Mbamba foé Matthieu a nga tili

7 “Te mia beta tyi’i bôte mejô, ndembene bôte be ne bo te tyi’i mia mejô. 2 Amu avale mia tyi’i bôte mejô, nne fe bôte ba ye tyi’i mia mejô nalé; a aval ôve’e mia belane wô na mi ve’e biôm, ñwô fe ba ye belane wô asu denan. 3 Nde, amu jé wo fombô mon ékum élok a ne monyoñe dis été, a too ke na, beta akôn a ne womiene dis été? 4 Nge ke na, aval avé ô ne jô monyoñe na: ‘Za’a me vaa wo mon ékum élok a ne wo dis été,’ a too ke na beta akôn a ne womiene dis été? 5 A môte medu’an, taté’é vaa beta akôn a ne womiene dis été, éyoñ éte wo ye kôme yen aval ô ne vaa ôyôme nkôt élok ô ne monyoñe dis été.

6 “Te mia ve bemvu biôme bi ne étyi, nge ve bengôé señ é ne édima, amu ba ye viane tibi bie a mebo a bulane zu lôbe mia.

7 “Kelané ôsu a ja’é, a ba ye ve mia; kelané ôsu a jeñ, a mia ye yen; kelané ôsu a kute mbé, a ba ye yoé mia wô. 8 Amu môt ase a ja’é nnye ba ye ve, môt ase a jeñe nnye a ye yen, môt ase ki a kute mbé nnye ba ye yoé wô. 9 Za ya be mia a ne viane ve mone wé akok, nge a sili nye jôme ya di? 10 Nge ke na, nge mone wé a sili nye kos, a viane ve nye nyo? 11 Nde fe, nge mia, akusa bo mi ne mbia be bôt, mia yeme ve bone benane mbamba be biôm, ke Ésa wônan a ne yôp a ye dañe ve bôte ba ja’é nye mbamba be biôm!

12 “Nde, mame mese mia yi na bôte be bo mia, mia fe mia yiane bo me bôt. Jame bia yé’é Metiñe me Moïse a mejô bekulu mejô, nde ñhe le.

13 “Nyi’ané mbé ô ne ôfanefan, amu mbé ô ne anen a zen é ne ndame bia kee bôte njañan, a abui bôte da ke zen éte. 14 Ve mbé ô ne ôfanefan a zen é ne tyôtyoé bia ke kee bôt ényiñ, a bôte ba yene zen éte be ne tyôtyoé.

15 “Taba’ané ntyel a bekulu mejô ya minsos, ba funane beta bemvu ya afan, ve mame ba bo a mejô ma kui be menyu, ma bo na mi buni na be ne éjote nyul a évôvoé ane mintômba. 16 Mia ye yeme za be ne a zene ya bibuma ba wum. Môt a vo’o koé bibuma bia ve woone mon élé a be’e biyo, nge ke koé ébuma ya élé figuier élok é be’e biyo, sa nalé? 17 Avale te fe, mbamba élé ase a wume mbamba bibuma, ve élé é ntoo ébole ja wume ve bibuma bi nji bo mfi. 18 Mbamba élé a vo’o wume bibuma bi nji bo mfi, avale te fe, élé é ne ébol é vo’o wume mbamba bibuma. 19 Ba ba’é élé ése é ne teke wume mbamba bibuma, a wua je nduan été. 20 Mia ye fo’o yeme za bôte bete be ne a zene ya bibuma ba wum.

21 “Sa ke môt ase a jô ma na: ‘A Tate, a Tate,’ nnye a ye nyiin Éjôé ya yôp, ve nyu a bo nkômban Ésa wom a ne yôp été, nnye étam a ye nyiin été. 22 Môs ôte, abui bôte da ye jô ma na: ‘A Tate, a Tate, nga bi nga kuli mejô a jôé dôé, a titane mbia minsisim a jôé dôé, a bo abui bitua bi mam* a jôé dôé?’ 23 Ve ma ye jô be na: ‘Me nji yeme mia! Kôla’ané ma valé, mia mi ne bôte ba bo mbia be mam!’

24 “Nde ñhe, môt ase a wô’ô mame ma jô a bo me, a ye bo ane mfefe’e môt ô nga lôñe nda jé beta ako’o yôp. 25 A beta mveñ a nga noñ, a ndône mendim é nga kui a beta évuñulu a nga vuñ, ane bi nga zu jimbi nda éte, ve é nji ke ku, amu é mbe é bili mbôka’a beta ako’o yôp. 26 Ve môt ase a wô’ô mame ma jô a teke me bo, a ne ane akute môt é nga ke lôñe nda jé nsele’e yôp. 27 A beta mveñ a nga noñ, a ndône mendim é nga kui, a beta évuñulu a nga vuñ, ane bi nga zu jimbi nda éte, ane nda é nga ku, a é mane tyamé mbia ntyaman.”

28 A nga bo na, éyoñe Yésus a nga mane jô mejô mete, minsamba mi bôte mi nga kam amu fatane ñye’elane jé, 29 amu a mbe a ye’ele’e mie ane môt a bili éjôé, a nji be a ye’ele’e mie ane bescribe bap.