Mbamba foé Matthieu a nga tili

12 Zia biyoñ éte, Yésus a nga lôte mefube mefes été môse Sabbat. Beyé’é bé be mbe be wô’ô zaé, nde be nga taté na ba kolé mefes a di me. 2 Éyoñe be nga yene de, bepharisien be nga jô nye na: “Tame yen, beyé’é bôé ba bo jam atiñ é nji kañese na é bobane môse Sabbat.” 3 Ane a nga jô be na: “Ye mi nji lañe jame David a nga bo éyoñe ba be bôte bé be nga wô’ô zaé? 4 Ye a nji nyiine nda Zambe a di belet é mbe asu metuna’a ba be bôte bé, belet atiñ é nji be é kañese’e na émien a bôte ba be nye be mbe be di, ve beprêtre étam? 5 Ye mi nji lañe Metiñe me Moïse, vôme ma jô na, môse Sabbat, beprêtre ba saé Temple ba tyam atiñe ya Sabbat, ve akusa bo nalé, be ne teke bijô? 6 Ve ma kate mia na, môt a dañe Temple a ne va. 7 Ve nge mia yem atinane ya mejô ma: ‘Nkoon éngôngole ñwô ma yi, sa ke metuna’a,’ ve mi nji ve bôte ba bijô a too ke na be ne te mekua. 8 Amu Mona môt a ne Tate ya Sabbat.”

9 Éyoñ a nga kôlô vôm ate, nde a nga ke synagogue wop, 10 a tama yenan! Môt a too ñyemelane wo a mbe valé! Nde be nga sili nye na: “Ye atiñe da kañese na be saé môte môse Sabbat?” Be mbe be jeñe’e jame ya ve nye bijô. 11 Nde a nga yalane be na: “Nge ntômba môte wua ya be mia, wo ku ébé été môse Sabbat, ye môt ate a ye ke sis ébé été a ke vaa wô? 12 Nga môta binam a ne mfi a dañe ntômba! Nde atiñe da kañese na môt a bo mbamba jame môse Sabbat.” 13 Ane a nga jô môt ate na: “Same’e wo wôé.” Nde a nga same wo wé, ane ô nga bo mvo’é a bo ane wu ôvok. 14 Ve bepharisien be nga kui nseñ, a ke bôndé fe’e ya wôé nye. 15 Éyoñe Yésus a nga yeme de, nde a nga kôlô vôm ate, a abui bôt é nga tôñe nye. Ane a nga mane saé be bese ne meñ. 16 Nde a nga ve be abendé a ayok ése na be bo teke kate bôte bevo’o za a ne, 17 nalé a nga tôé nkulan ajô Ésaïe wu:

18 “Tame yen! Mbo ésaé wome me nga tobe nyi, nnye ma nye’e, ma* wô’ô nye mvaé! Ma ye ve nye nsisime wom, a ye volô meyoñe na me tu’a yeme jôm é ne zôsô. 19 A ye bo te wômane bôte nge yôtan, a môt éziñ a ye bo te wô’ô tyiñe jé beta minjoñ. 20 A ye bo te tyak élok* é ntoo ntusan, nge dime nsañe lambe ô ngenan ô kuik ôtita, akekui a ye beta telé zôsô. 21 Teke vaa nge beté, meyoñe ma ye tabe éyôlé jé ndi.”

22 Mvuse ya valé be nga soo nye môt, mbia nsisim a mbe a jô’é nye; môt ate a mbe ndindim a mvumvuk, nde Yésus a nga saé nye, ane a nga taté na a kobô, a taté fe na a yen. 23 Bôte bese be mbe valé, be mbe fe’e ne vema, nde be nga sili na: “Ye môte nyu a nji bo mone David nga?” 24 Éyoñe bepharisien be nga wô’ô de, nde be nga jô na: “Môte nyu a vaa mbia minsisim a ngule Béelzéboub,* njôô mbia minsisim.” 25 Yésus a mbe a yeme’e asimesane dap, nde a nga jô be na: “Éjôé ése é ne mengame mengam, ja ye ke tabe ayap, a tison ése nge ke nda bôt ése é ne mengame mengame ja ye ke tabe ayap. 26 Avale te fe, nge Satan a vaa Satan, yeme’e na a bo mengame mengam, aval avé éjôé jé é ne ñhe libi? 27 Nde, nge ma vaa mbia minsisim a ngule Béelzéboub, bone benane ki ba vaa mbia minsisim a ngule za? Ajô te nde bone benane ba ye bo betyi’i mejô benan. 28 Ve nge é bo na, ma vaa mbia minsisim a ngule Zambe, yemané na, Éjôé Zambe é zuya fo’o be mia.* 29 Nge ke na, aval avé môt a ne nyiine nda ngungule môt a mane wôlé nye akume dé? Ke a ye taté bi nye a mane ka’a nye, éyoñe te nje a ye bo ngule ya sa akume dé. 30 Môt ase a nji bo ngame jam, a ne ma ngame yat, a môt ase a nji kôan a ma, a viane tyamelan.

