Kalate Paul a nga tili Beromain

8 Ajô te bôte be ne jôme jia a Krist Yésus be ne teke mekua. 2 Amu atiñe ya nsisime da ve ényiñ a zene ya Krist Yésus é nga ve wo éto fili mfa’a ya atiñe ya nsem a awu. 3 Jame Metiñe me Moïse me nji be ngule ya bo amu me mbe nte’an amu minsôn. Zambe a nga bo de, éyoñ a nga lôme Mone wé a mbe a be’e nyul ane môta binam, ve teke nseme na a vaa nsem, a zen éte a nga ve nsem ô ne môta biname nyule mekua. 4 Ndembene bezôsô be mame ya Metiñe me Moïse be ne tôébane be bia bia wulu sa ke avale minsône mia jô, ve avale nsisime wo jô. 5 Amu bôte ba nyiñ avale minsône mia jô, ba bem asimesane dap mame ya minsôn, ve ba ba nyiñ avale nsisime wo jô, ba bem asimesane dap mame ya nsisim. 6 Amu e simesane mame ya minsôn a tinane na awu, ve e simesane mame ya nsisim a tinane na ényiñ a mvo’é; 7 amu e simesane mame ya minsôn a tinane na e bo nsiñe Zambe, amu minsône mi vo’o bo atiñe Zambe mewôk, a jam éte é se ngule ya boban. 8 Nde, bôte ba nyiñ ane minsône mia jô, be vo’o ve Zambe nleme mvaé.

9 Ve mia nyiñ avale nsisime wo jô, sa ke avale minsône mia jô nge nsisime Zambe ô kômeya fo’o éto be mia. Ve nge môt éziñ a nji bi nsisime Krist, môt ate a nji bo énwôé. 10 Ve nge Krist a ne a mia, nyul é ne ñwuan amu nsem, ve nsisim ô ne ényiñ amu zôsô. 11 Éyoñe ji, nge nsisime ya nyu a nga wômôlô Yésus miñwuan ô kômeya éto be mia, nyu a nga wômôlô Krist Yésus miñwuan a ye fe bo biwuwua menyule menane na bi beta nyiñ, a zene ya nsisime wé ô too be mia.

12 Nde a bobejañ, bi ne ntindane ya bo jôm éziñ, ve bi nji bo ntindane ya bo minkômbane ya menyule mangane mewôk; 13 amu nge mia nyiñ avale minsône mia jô, mia ye fo’o wu, ve nge mia wôé minkômbane ya minsôn a zene ya nsisim, mia ye fo’o nyiñ. 14 Amu ba bese ba wulu avale nsisime Zambe wo jô, be ne fo’o bone be Zambe. 15 Amu nsisime Zambe ô nji bo mia na mi bo alo a beta ko woñ, ve a zene ya nsisim ôte mia nyoñeban ane bon, a nsisim ôte wo bo na bi yôtane na: “Abba,* Tate!” 16 Nsisim ôbiene wo bo’olô a nsisime wongane na bi ne bone be Zambe. 17 Nde, nge bi ne bon, bia ye nyoñe jôm a kômbô ve bia. A ye ve bia jôme a ye ve Krist, vengevenge ve bia tôbane minjuk a nye, ndembene bi ne fe nyoñe duma a nye.

