Mame minlôman

7 Ve beta prêtre a nga sili na: “Ye mame ma me ne été.” 2 Étienne a nga yalane na: “A bôt, bobejañ a beésa vô’ôlané ma. Zambe ya étôtok a nga yené be mvamba wongan Abraham éyoñ a mbe Mésopotamie ôsusua na a ke tabe Harran, 3 a a nga jô nye na: ‘Kôlô’ô si jôé a li’i bivuvumane biôé ô ke si ma ye liti wo.’ 4 Abraham a nga kôlô si bechaldéen a ke tabe Harran. Éyoñ ésa wé a wuya, Zambe a nga kate nye na a kôlô si éte a zu tabe vôme nyi, vôme mi too éyoñe ji. 5 Ve éyoñ éte a nji ve nye élik éziñ e si éte, to’o ve afôla ya telé abo; ve a nga bo nye ngaka’a na, a ye ve nye si nyu ane ngabe jé a mvoñe bôte jé, akusa bo a mbe a ngenane te bi mon. 6 Nde fe, Zambe a nga kate nye na mvoñe bôte jé ja ye bo mintabe éza si, a na bôte ya wôé ba ye nyoñe be ane alo a tibili be, tañe mimbu 400. 7 Zambe a nga jô na, ‘Ayoñe ba ye saane de ane alo, ma ye ve de mekua, a mvuse mame mete, ba ye kôlô wôé a bo ma ésaé é ne étyi afôla di.’

8 “A nga ve fe nye élat ya ntyi’an atyel, ane a nga bo ésa Isaac a tyi’i nye atyele môse muamô, a Isaac a nga bo ésa Jacob, a Jacob ésa minlô ya menda me bôt* 12. 9 A minlô ya menda me bôte mi nga bo Joseph éviele, mi nga kuane nye be bôte ya Égypte. Ve Zambe a mbe a nye, 10 Zambe a nga ba’ale nye minju’u mise a nga tôbane mie, a nga ve nye fek, a bo na a yené mvaé mise me Pharaon, njô bôte ya Égypte. A Pharaon a nga telé nye ngovina ya Égypte a nda bôte jé ése. 11 Ve zaé é nga kui Égypte ése a Canaan ase, ôwé a mbe fo’o beta étibila’a, a bemvamba bangane be nji be be bili jôme ya di. 12 Ve Jacob a nga wô’ô na bidi bi* ne Égypte, nde a nga lôme bemvamba bangane wôé éyoñ ôsu. 13 Éyoñe baa be nga ke Égypte, Joseph a nga bo na bobenyañe be yeme nye, a Pharaon a nga yeme bôte ya nda bôte Joseph. 14 Nde Joseph a nga lôm ésa wé mbañete a bivuvumane bié bise na be zu Égypte, bese be mbe bôte* 75. 15 Jacob a nga ke Égypte, nne a nga wu wôé, bemvamba bangane fe be nga wu wôé. 16 Be nga nyoñe bivese biap a kee bie Shekèm a bôé bie soñ Abraham a nga kuse tañ abime moné éziñ, be bone be Hamor si ya Shekèm.

17 “Éyoñe ngaka’a Zambe a nga bo Abraham é mbe é nga zu tôéban, bone be Israël be nga bo nya abuii si ya Égypte, 18 akekui njô bôte mfe a nga tebe Égypte, nyuli ate a nji be a yeme’e Joseph. 19 Njô bôt ate a nga bôndé fe’e medu’ane mfa’a ya ayoñe bôte dangan, a ve be ékotekot atiñe na, be bo te nyoñe ngap a mintyene mi bone miap, na mi mane wu. 20 Éyoñ éte ébiene nje Moïse a nga bialé, a mbe étua abeñe mon.* A nga nyañe mebé nda ésa wé tañe ngon élal. 21 Ve éyoñe bebiaé bé be nga bo ntindane na be li’i nye, ngone Pharaon é nga nyoñe nye, a yale nye ane mone wé émien. 22 Nde be nga yale Moïse e fek ése ya Égypte été. A a mbe ngule mfa’a ya nkobô a mimboone mié.

23 “Éyoñ a nga kui mimbu 40, a nga tyi’i* na a ke jome bobenyañe bé, bone ya ayoñ Israël. 24 Éyoñ a nga yene be bo’o môt wua ya be be jam é ne ékotekot teke étom, a nga kamane nye a kune nyu be nga tibili a wôé môte ya Égypte. 25 A mbe a buni’i na bobenyañe bé ba ye yeme na Zambe a zu kôté be a zene jé, ve be nji yeme nalé. 26 E môs ô nga tôé, a nga suan éyoñe bone be Israël bebaé be mbe be ju’an, éyoñ éte a nga vañe be a jô’ô na: ‘A bôt, mi ne bobenyañ, amu jé mia juan?’ 27 Ve nyu a mbe a bômô’ô monyañ a nga tindi Moïse a jô na: ‘Za a te wo telé ntebe ôsu a ntyi’i mejô wongan? 28 Ye wo kômbô fe ma wôé aval ô nga wôé môte ya Égypte angô’é?’ 29 Éyoñ a nga wô’ô de, Moïse a nga tup, a ke e si ya Madian, vôm a nga nyiñ ane ntabe a biaé bobefame bebaé.

