Mbamba foé Matthieu a nga tili
4 Ane Yésus a nga ke nkôte si amu nsisime Zambe ô nga tindi nye na a ke wôé, nde Diable a nga zu ve’ele nye. 2 A nga bo na, éyoñe Yésus a tyiya bidi tañe mimôse 40 a melu 40, nde a nga wô’ô zaé. 3 Nde Mve’ele bôt a nga zu koone nye, a jô nye na: “Nge ô ne mona Zambe, jô’ô meko’o ma na, me veñesane bifuse bi belet.”* 4 Ve a nga yalane na: “É ne ntilane na: ‘Môt a nji yiane nyiñ a belet étam, ve a mejô mese ma so anyu Yéhôva.’”*
5 Éyoñ éte Diable a nga kee nye tison é ne étyi, a telé nye vôm a dañ ôyabe yôp e Temple. 6 Ane a nga jô nye na: “Nge ô ne mona Zambe, womiene yô’ô a tebe si, amu é ne ntilane na: ‘A ye lôme beéngele bé, ba ye be’e wo mo map, na abo dôé é bo teke kômôtô akok.’” 7 Yésus a nga yalane nye na: “É ne fe ntilane na: ‘Ô nji yiane ve’ele Yéhôva* Zambe wôé.’”
8 Diable a nga beta kee nye nkôl ô ne étua ôyabe yôp, a liti nye bijôé bise ya si nyu a duma y’été. 9 Ane a nga jô nye na: “Ma ye ve wo biôme bina bise nge wo kute meboñe si a kañe ma fo’o ve éyoñe jia jia.” 10 Nde Yésus a nga jô nye na: “Kele’e wôé, a Satan! Amu é ne ntilane na: ‘A ne Yéhôva* Zambe wôé, nnye wo yiane kañ, a nnye étame wo yiane bo ésaé.’” 11 Éyoñ éte Diable a nga li’i nye, nde beéngele be nga so a saane nye.
12 Éyoñe Yésus a nga wô’ô na be biya Jean, nde a nga ke Galilée. 13 Mvus ôbe nté, Yésus a nga kôlô Nazareth, a ke tabe Capernaüm fefele mañ, ngoto ya Zabulon a Naphtali, 14 nalé a nga tôé ajô nkulu mejô Ésaïe a nga jô na: 15 “A wo, si ya Zabulon, a si ya Naphtali, mia bitisone bi ne éwome njoñe ya mañ, mfa’a ôvo’o ya Jourdain, mia mi ne Galilée ya meyoñ! 16 Bôte be too dibi été be nga yene beta éfufup; bôte ki be too bitison, vôme nsisiñe ya awu ô ne, éfufup é nga faé be be.” 17 Ataté éyoñ éte, Yésus a nga taté na a kañete bôt, a jô’ô na: “Kôñela’ané minlem, amu Éjôé ya yôp é ntoo bebé.”
18 A nga bo na, éyoñe Yésus a mbe a wulu’u mfôme mañe ya Galilée, nde a nga yene bobenyañe bebaé: Simon, nnye ba loone na Pierre, ba monyañe wé André be wu’a avote mañ été, amu be mbe beyobe kos. 19 Ane a nga jô be na: “Tôñané ma, ma ye bo mia beyobe bôt.” 20 Été été, be nga li’i mevote map a tôñe nye. 21 Mvuse ya valé, a nga yene bobenyañe befe bebaé: Jacques, mone Zébédée, ba monyañe wé Jean. Ba be Zébédée, ésa wop be mbe éfunga été, be kôme’e mevote map, ane a nga loone be. 22 Été été, be nga kôlô éfunga, a li’i ésa wop a tôñe nye.
23 Ane a nga ke ngoto ya Galilée ése, a ye’ele’e bôte besynagogue bap été, a kañete mbamba foé ya Éjôé, a saé bôte be bili aval akon ése a aval éyem ése. 24 Foé ya mam a mbe a bo’o é nga mane miasebane Syrie ase. Ane bôte be nga soo nye bôte be mbe be bili akon a mintaé mevale meval, ba mbia minsisime mi mbe mi jô’é be, ba be mbe be ku ésesé, a ba bibu’a ya nyule bi mbe ñyemelan. Ane a nga saé be bese. 25 Ane minsamba mi bôte mi nga tôñe nye. Bôte bete be mbe be so’o Galilée, Décapole,* Jérusalem, Judée, a minlame mi ne Jourdain yat.