Kalate ôsu Paul a nga tili Becorinthien

6 Ye môt éziñe ya be mia a bili ajô a nyu mbok, a bele kee de menda mejô bikotekote bi bôt, sa ke be mimfufup? 2 Nge ke na, ye mi nji yeme na mimfufube mia ye tyi’i si nyu mejô? A nge mia mia tyi’i si nyu mejô, ye mi nji bo ngule ya tyik ayôme mejô é nji bo mfi? 3 Ye mi nji yeme na bia ye tyi’i beéngele mejô? Nde, bia yiane bo ngule ya tyi’i mejô ya ényiñe ji. 4 A nge mi bili mejô ya ényiñe ji a na ma yiane tyi’iban, amu jé mia tobe na, e bôte bôte ya ékôane bekristene ba biasé, mbe be tyi’i mia mejô? 5 Ma kobô na mi wôk ôson. Ye mfefe’e môt ô ne ngule ya tyi’i mejô ézezañe bobenyañ, ô nji bo ézezañe jenan? 6 Monyañ a viane kee monyañe mbok aba mejô, ôsu be bôte be nji buni!

7 Nya ajôô, éyoñe môte wua a ke somane nyu mbok aba mejô, ke mia dutu ôsame be miabebien. Amu jé mia kate yebe bo mbane ya jibi ékotekot? Amu jé mi nji kômbô bo mbane ya jibi éyoñe ba nyoñe jôm é ne énjenan? 8 Ve mia, mia viane bo bobenyoñ abé a wôlé be biôm!

9 Nde, ye mi nji yeme na bôte be ne bikotekote ba ye ke nyoñeban Éjôé Zambe? Te mia du’uban. Bôte ba bo mvite mame ya bisôk,* bôte ba kañe bengulemelan, bebo mejian, befame ba jô’ôbô a befame bevok,* 10 miñwuwup, bôte be ne ôzañ akum, beso’o meyok, betaa bôt a mimvômvôle ba ye ke nyoñeban Éjôé Zambe. 11 A nne bôte béziñe ya be mia be mbe nalé. Ve mi nga mane bo mfuban; mi nga mane teléban étyi asu Zambe; mi nga bi mekabe na mi ne zôsô e jôé Tate Yésus Krist, a nsisime Zambe wongan.

12 Me ne ngule ya bo mame mese avale metiñe ma jô, ve sa ke mame mese mme me ne mfi. Me ne ngule* ya bo mame mese avale metiñe ma jô, ve ma ye ke kañese na jôm éziñ é jôé ma.* 13 Bidi bi ne asu ôsañ a ôsañ ô ne asu bidi, ve Zambe a ye bo na bese bebaane be bo momo. Nyul é nji bo asu mvite mame ya bisôk,* ve asu Tate, a Tate a ne asu nyul. 14 Ve Zambe a nga wômôlô Tate a a ye fe wômôlô bia miñwuan a zene ya ngule jé.

15 Ye mi nji yeme na menyule menane me ne bibu’a ya Krist? Nde, ye ma yiane vaa bibu’a bi nyule bi Krist a late bie a minga bijabô? Teké’é fo’o! 16 Ye mi nji yeme na, nyu ase a ke lateban a minga bijabô a ne nyule jia a nye? Amu Zambe a jô na, “bebaane ba ye bo nsône wua.” 17 Ve nyu a lateban a Tate a ne jôme jia a nye nsisim. 18 Tubané mvite mame ya bisôk!* Éyoñe môt a bo avale nsem éziñ, nsem ôte ô nji ndamane nyule jé, ve nyu a bili fulu ya bo mvite mame ya bisôk a ndamane nyule jé émien. 19 Ye mi nji yeme na, nyule jenan é ne temple mfufube nsisim a ne be mia, nnye ate a so be Zambe? Nde fe mi nji bo bemiene ya miabebien, 20 amu mi nga kuseban a tañ. A mezene mese, mia yiane belane menyule menane na mi ve Zambe duma.