30 “Éyoñe bebé mimbu 40 mi lôteya, éngele a nga yené be nye, nkôte si, Nkôle Sinaï, mon élé a be’e biyo a yôñe’e nduan. 31 Éyoñe Moïse a nga yen étua jam éte, a mbe fe’e ne vema. Nté a mbe a subu’u bebé na, a tua yene jame da boban a nga wô’ô tyiñe Yéhôva* é jô’ô na: 32 ‘Me ne Zambe bemvamba bôé, Zambe Abraham a Isaac a Jacob.’ Ane Moïse a nga taté na a nyeñeban, a nji beta bi ngule ya fase jame da lôt. 33 Yéhôva* a nga jô nye na: ‘Va’a besilefase minkole bôé, amu e vôm ô tele le a ne vôm a ne étyi. 34 Amu me yeneya fo’o étibila’a ayoñe dame da tôbane je Égypte, me wô’ôya ntate wop, a ma te sise mfa’a ya zu kôté be. Nde za’ak, ma ye lôme wo ô ke Égypte.’ 35 Moïse ate nnye be nga ben be jô’ô na: ‘Za a nga telé wo ntebe ôsu a ntyi’i mejô?’ Nnye Zambe a nga lôm ane ntebe ôsu a nkôté, a zene ya be éngele a nga yené be nye, e mon élé a mbe a bili biyo a mbe a yôñe’e nduan. 36 Môt ate a nga vaa be Égypte, a bo’o bitua bi mam a mesimba Égypte, Évele mañ a nkôte si tañe mimbu 40.

37 “A ne Moïse ate nnye a nga jô bone be Israël na: ‘Zambe a ye telé môte wua ya be mia nkulu mejô ane ma.’ 38 A ne nnye a nga so ékôane bekristen été nkôte si a éngele a nga kobô nye Nkôle Sinaï, a nga kobô fe a bemvamba bangan, a a nga nyoñe fe mimfufube minjôane na a ve bia mie. 39 Bemvamba bangane be nga bene nye bo mewôk, ve be nga tindi nye fefel, be nga bulan Égypte minleme miap été, 40 be nga jô Aaron na: ‘Bo’o bia bezambe ba ye wulu bia ôsu. Amu bi nji yeme jam é kuiya Moïse nyi, nyi a nga vaa bia Égypte.’ 41 Nde melu mete be nga mé mon ényaka a ve ngulemelan éte mimvean, éyoñe te be nga bo abôk, mfa’a ya vak a jôme be nga méé a mo map. 42 Nde Zambe a nga lume be mvus a jô’é na be bo ateté ya yôp ésaé é ne étyi, aval ane é ne ntilane kalate bekulu mejô na: ‘Sa ke ma ayoñ Israël, nnye mi nga bo metuna’a tañe mimbu 40 mi nga lôte nkôte si. 43 Ve a mbe nda éndelé Molok a ôteté ya zambe Réphân mbie mi nga be’e bive’ela mi nga kôme na mia kañ, ajô te nde ma ye kee mia minkôme Babylone.’

44 “Bemvamba bangan, be mbe be bili nda éndelé é mbe é bo’olô na Zambe a ne a be nkôte si, fo’o ve avale Nyu a nga kobô a Moïse, a nga kate nye na a bo a tôñe’e éve’ela a nga liti nye. 45 A éyoñe be nyoñeya nda éndelé éte, bemvamba bangan a Josué be nga nyiñili je si meyoñe Zambe a nga titan ôsu bemvamba bangan. É nga tabe valé akekui melu me David. 46 Nnye ate a nga yené mvaé mise me Zambe a a nga sili nge a ne bi mvome ya lôñe Zambe Jacob nda. 47 Ve Salomon nnye a nga lôñe nye nda. 48 Ve jame da, Nyu a dañe mbetane yôp, a vo’o tabe menda me ne nlôñan a mo, fo’o ve avale nkulu mejô a nga jô na: 49 ‘Yôp é ne éto njôane jam, a si é ne ételé mebo jam. Avale nda avé mia ye lôñe ma? Nalé Yéhôva* a jô. Nge ke nne mia ye lôñe ma nda ya wo’one vé? 50 Nga wo wom ñwô ô nga kôme biôme bite bise?’

51 “A bôte be ne minlem ayet a teke ntyi’an atyele minlem a bôte be ne melo, mia ke ôsu a wosan a mfufube nsisim, fo’o ve avale bemvamba benane be nga bo. 52 Nkulu mejô mbé bemvamba benane be nji tibili? Ôwé, be nga wôé ba be nga kat ôsusua na nyu a ne zôsô a ye so, ajô te mia bese mi nga bo bekoñe bôt a bewôé bôt, 53 mia Zambe a nga ve Metiñe me Moïse a zene ya beéngele, ve mi nji ba’ale me.”

54 Éyoñe be nga wô’ô mame mete ane be nga wô’ô mbia ôlune minleme* miap été, ane be nga taté na ba latane mesoñ, be fombô’ô nye. 55 Ve Étienne, njalan a mfufube nsisim a nga bete mis a fombô yôp, ane a nga yen étôto’o Zambe, a Yésus a tele mbo nnôme Zambe, 56 ane a nga jô na: “Tama yenan! Me lôô yôp é yoo a Mona môt a tele mbo nnôme Zambe.” 57 Ane be nga yôtane yôp été a buti melo a mo, a bese be nga kubu nye nyul avôl avôl. 58 Éyoñe be nga ke ba sô’ôlô nye tison atan, be nga taté na ba lume nye mekok, ba be nga bo’olô nye ajô, be nga bôé biyé biap ya yôbe mebo me mone ndôman ba loone na Saul. 59 Nté be mbe be lumu’u nye mekok, Étienne a nga ye’elan a jô’ô na: “A Tate Yésus, nyoñe’e ényiñe jam.”* 60 Ane a nga kute meboñ a yôtane yôp été a jô’ô na: “A Yéhôva,* te lañe be nseme wu.” Éyoñ a maneya jô nalé, ane a nga wu.