye bo a be; ve nge ba bene kañese mia, mvo’é jenane ja ye bulane be mia. 14 Vôm ase mia ye nyiin, nge môt éziñ a bo te nyoñe mia, nge ke vô’ôlô foé mia kañete, éyoñe mia kôlô nda éte nge ke tison éte, sasané mbuluk ô ne mia mebo. 15 Ma kate fo’o mia na, jam é nga kui bitisone ya Sodome a Gomorrhe, da ye bo tyi’ibi ya jibi a dañe di da yange tison éte môse ntyi’ane mejô.

16 Tama yenan! Ma lôme mia ane mintômba ézezañe beta bemvu mefan; nde taba’ané nya ntyele ane benyo ve teke bijô ane bezum. 17 Mi tabe bôte ntyel, amu ba ye kee mia meba mejô,* ba ye fe bôme* mia besynagogue bap été. 18 Ba ye kee mia be bengovina, a be bejô bôt amu ma. Nalé a ye ve mia fane ya kañete be a kañete meyoñ ajô dam. 19 Ve éyoñe ba ye kee mia meba mejô, te mia tyelé minleme mienane yôp a sili na: ‘Jé bia ye jô?’ Nge na: ‘Bia ye kobô aya?’ Amu mia ye yeme jame mia ye jô awolo éte ébien; 20 amu sa ke mia étame mia kobô, mia ye kobô a ngul Ésa wônan. 21 Nde fe, môt a ye kee monyañe wé na be wôé nye, ésa a ye fe kee mone wé na be wôé nye, bone ba ye tebe bebiaé bap ngame yat a bo na be wôé be. 22 Bôte bese ba ye vini mia amu jôé dam, ve nyu a ye bo mbane ya jibi akekui asu’ulane nnye a ye nyiiban. 23 Éyoñe ba ye tibili mia tison éziñ, tubané a ke tisone fe, amu ma kate fo’o mia na, mia ye ke mane bômane bitisone bise ya Israël ôsusua na Mona môt a so.

24 Mongô sikôlô a nji dañe ñye’ele wé, ôlo fe ô nji dañe masa wé. 25 Da yiane fo’o na mongô sikôlô a bo ane ñye’ele wé, a ôlo ane masa wé. Nge bôte ba loone mie ndaa na Béelzéboub,* ngumane ki bôte ya nda jé? 26 Ajô te, te mia ko be woñ, amu teke jam éziñ é butu, nde da ye bo te kulan, teke jam éziñ é solô, nde bôte ba ye bo te yem. 27 Jame ma kate mia dibi si, kañetané de éfufup été, a jame mia wôk ôfôfoé, kañetané de mendile menda yôp. 28 Te mia ko bôte ba wôé nyule woñ, ve teke ngule ya ndaman ényiñ,* mia yiane ko môt a ne ngule ya wua nyul a ényiñ e Géhenne* été woñ. 29 Nga ba kuane bemvokuma bebaé tañe nsañe moné wua ô nji bo dia?* Ve teke wua a ku si Ésa wônan a teke yem. 30 Ja’a bisile bi ne mia minlô bi ne nlañan. 31 Nde, te mia ko woñ, mi ne dia a dañ abui bemvokuma.

32 Môt ase a jô bôt été na a yeme ma, ma fe ma ye jô ôsu Ésa wom a ne yôp été na ma yeme nye. 33 Ve môt ase a jô bôt été na, a nji yeme ma, ma fe ma ye jô ôsu Ésa wom a ne yôp été na, me nji yeme nye. 34 Te mia simesane na ma te soo mvo’é si va, me nji soo mvo’é, ma te soo nkpwaté mekôn. 35 Amu ma te soo nkanda’ane mengame zañe mona fame ba ésa wé, zañe mona minga ba nyia wé, a zañe mbome ba ntyi. 36 Ôwé, bôte ba siñe môte ba ye bo bibu’a ya nda bôte jé.* 37 Môt ase a kabetan ésa wé, nge nyia wé a dañe ma a nji yiane bo ñyé’é wom; a môt ase a kabetane mona fame wé, nge ke mona minga wé a dañe ma a nji yiane bo ñyé’é wom. 38 Môt ase fe a bene kañese élé mintaé* jé a tôñe ma a nji yiane bo ñyé’é wom. 39 Môt ase a jeñe na a kaman ényiñe* jé a ye sube je, a môt ase a sup ényiñe jé amu a ne ñyé’é wom a ye beta nyiñ.

40 Môt ase a nyoñe mia mvo’é a nyoñe fe ma mvo’é, a môt ase a nyoñe ma mvo’é a nyoñe fe Nyu a nga lôme ma mvo’é. 41 Môt ase a nyoñe nkulu mejô mvo’é amu a ne nkulu mejô, a ye bi ma’ane ma yiane nkulu mejô; a môt ase a nyoñe zôsôa môte mvo’é amu a ne zôsôa môt, a ye bi ma’ane ma yiane zôsôa môt. 42 Môt ase a ve wua ya bone be bôte ba fo’o ve élaé mendime ja vobô, amu a ne ñyé’é wom, ma kate fo’o mia na, a ye ke sube ma’ane mé.”