Mbamba foé Luc a nga tili

13 Melu mete, bôte béziñe be mbe valé be nga zu kate nye ajô ya bôte ya Galilée, Pilate a nga fulane metyi map a ma ya metuna’a map. 2 A nga yalane be na: “Ye mia simesane na, bôte ya Galilée ba be nga dañe bo minsem a lôte bôte bevo’o bese ya Galilée amu jam éte é nga kui be? 3 Momo, ma kate mia na, nge mia bo te kôñelane minlem, mia bese mia ye wu ane be. 4 Nge ke na, nkum ô nga ku bôt 18 ya Siloam e yôp, be mane wu, ye mia simesane na, be mbe be dañe be’e ayem a lôte bôte bevo’o bese ba nyiñe Jérusalem? 5 Momo, ma kate mia na, nge mia bo te kôñelane minlem, mia bese mia ye wu ane be.”

6 Ane a nga ve be éve’ane ji: “Môt éziñ a mbe a bili élé figuier afube mindi’i dé, ane a nga ke na a ke jeñe bibuma ya été, ve teke koone ve ji jia. 7 Nde a nga jô môt a saé afube mindi’i na, ‘Den a ntoo mimbu milale ma zu jeñe bibuma ya élé figuier ji, ve teke yene jôm. Baké’é élé éte! Amu jé ja yiane di si e zezé?’ 8 Ane a nga yalane nye na, ‘A masa, ntame beta jô’é je mbu wua, ma ye fa’a si mbôma’ane a élé éte, a futi mebi me tite na si é bo atek. 9 Nge é wumu bibuma melu ma zu nalé a ne mvo’é, ve nge é bo te wum, baké’é je.’”

10 A mbe a ye’ele’e synagogue éziñ été môse Sabbat. 11 A nga bo na, minga éziñ a mbe valé, a mbe a bili mbia nsisim* a bo na nyul é bo nye nte’ane tañe mimbu 18; a mbe a wulu’u kukuu, a too teke fo’o ngule ya nyokan. 12 Éyoñ a nga yene nye, Yésus a nga jô nye na: “A minga, ô yeteya ôkone wo kon.” 13 Ane a nga beté nye mo, a été été a nga nyokan a taté na a ve Zambe duma. 14 Ve kaso ya synagogue a nga wôk ôlun amu Yésus a nga saé minga ate môse Sabbat; nde a nga jô nsamba bôte na: “Mi bili melu mesamane na mi bo ésaé, za’ané sabane melu mete sa ke môse Sabbat.” 15 Ve Tate a nga yalane nye na: “A bôte medu’an, za ya be mia, môse Sabbat, a ne bo te tiine nnôme nya’a wé, nge ke éjakas jé abemba na a kee je vôm a ne ngule ya ve je mendime ya nyu? 16 Ye minga a ne ngon Abraham nyi, nnye ate Satan a nga bo na a kone mimbu 18, a nji yiane sabane môse Sabbat?” 17 Éyoñ a nga mane jô mame mete, besiñe bé bese be nga taté na ba wôk ôson, ve nsamba bôt ôse ô nga taté na wo vak amu bitua bi mame bise a nga bo.

18 Nde a nga jô na: “Éjôé Zambe ja funane jé, a me ne ve’e je a jé? 19 É ne ane fese moutarde* môt a nga nyoñ a bé afube dé été, é nga yaé a bo élé, ane anone ya yôp é nga zu lôñe mumba’a mintyaé mié été.”

20 A nga beta jô na: “Me ne vek Éjôé Zambe a jé? 21 É ne ane mvusu minga a nga nyoñ a fulan a abui avut,* akekui avut ése é nga mane vus.”

22 A nga ke bitisone bitison a minlame minlam a ye’ele’e bôt, a kele’e fe dulu dé ôsu mfa’a ya Jérusalem. 23 Ane môt a nga jô nye na: “A Tate, bôte ba nyiiban, ye be ne tyôtyoé?” A nga jô be na: 24 “Ju’ané a ngule jenan ése na mi nyiine mbé ô ne ôfanefan, amu ma kate mia na, abui da ye jeñe na é nyiine ve da ye ke kui na é nyiin. 25 Nté mie ndaa a tebe tetele a ke fete mbé, nté ôte ôse mia ye bo mi tele nseñ, nde to’o mia kute mbé mi jô’ô na, ‘A Tate yo’é bia mbé.’ Ve a ye yalane mia na: ‘Me nji yeme mfa’a mia so.’ 26 Ane mia ye taté na mia jô na, ‘Bia be wo bi nga di a nyu a ô nga ye’ele beta minjoñe miangan.’ 27 Ve a ye jô mia na, ‘Me nji yeme vôme mia so. Kôla’ané ma valé, mia bôte bese mia bo mame me ne ékotekot!’ 28 Nne mia ye yône wôé a latane mesône menan, éyoñe mia ye yen Abraham, Isaac, a Jacob a bekulu mejô bese Éjôé Zambe été, ve mia mia ye wuaban atan. 29 Nde fe bôte ba ye so mfa’a ya est a mfa’a ya ouest a mfa’a ya nord a mfa’a ya sud, a ba ye tabe si tebele Éjôé Zambe été. 30 Tame yen! A ye bo na, bôte be tele mvuse ba ye su’ulane tebe ôsu, a bôte be tele ôsu ba ye su’ulane tebe mvus.”

31 Awolo éte ébien, bepharisien béziñe be nga so a jô nye na: “Kôlô’ô va ô ke amu Hérode a kômbô wôé wo.” 32 Ane a nga jô be na: “Kele’e katané mvak éte na, ‘A tame yen! Ma titane mbia minsisim a saé bôte den a akiti, a môse lale ma ye mane ésaé.’ 33 Ve ma yiane kee dulu dam ôsu den, akiti a môse wo tya’a valé, amu é nji bo zôsô na nkulu mejô a wu vôme mfe, a yiane wu fo’o ve Jérusalem. 34 A Jérusalem, Jérusalem, tisone ja wôé bekulu mejô a lume minlômane mi Zambe mekok, biyoñe tañ aya me nga kômbô tôkane bone bôé aval ane nyia kup a tôkane bone bé mefabe si, ve mi nga ben! 35 Tama yenan! Zambe a li’iya mia a nda jenan, ma kate mia na, a taté éyoñe ji, mia ye ke fe beta yene ma a zen éziñ, akekui éyoñe mia ye jô na: ‘Ébotan é bo’o be nyu a so a jôé Yéhôva!’”*