Mbamba foé Jean a nga tili

6 Mvuse ya valé Yésus a nga ke mañe ya Galilée yat ba loone fe na Tibériade. 2 A beta nsamba bôt a nga ke ôsu a tôñe nye, amu a mbe a yene’e mesimba a mbe a bo’ok éyoñ a mbe a saék bôt. 3 Nde Yésus a nga bete nkôl a tabe si wôé ba be beyé’é bé. 4 Paska, abô’ô bejuif, a mbe a ntoo bebé. 5 Éyoñe Yésus a nga bete mis a yene beta nsamba bôt a mbe a za’a be nye, a nga jô Philippe na: “Nne bia ye kuse belet asu bôte ba vé na be di?” 6 Ve a mbe a jô’ô mejô ma na a ve’ele nye, amu a mbe a yeme’e jam a zu bo. 7 Philippe a nga yalane nye na: “To’o bia kuse belete tañe bedenier* 200, belet éte é vo’o yiane na, môt ase ya be be a bi to’o ve mon éfus.” 8 Ñyé’é wé wua, André monyañe Simon Pierre a nga jô nye na: 9 “Ôyôme mona fam ô ne va ô bili belet orge étan a bone bekose bebaé. Ve nyuli ate a ne jé asu abim abui bôt ése di?”

10 Yésus a nga jô na: “Bo’ané na bôte be tabe si.” Bôte be nga tabe si vôm ate amu abui bilok é mbe valé, befame be mbe valé be mbe bebé 5 000. 11 Yésus a nga nyoñe belet, a éyoñ a maneya ve Zambe akiba, ane a nga kabe je bôte be mbe be too si valé, a nga bo fe avale da a mone kos, a be nga bi abime be nga kômbô. 12 Nde éyoñe be nga mane di a jaé, a nga jô beyé’é bé na: “Kô’ané bifuse bia te li’i, na jôm éziñ é bo teke ndaman.” 13 Nde be nga kôane bikat 12 ya mebuka’a ya belet orge étan éyoñe bôte be nga mane di.

14 Éyoñe bôte be nga yen asimba a nga bo, be nga taté na ba jô na: “Nyuna a ne fo’o nkulu mejô a mbe na a zu si.” 15 Ajô te, éyoñe Yésus a nga yeme na, ba zu bi nye na ba telé nye njô bôt, ane a nga beta kôlô a ke nkôl étam.

16 Éyoñe ngô’é é nga bo, beyé’é bé be nga siliki mfa’a ya mañ, 17 a bet éfunga, ane be nga tyi’ilane mañe na ba ke Capernaüm. Alu é mbe é ntoo, a Yésus a mbe a ngenane teke zu koone be. 18 Nde fe mañe me mbe ayok* amu ngul évuñulu é mbe é vuñu’uk. 19 Ve éyoñe be nga wulu éfunga bebé kilimita étan nge ke ésaman,* be nga yene Yésus a wulu’u mañe yôp a za’a bebé éfunga a be nga ko woñ. 20 Ve a nga jô be na: “Te mia ko woñ, taba’ané ne séé, ma le!” 21 Ane be nga bo nkômesane ya daa nye éfunga été, été été éfunga é nga nambe si ya vôme be mbe be kelek.

22 Môs ô nga tôé valé, nsamba bôt ô nga li’i mfa’a mañ ôvok ô nga yene na, teke éfunga éfe valé. Mon éfunga nnye a mbe valé, ve Yésus a nji dañ éfunga éte a beyé’é bé, ve beyé’é bé be nga ke étam. 23 Ve bifunga bi mbe bi so’o Tibériade bi nga suane bebé vôme be nga di belet éyoñe Tate a nga mane ve Zambe akiba. 24 Nde éyoñe nsamba bôt ô nga yene na, teke Yésus nge beyé’é bé vôm ate, ô nga dañe bifunga a ke Capernaüm na wo ke wo jeñe Yésus.

25 Éyoñe be nga koone Yésus abôñe mañe ya yat, be nga jô nye na: “A Rabbi, wo te suane va éyoñ évé?” 26 Yésus a nga yalane be na: “Ma bele ane ma kate mia na, mia jeñe ma, sa ke amu mia te yene mesimba, ve amu mia te di belet a jaé. 27 Saané, sa ke asu bidi bia ndaman, ve asu bidi bia tabe bi va’a ényiñe ya nnôm éto, mbie bite Mona môt a ye ve mia; amu be nye Ésa ya yôp été, Zambe a futiya sitame jé ja liti na a kañese nye.”

28 Nde be nga sili nye na: “Jé bia yiane bo na, bi bo mame Zambe a nye’e?” 29 Ane Yésus a nga yalane be na: “Jame Zambe a yi na mi bo nde di, na mi liti mbunane be nyu a nga lôm.” 30 Ane be nga jô nye na: “Za jame wo bo é ne asimba, ndembene bi ne yene de a buni wo? 31 Bemvamba bangan be nga di manne nkôte si fo’o ve aval é ne ntilane na: ‘A nga ve be belet é so’o yôp na be di.’” 32 Ane Yésus a nga yalane be na: “Ma bele ane ma kate mia na, Moïse a nji ve mia belet é so’o yôp, ve Ésa wom a ve mia nya belete a so yôp. 33 Amu belete Zambe é ne nyi ja so yôp, a nyi ja ve bôte bese ényiñ.” 34 Nde be nga jô nye na: “A Tate va’a bia belete nyi éyoñ ése.”

