Mbamba foé Jean a nga tili
16 “Ma te kate mia mame ma na mi bo te kolé ôbak. 2 Bôte ba ye titane mia besynagogue. Nde fe awolo da zu, éyoñe môt ase a wôé mia a ye simesane na a bo ésaé Zambe. 3 Ve ba ye bo mame mete amu be ngenane te yeme ma, nge Ésa wom. 4 Ve ma te kate mia mame mete na, éyoñ awolo ya mame mete ma yiane bobane da ye kui, mi simesane na me nga kate mia me.
“Me nji mia kate mame mete ôsusua amu me mbe a mia. 5 Ve éyoñe ji, me nga ke be Nyu a nga lôme ma; ve teke môte wua ya be mia a sili ma na, ‘Nne wo ke vé?’ 6 Ve amu ma te kate mia mame ma, minleme mi ntoo mia njalan a ôlun. 7 Ve ma kate mia nya ajôô. É ne mfi asu denane na me ke. Amu nge me bo teke ke, mvolô a ye bo te so be mia; ve nge ma ke, ma ye lôme nye be mia. 8 A éyoñ a ye so a ye liti bôte bese jé nsem ô ne, jé zôsô a ne a jé é ne ntyi’ane mejô Zambe: 9 jam ôsu mfa’a ya nsem, amu be nji liti na, ba buni ma; 10 da vok, mfa’a ya zôsô amu ma ke be Ésa wom a mia ye ke beta yene ma; 11 di vo’o ki, mfa’a ya ntyi’ane mejô Zambe, amu njôô ya si nyu a tyi’ibaneya ajô.
12 “Me ngenane me bili abui mame ya kate mia, ve mi vo’o me wôk éyoñe ji. 13 Ve, éyoñe mvolô ate a ye so, nge ke na, éyoñe mfufube nsisim a timine benya mejôô a ye so, a ye wulu mia benya mejôô bese été, amu a ye ke kobô amu nkômbane wé émien, ve jam a wôk, nde a ye kobô. Nde fe, a ye kate mia mame ma yiane boban. 14 Nyuli ate a ye ve ma duma, amu a ye nyoñe jame da so be ma a kate mia de. 15 Biôme bise Ésa wom a bili bi ne émbiam. Ajô te nde, ma te jô na, a nyoñe jame da so be ma a kate mia de. 16 A li’iya mon éyoñ, mia ye ke beta yene ma a mvuse mon éyoñ, mia ye beta yene ma.”
17 Ane beyé’é bé béziñe be nga taté na ba jôane be be na: “Jé ébien a kômbô bia kat éyoñ a bo na mone nté a jô bia na, ‘A li’iya mone nté, mia ye ke beta yene ma, a fe na, mone nté, mia ye beta yene ma,’ a na ‘amu ma ke be Ésa wom’?” 18 Nde be mbe be jô’ô na: “Jé ébien a kômbô jô, éyoñ a jô na, ‘a li’iya mone nté’? Bi nji yeme jam a kômbô jô.” 19 Yésus a nga yeme na ba kômbô nye sili minsili, nde a nga jô be na: “Ye môt ase a sili nyu mbo’o minsili na a yem amu jé ma te jô na: ‘A li’iya mon éyoñ, mia ye ke beta yene ma, a mvuse mon éyoñ, mia ye beta yene ma’? 20 Ma bele fo’o ane ma jô mia na, mia ye yôn a tat, ve si nyu ja ye bo mevak; mia ye wôk ôlun, ve ôlune wônane wo ye kôñelan a bo mevak. 21 Éyoñe minga a biaé, a wô’ô mintaé amu awolo dé é kpwaaneya, ve éyoñ a maneya biaé mon, a nji beta simesane mintaé, amu a ne meva’a na môta binam a bialéya si nyu. 22 Mia fe, éyoñe ji mia wôk ôlun, ve ma ye beta yene mia, a minleme mienane mia ye vak, a teke môt a ye vaa mia ava’a denan. 23 Môs ôte, mia ye ke sili ma nsili éziñ. Ma bele fo’o ane ma jô mia na, nge mi ja’é Ésa wome jôm éziñ, a ye ve mia je e jôé dam. 24 Azukui éyoñe ji, mi ngenane te sili jôm éziñ e jôé dam. Jaka’an, a mia ye bi, ndembene meva’a menane me ne jaleban.
25 “Ma te belane bive’ane na me kate mia mame ma. Awolo da zu, éyoñe ma ye ke beta kobô a mia me bela’ane bive’an, ve ma ye kôme liti mia za a ne Ésa wom. 26 Môs ôte, mia ye sili Ésa wome biôm e jôé dam; éyoñe ma jô de, nalé a nji tinane na ma ye sili biôme bite asu denan. 27 Amu Ésa wom émien a nye’e mia amu mi nga nye’e ma a buni na me nga so señe Zambe. 28 Me nga so señ Ésa wom a me nga so si nyu. Éyoñe ji, ma kôlô si nyu a ma ke be Ésa wom.”
29 Beyé’é bé be nga jô na: “Tame yen! Éyoñe ji wo kobô ne sañesañ a wo belane ki bive’an. 30 Éyoñe ji, bia yeme na wo yeme mame mese a na, ô nji yi na môt éziñ a beta wo sili nsili. Amu nalé bia buni na wo so be Zambe.” 31 Yésus a nga yalane be na: “Ye mia buni éyoñe ji? 32 Tama yenan! Awolo da zu, ôwé, é kuiya, éyoñe môt ase ya be mia a ye tup a ke nda jé, a mia ye li’i ma étam. Ve me nji bo étam, amu Ésa wom a ne a ma. 33 Ma te kobô mame ma na mi bi mvo’é a zene jam. E si nyu mia ye bi minjuk, ve bo’ané ngule minlem, me dañeya si nyu.”