Mame minlôman

19 Akôlô ya valé, nté Apollos a mbe Corinthe, Paul a nga tyi’ilane minlame mi mbe ôyap a mañ a siliki Éphèse. Ane a nga yen abime beyé’é éziñe wôé 2 a a nga jô be na: “Ye mi nga nyoñe fo’o mfufube nsisim éyoñe mi nga bo bebuni?” Be nga yalane nye na: “Amu jé, bi nji tame wô’ô na mfufube nsisim a ne.” 3 Nde a nga sili be na: “Nde nduan ôvé mi nga nyoñ?” Be nga jô nye na: “Nduane Jean.” 4 Paul a nga jô na: “Nduane Jean a nga du bôt, ô mbe ndeme ya nkôñelane minlem, a jô’ô bôte na be buni nyu a zu mvuse jé, nnye ate a ne Yésus.” 5 Éyoñe be nga wô’ô nalé, be nga duban e jôé Tate Yésus. 6 A éyoñe Paul a nga beté be mo mé, mfufube nsisim a nga suane be be, a be nga taté na ba kobô éza minkobô a kate mefoé ma so be Zambe. 7 Befame bese be mbe valé be mbe bebé befam 12.

8 Tañe ngon élal, a mbe a kobô’ô teke ko woñe synagogue été, a bo’o minkañete, a liti’i be beamu ya buni Éjôé Zambe. 9 Ve bôte béziñe ya be be, be nga bo minleme miap ayet a be nji kômbô buni.* Be nga kobô Zen* abé bôt été, nde a nga kandan a be, a kee beyé’é a nye, a môs ôse a mbe a bo’o minkañete aba bikôane ya sikôlô Tyrannus. 10 Jam éte é nga tabe mimbu mibaé, aval é mbe na, bôte bese be mbe be nyiñi’i ngoto ya Asie, be nga wô’ô mejô me Tate, bejuif ane begrec.

11 A Zambe a nga ke ôsu a bo bitua bi mame bia toé bôte fe’e ne vema a zene ya mo me Paul, 12 aval é mbe na, to’o biyé* a biyé bisaé nyule jé é nga nambe, be nga be’e bie a kee bie vôme minkôkone mi mbe, ane akon é nga mane be be, a mbia minsisim mi nga kôlô be be. 13 Ve bejuif béziñe be mbe be kele’e bevôme bevôme na ba titane mbia minsisim, be fe be nga jeñe na be belan éyôlé Tate Yésus be bôte be mbe be bili mbia minsisim; be mbe be jô’ô na: “Éyôlé Yésus, Paul a kañete, ma jô mia na mi kui nseñ.” 14 Bôte be mbe be bo’o mame mete, bone be Séva zangbwal be mbe été, a mbe mone juif a too njôô beprêtre. 15 Ve mbia nsisim a nga yalane be na: “Ma yeme Yésus a ma kôme fe yeme za a ne Paul, ve mia, mi ne beza?” 16 Été été môt a mbe a bili mbia nsisim a nga valé a ke vôme be mbe, ane a nga dañe be ngul a bi môt ase ya be be, aval é mbe na, be nga tube nda, be too sôsoé, a mbalane meveñ. 17 Bôte bese be nga yeme jam éte, bejuif a begrec be mbe be nyiñik Éphèse; ane woñ ô nga bi be bese, a jôé Tate Yésus é nga ke ôsu a nyoñe duma. 18 A bôte bese be nga bo bebuni, be nga so a mem, a kañete bôt été mbia mimboone miap. 19 Ôwé, bôte be mbe be bo’o mame ya mvi’i, be nga mane tôkane bekalate bap a di’i be nduan, bôte bese be lôô. Be nga ve’ele fase tañe ya bekalate bete a yene na, be mbe bifase bi argent 50 000. 20 Amu ngule Yéhôva,* mejô mé me nga ke ôsu a nenenen a dañe bo ngul.

21 Éyoñe mame mete me nga mane lôt, Paul a nga tyi’i na a tyi’ilane Macédoine a Achaïe na a ke Jérusalem. A mbe a jô’ô na: “Éyoñe ma ye kui wôé, ma yiane fe ke Rome.” 22 Nde a nga lôme bôte bebaé, be mbe be volô’ô nye Macédoine Timothée a Éraste, ve émien a nga li’i mone nté ngoto ya Asie.