35 Yésus a nga jô be na: “Me ne belete ya ényiñ. Môt ase a zu be ma a ye ke wô’ô zaé môs éziñ, a môt ase a liti na, a buni ma a ye ke wôk évé môs éziñ. 36 Ve avale ma te kate mia, mi yeneya ma, ve mi teke buni. 37 Bôte bese Ésa wom a ve ma ba ye zu be ma, a teke môs éziñe ma ye titane môt a zu be ma; 38 amu me nga so yôbe na, me bo sa ke nkômbane wom, ve nkômbane nyu a nga lôme ma. 39 Nyuna a ne nkômbane nyu a nga lôme ma, na me nji yiane jañele môte wua ya ba a nga ve ma, ve na, ma yiane wômôlô be môse wo su’ulan. 40 Amu nyuna a ne nkômban Ésa wome na môt ase a kañese Mon a liti mbunane be nye a yiane bi ényiñe ya nnôm éto, a ma ye wômôlô nye melu ma zu.”

41 Ane bejuif be nga taté na, ba kobô menyiñe mfa’a wé amu a nga jô na: “Me ne belet é nga so yôp.” 42 A be nga taté na ba jô na: “Ye nyuna a nji bo Yésus mone Joseph, nyu bia kôme yem ésa a nyia? Aval avé a jô éyoñe ji na, ‘Ma te so yôp’?” 43 Ane Yésus a nga yalane be a jô’ô na: “Te beta kobané menyiñe mia mia. 44 Teke môt a ne ngule ya zu be ma nge Ésa wom a nga lôme ma a nji dutu nye, a ma ye wômôlô nye melu ma zu. 45 É ne ntilane mejô bekulu mejô na: ‘Yéhôva* a ye ye’ele be bese.’ Môt ase a te wô’ô mejô me Ésa a kañese fe ñye’elane wé nnye a zu be ma. 46 Nalé a nji tinane na môt a yeneya Ésa; susu’a môt é yeneya Ésa a ne nyu a so be Zambe. 47 Ma bele ane ma kate mia na, môt ase a buni a bili ényiñe ya nnôm éto.

48 “Me ne belete ya ényiñ. 49 Bemvamba benane be nga di manne nkôte si, ve to’o nalé be nga wu. 50 Nyuna a ne belete ja so yôbe na, môt ase a di je a bo teke wu. 51 Me ne belete ya ényiñ é nga so yôp, nge môt a di belete nyi a ye nyiñe nnôm éto; nde fe, belete ma ye ve é ne minsône miam mfa’a ya na bôte ya si be bi ényiñ.”

52 Ane bejuif be nga taté na ba wômane be be be jô’ô na: “Aval avé môte nyi a ne ve bia minsône mié na bi di?” 53 Nde Yésus a nga jô be na: “Ma bele fo’o ane ma kate mia na, nge mi nji di minsône mi Mona môt a nyu metyi mé, mia ye ke bi ényiñ.* 54 Môt ase a di minsône miam a nyu metyi mam a bili ényiñe ya nnôm éto, a ma ye wômôlô nye melu ma zu; 55 amu minsône miam mi ne benya bidii a metyi mam me ne nya jômô ya nyu. 56 Môt ase a di minsône miam a môt ase a nyu metyi mam a kabetane ma, a ma kabetane nye. 57 Fo’o ve aval Ésa wom a ne vevee a nga lôme ma a ma nyiñ amu Ésa wom, avale te nde fe môt a di ma a ye nyiñ amu ma. 58 Nyuna a ne belete ja so yôp, é nji bo ane éyoñe bemvamba benan be nga di a beta wu. Môt ase a di belete nyi a ye nyiñe nnôm éto.” 59 A nga jô mame mete éyoñ a mbe a ye’ele’e synagogue* e Capernaüm.

60 Éyoñe be nga wô’ô jame di, abui beyé’é dé é nga jô na: “Mejô ma me ne nyi’i melo; za a ne ngule ya wô’ô me?” 61 Ve Yésus, amu a mbe a yeme’e na, beyé’é bé be mbe be kobô’ô menyiñ ajô di, a nga sili be na: “Ye mejô ma ma kolé mia ôbak? 62 Mia ye bo aya nge mia yene Mona môt a bete’e vôm a nga too ôsusua? 63 Nsisime ñwô wo ve ényiñ, minsône mi nji bo mfi éziñ. Mejô ma te kate mia me ne nsisime me ne fe ényiñ. 64 Ve bôte béziñe ya be mia be nji buni.” Amu aso atata’a Yésus a mbe a yeme’e bôte be nji buni a a mbe a yeme’e nyu a ye koñe nye. 65 A nga ke ôsu a jô na: “Ajô te nde, me nga jô mia na, teke môt éziñ a ne zu be ma nge Ésa wom a nji nyoñe ntyi’ane na a zuu nye.”

66 Amu jame di, abui beyé’é dé é nga bulane mame be mbe be bo’o ôsusua, a bo te beta wulu a nye. 67 Nde Yésus a nga sili minlôman Awôm a mibaé na: “Ye mia fe mi nji kômbô ke ane be?” 68 Simon Pierre a nga yalane nye na: “A Tate bia ye ke be za? Ô bili mejô ya ényiñe ya nnôm éto. 69 Bi buniya a bi nga yeme na, ô ne Nyu a ne étyi, a Nyu Zambe a nga lôm.” 70 Yésus a nga yalane be na: “Nga me nga tobe mia minlôman Awôm a mibaé, ve môte wua ya be mia a ne mbôte bôte mejô.”* 71 A mbe a kobô’ô ajô Judas mone Simon Iscariot, amu nnye a mbe na a ye koñe nye akusa bo a mbe môte wua ya minlôman Awôm a mibaé.