Kalate Paul a nga tili Behébreu

11 Mbunan ô ne ndi nleme bi bili a nlem ôse na, jame bi too de ndi da ye fo’o boban, beamu ba kôme liti ne fômelé* na jame bi nji yen é ne fo’o été. 2 Amu a zene ya mbunan ôte, ñwô bôte ya melu mvuse* be nga bi mbamba éyôlé.

3 A zene ya mbunan, bia yene na émo* é nga kôman a zene ya mejô me Zambe, nalé ate a tinane na, biôme bia yené bi nga téban a zene ya bi bi nji yené.

4 A zene ya mbunan, Abel a nga ve Zambe metuna’a me ne anen a dañe ma me Caïn, a a zene ya mbunan ôte a nga kalébane na a mbe zôsô, amu Zambe a nga nye’e mimveane mié,* a akusa bo a nga wu, a ngenan a kobô’ô a zene ya mbunane wé.

5 A zene ya mbunan, Zambe a nga kee Hénok vôme mfe, ajô te, a nji ke wu avale bôte bese be wô’ô wu, a be nji koone nye vôm éziñ, amu Zambe a nga vaa nye; amu, ôsusua na ba vaa nye, a nga bi mbamba éyôlé na a nga ve Zambe nleme mvaé. 6 Nde fe, a mbunane momo, môt a se ngule ya yené mvaé e mise me Zambe, amu nyu ase a subu Zambe bebé a yiane tabe ndi na a ne,* a na, a ntoo nyu a ya’ane ba ba jeñe nye a nlem ôse.

7 A zene ya mbunan, Noé, éyoñ a nyoñeya melebe ma so be Zambe, mfa’a ya mame me ngenane teke yené, a nga liti na a ko Zambe woñ a lôñ arche asu na nda bôte jé é nyiñ; a zene ya mbunan ôte, a nga ve mbia be bôte mekua, ane a nga bo nyoñe ngabe ya zôsô ja so a zene ya mbunan.

8 A zene ya mbunan, Abraham, éyoñ a nga looban, a nga bo mewôk a kôlô vôm a mbe, a ke vôm a mbe na a ke nyoñ élik; a nga ke akusa bo a nji be a yeme’e vôm a mbe a kelek. 9 A zene ya mbunan, a nga nyiñ ane nneñe si ya ntiñetan ane môt a nyiñ éza si, a nga nyiñe menda bindelé été a Isaac a Jacob, benyoñe ngabe ya ngaka’a jia a nye. 10 Amu a mbe a yange’e tison é bili benya mimbôka’a, nyi môt a nga lôñ a mbôndé* a ne Zambe.

11 A zene ya mbunan, Sara fe a nga bi ngule ya bi mvoñe bôt akusa bo a mbe a lôteya ôkala ya biaé, amu a nga yene na a ne tabe ndi a nyu a nga bo ngaka’a. 12 Amu nalé, a zene ya môte wua a mbe ane mbim, abui bon é nga bialé ane ateté ya yôp a teke alañé, ane nsele’e ya nsa’a mañ.

13 Bese be nga wu mbunan été akusa bo be nji yen ane bengaka’a ba tôéban; ve be nga yene be ôyap a batane* be, a jô e bôt été na be mbe beyeñ a bewulu dulu ya si. 14 Amu ba ba kobô avale di ba kôme liti ne fômelé na ba jeñ afôla dap a nlem ôse. 15 Ve nge be nga ye ke ôsu a simesane vôme be nga so, be nga ye yene fane ya bulan. 16 Ve éyoñe ji, ba nyamete mbamba vôm, nalé ate a tinane na, vôme ya yôp été. Ajô te, Zambe a nji wôk ôsone ya loobane na, Zambe wop, amu a nga kômesane tison asu dap.

17 A zene ya mbunan, Abraham, éyoñ a nga tebe meve’ele été, a nga kañese ve Isaac metuna’a, môt a nga bi bengaka’a a meva’a mese a mbe bebé ya ve atyi’i mone dé metuna’a, 18 akusa bo be nga jô nye na: “Nyu ba ye loone na ‘mvoñe bôte jôé’ ja ye so be Isaac.” 19 A nga buni na Zambe a ne wômôlô mone wé, a a nga bi mon ate éyoñ a mbe a ntoo ane ñwuan, nalé a liti jame da ye bobane melu ma zu.