23 Melu mete, beta zô’é a nga bo a fombô’ô ajô ya Zen.* 24 Môt éziñ a mbe jôé na Démétrius, a mbe nkôme beautel be Artémis be too a argent, a mbe fe a bo’o na bôte ba kôme biôme bite, be bi abui moné. 25 A nga sulane be, a bôte bevo’o ba saé avale biôm éte a jô na: “A bôt, mia kôme yeme na nne akume dangan da so ésaé ji. 26 Éyoñe ji mi yeneya a mi wô’ôya na sa ke ve Éphèse va, ve bebé ngoto ése ya Asie na, Paul nyi a bo na, minsamba mi bôte mi bi ôsimesan ôfe, a jô na bezambe ba kôm a mo be nji bo benya bezambee. 27 Nde fe, sa ke ve asu ésaé dangane nde ñhe é ntoo bebé ya jaé ntuk, ve temple beta zambe minga wongan Artémis a ntoo bebé ya yené zezé jôm e mise me bôt, a too ke na, nnye ba kañe ngoto ése ya Asie, a be bôte ya si ése, a na, a ye ke beta bi duma a yiane de.” 28 Éyoñe bôte be nga wô’ô nalé, be nga wô’ô mbia ôlun a yôtane na: “Artémis beéphésien nnye ñhe a dañe ngul!”

29 Nde jo’ojo’o a nga yametane tison ése, a bôte bese be nga ke mimbile vôme bôte be wô’ô sulane be dutu’u Gaïus a Aristarque tyia, bôte ya Macédoine be mbe be wulu’u a Paul. 30 Ve Paul a mbe a kômbô’ô ke vôme nsamba bôt ô mbe na a kobô be, ve beyé’é be nji kañese na a ke wôé. 31 To’o bemvôé bé be mbe bôte ba kômesane bibek a bivôé, be nga lôme nye mbañete be ye’elane nye na, a bo te ve’ele telé abo vôme bôte be wô’ô tôkan. 32 Nté ôté ôse, a mbe na, bana be yôta’ane jame di, ba bevo’o ki be yôta’ane da vok, jô’ôjô’ô a nga kui fo’o. Abui bôt é mbe é yôta’ane valé, é nji be é yeme’e amu jé ba te tôkane vôm ate. 33 Nde be nga zuu Alexandre nseñ, vôme nsamba bôt ô mbe, bejuif be nga tindi nye ôsu, ane Alexandre a nga febe wo na a kômbô faé be éfufup. 34 Ve éyoñe be nga yeme na a mbe mone juif, be bese be nga taté na ba yôtan ane môte wua, bebé mewolo mebaé na: “Artémis beéphésien nnye a dañe ngul!”

35 Éyoñe ngovina ya tison a nga kui na a bo na bôte be tabe bivôl, a nga jô na: “A bôte ya Éphèse, môte mbé a nji yeme na, tisone ya Éphèse nje ja ba’ale beta temple beta zambe minga Artémis, a na éve’ela jé é nga so yôp été? 36 Amu môt éziñ a vo’o sôô mame ma, mia yiane ñhe tabe ne séé, a bo te ke mbile mintômba. 37 Amu bôte mia te soo be va, be nji bo bôte ba bu’u betemple, nge bôte ba kobô zambe minga wongan ébiasé. 38 Nde nge Démétrius a bôte ba kôme biôme be ne a nye, be bili ajô a môt éziñ, mimôse ba kobô mejô mi ne, bengovina* ba tyi’i mejô be ne wôé, be kele’e bôé somane nda mejô. 39 Ve nge mia jeñe jam afe da lôte dili, mia yiane ke kobô de vôme nsamba bôt ô ne, avale metiñe ma jô. 40 Amu jame da bobane dene di, be ne jô bia na bia bo éngana’a amu bi vo’o ke kat amu jé jo’ojo’o nyi a bobane den.” 41 Éyoñ a nga mane jô mejô mete, ane a nga jô nsamba bôte na ô ke.