18 Amu ma simesane na minju’u bia tôbane mie éyoñe ji mi se jôm, éyoñe wo ve’e mie a beta ma’an a yange bia melu ma zu. 19 Amu biôme bise Zambe a nga té bi ne ôjeja’a ya yen éyoñe Zambe a ye liti na, bone bé be nyoñeya beta bema’ane bap. 20 Amu biôme bise Zambe a nga té bi nga tebe été ya momo, sa ke amu nkômbane wongan ôbien, ve a zene ya nyu a nga bo na biôme bite bi tebe été ya momo a mbôka’a ya ndi nlem. 21 Biôme bite bibiene bia ye fe tabe fili mfa’a ya éto belo ya nsem a awu, a bia ye fe nyoñe mbamba éto fili ya bone be Zambe. 22 Amu bia yeme na azukui éyoñe ji, biôme bise Zambe a nga té bia ke ôsu a tate nsamba a ju’u nsamba. 23 A sa ke ve nalé, ve biabebiene fe bi bili bembômô bibuma, mbe bete be ne nsisim. Ôwé, bia fe bia tate be biabebiene nté bia yange a nlem ôse na bi nyoñeban ane bon, na bi tabe fili mfa’a ya nyule jangan a zene ya ntañ. 24 Amu bi nga nyiibane bi bili ndi nlem éte, ve ndi nleme ja yené é nji beta bo ndi nlem, amu jôme môt a yen, ye a beta tabe je ndi? 25 Ve nge bi too ndi a jôme bi ne te yen, bia ke ôsu a yange je a nlem ôse a mbane ya jibi.

26 Avale te, mfufube nsisime fe a zu volô bia éyoñe bi ne nte’an. Bi ne yeme na bia yiane ye’elan, ve bi teke yeme jame bi ne sili. Nsisim ô ne volô ye’elane bia ajô ya mintate miangane ya nleme wongan été.* 27 Ve nyu a lañe minlem été a yeme jôme nsisime wo kômbô jô, amu a ne avale nkômbane Zambe ô ne na a volô ye’elan ajô ya mimfufup.

28 Bia yeme na Zambe a bo na biôme bise a nga té, bi saé nsamba asu mvo’é ya ba ba nye’e Zambe, bôt a nga loon avale nsôñane wé ô ne. 29 Amu ba a nga taté yem, a nga nyoñe ntyi’an ayap éyoñe na be bo éve’ela Mone wé, ndemben a ne bo ntôle Mone ya abui bobenyañ. 30 Nde fe, ba a nga top ayap éyoñ ôsusua, mbe fe a nga loon, a ba a nga loon, mbe fe be ne ba a nga ve mekabe na be ne zôsô. Mvuse ya été, ba a nga ve mekabe na be ne bezôsô, be ne fe ba a nga ve duma.

31 Nde jé bi ne jô mfa’a ya mame ma? Nge Zambe a ne a bia, za a ye tebe bia ngame yat? 32 Amu a nji kamane Mone wé émiene na a tôbane minjuk, ve a nga ve nye asu dangane bia bese, nge ô vaa na a veya bia nye, ye a ye bo fe te ve bia biôme bivo’o bise a mbamba nlem? 33 Za a ye bo’olô bôte Zambe a nga top ajô? Zambe nnye fo’o a ne Nyu a jô na be bili mekabe na be ne zôsô. 34 Za a ye ve be mekua? Krist Yésus a ne nyu a nga wu, ôwé, a dañe valé, a ne nyu a nga wômô miñwuan, nyu a ne mbo nnôme Zambe, a nyu a volô ye’elan asu dangan.

35 Jé ja ye kandé bia a nye’ane Krist? Ye étibila’a nge njuk, nge ékpwe’ele nge zaé nge soé nge angôndô nge nkpwaté mekôn? 36 Fo’o ve aval é ne ntilane na: “Amu ajô dôé bi nga wôébane ngumba nté môs; bi nga nyoñeban ane ntômba ba ke tyi’i tyiñ.” 37 Ve mfa’a ya mame mete mese, bia dañe me nya ndañane a zene ya nyu a nga nye’e bia. 38 Amu ma kôme fo’o yeme na sa ke awu nge ényiñ, sa ke beéngele, sa ke bijôé bi ne menen, sa ke mame ya éyoñe ji, sa ke mame ma ye boban, sa ke bôte be bili éjôé 39 sa ke ôyabe yôbô, sa ke édo’o si, sa ke ététéa éfe Zambe a nga té ja ye bo ngule ya kandé bia a nye’ane Zambe, nalé a tinane na be Krist Yésus, Tate wongan.