20 A zene ya mbunan, Isaac fe a nga botane Jacob a Ésaü mfa’a ya mame me mbe na ma ye boban.

21 A zene ya mbunan, Jacob, éyoñ a mbe bebé ya wu, a nga botane mon ase ya bone be Joseph, a a nga kañe Zambe a ye’e sôso’o ntume wé.

22 A zene ya mbunan, Joseph, éyoñ a mbe bebé ya wu, a nga kobô ajô ya nkôlane bone ya Israël, a a nga ve abendé* mfa’a ya bivese bié.*

23 A zene ya mbunan, bebiaé be Moïse be nga solé nye tañe ngon élale mvus abialé dé, amu be nga yene na mone mon a mbe abeñ, a be nji ke ko atiñe njô bôt a nga ve woñ. 24 A zene ya mbunan, Moïse, éyoñ a nga bo nya môtô, a nga bene loobane na mone ngone Pharaon, 25 a nga tobe na be tibili nye a bôte be Zambe a lôte na a bi meva’a ya nseme me ne fo’o ve étun éyoñ, 26 amu a nga yene na, ôsone wo so be Krist ô ne akum abui a lôt akume ya Égypte, amu a mbe a tuka’a fombô ma’ane ma yange nye. 27 A zene ya mbunan a nga kôlô Égypte, ve a nji ko ôlune njô bôte woñ, amu a nga ke ôsu a tebe ne bip, fo’o ve ane a lôô Nyu a nji yené. 28 A zene ya mbunan, a nga bo Paska a ñwo’one metyi, ndembene nyu a wôé bôt a ne bo te wôé* mintôle mi bone miap.

29 A zene ya mbunan, be nga dañ Évele mañe fo’o ve ane ba tyii nkôte si, ve éyoñe bôte ya Égypte be nga ve’ele de bo, be nga mane nyoñ.

30 A zene ya mbunan, mimfine ya Jéricho mi nga ku éyoñe bôte be bômaneya mie melu zangbwal. 31 A zene ya mbunan, Rahab, minga bijabô, a nji ke wu a ba be mbe be bo’o melo, amu a nga yeme nyoñe beloé si.

32 A jé ma ye beta kô’ôlan? Amu éyoñe ja ye bo bia tyôtyoé nge ma ke ôsu a laane mia ajô Gédéon, Barak, Samson, Jephté, David, Samuel a bekulu mejô bevok. 33 A zene ya mbunane be nga dañe bijôé, be nga telé zôsô, be nga bi bengaka’a, be nga dibe menyu bengbwengbwem, 34 be nga dime ngule ya nduan, be nga fame meyo me nkpwaté mekôn, éyoñe be mbe nte’an éyoñe te nje ñhe be nga bo ngul, be nga bo ngule bita, be nga bo na minkane bita mi tup. 35 Binga be nga nyoñe bivuvumane biap bi nga wu a zene ya ñwômane miñwuan, ve bôte bevo’o be nga tôban éndeñela’a amu be nga bene kañese nkôtan a zene ya ntañ éziñ, ndembene be ne kui na be bi ñwômane miñwuane wo dañe mvaé. 36 Ôwé, bevo’o béziñe be nga tôbane minjuk, a zene ya bikpwe’ele a bibôm,* a jam é nga dañedañ, be nga tiñeti be bengôkop a futi be mimbôk. 37 Be nga lume be mekok, be nga tebe meve’ele été, be nga si’iban a zik bitune bibaé,* be nga wôé be a nkpwaté mekôn, be nga kee be li a li be be’e bikôbe bi ntômba a bi bikela, éyoñe be mbe teke jôm, bitibila’a été a minjuk été; 38 a bôte ya meyoñe be nji yiane be. Be nga ke ba ke bebé a minkôte mi si a minkôl a mimbile ya mimbase mekok a mimfule mi si.

39 Ve e bôte ba bese, akusa bo be mbe be bili mbamba éyôlé amu mbunane wop, be nji yen ane ngaka’a ja tôéban. 40 Amu Zambe a nga kômesane jôme ja dañ abeñ asu dangan a a zen éte, ba ye ke bo ne seleñ ôsusua bia.