31 Amu nalé ma kate mia na, Zambe a ye jamé môt a bo avale nsem ése, nge ta, ve Zambe a ye bo te jamé môt ase a ta mfufube nsisim. 32 Éve’an é ne na, môt ase a kobô Mona môt abé, a ye bi njamane ya nseme wé, ve môt ase a kobô mfufube nsisim abé, a ye ke bi njamane ya nseme wé, teké’é fo’o, to’o émo ji, nge mfefé émo* wo zu ôsu.

33 Nge mi ne mbamba élé, wôna bibuma mia wume bia ye bo mvo’é, ve nge mi ne mbia élé, wôna bibuma mia wume bia ye bo bibol. Amu ba ye yem aval élé é ne a zene ya bibuma bié. 34 A mia mvoñe mekpwe, aval avé mi ne jô mbamba be mam, a too ke na mi ne mbia be bôt? Amu mame me ne njalane nlem été mme ma kui anyu. 35 Mbamba môt a kuli mbamba be mame ba so nye nlem été, ve mbia môt a kuli mbia be mame be ne nye nlem été. 36 Ma kate mia na, môse ntyi’ane mejô, bôte ba ye yalan, amu mbia be mame bese be nga jô. 37 Nde wo ye bi mekabe na ô ne zôsô, amu mame ma kui wo anyu, wo ye fe bi mekua amu mame ma kui wo anyu.”

38 Nde bescribe béziñ a bepharisien béziñe be nga jô nye na: “A Ñye’ele, bia kômbô yene ndeme ja liti na Zambe nnye fo’o a nga lôme wo.” 39 Ane a nga yalane be na: “Bôte ya miaé bôte wu mbe bete be ne mbia be bôt a bôte mejian,* ba kômbô na me liti be ndem, ve susu’a ndem é ne litibane be be, é ne nyu nkulu mejô Jonas. 40 Avale Jonas a nga tabe abume beta kose melu melal a môse milal; avale te fe Mona môt a ye tabe soñ été tañe melu melal a môse milal. 41 Bôte ya Ninive ba ye wômô môse ntyi’ane mejô a miaé bôte wu a ve wô mekua, amu be be nga kôñelane minlem éyoñe be nga wô’ô foé Jonas a nga kate be. Ma kate mia na, môt a dañe Jonas a ne va. 42 Môse ntyi’ane mejô, minga a mbe njô bôte ya sud, a ye wômô soñ a miaé bôte wu, a a ye ve wô mekua amu a nga so si é ne ôyabe na, a zu vô’ôlô mejô me Salomon me mbe njalan a fek. Ma kate mia na môt a dañe Salomon a ne va.

43 “Éyoñe mbia nsisim a kôlô be môt, a ke bevôme be ne teke mendim a kele’e a jeñe vôme ya wo’on, ve teke yene jôm. 44 Nde a jô na, ‘Ma zu bulane nda jam, vôme me mbe me taté’é tabe.’ Éyoñ a ke kui wôé, a koone na nda é ne ékôkoé, mvosan, mfuban a mbamba nkôman. 45 Ane a ke loone mbia minsisime mife zangbwal mi ne mbia nlem a dañe nye, éyoñe mi nyiineya, mi ve kôm éto valé; a été môt ate ja dañe bo njuk a dañ été a mbe a taté tebe. Jame da ye kui mbia miaé bôte wu nde le.”

46 A nga bo na, nté Yésus a mbe a kobô’ô nsamba bôt, nde nyia wé a bobenyañe bé be nga zu tebe nseñ, be kômbô’ô laan a nye. 47 Ane môt éziñ a nga kate nye na: “Nyua a bobenyoñe be tele nseñ, ba kômbô laan a wo.” 48 Nde a nga yalane môt ate na: “Za a ne nyia wom, beza be ne bobenyañe bam?” 49 Ane a nga same wo a liti beyé’é bé a jô na: “Nyia wome nyi, bobenyañe bame ke ba! 50 Amu nyu ase a bo nkômban Ésa wom a ne yôp, nnye a ne monyañe wom, kale jam a nyia wom.”