Mbamba foé Luc a nga tili

11 Môs éziñ a mbe vôm éziñ a ye’elan, éyoñ a nga mane, ane ñyé’é wé wua a nga jô nye na: “A Tate, ye’ele’e bia ane bia yiane ye’elan, avale Jean fe a nga ye’ele beyé’é bé.”

2 Nde a nga jô be na: “Éyoñ ése mia ye’elane jô’ané na: ‘A Ésa wongan, jôé dôé é bo’o étyi.* Éjôé jôé é za’ak. 3 Va’a bia bidi asu miñyiane miangane ya môs. 4 A jamé’é bia minseme miangan, amu bia fe bia jamé môt ase a bo bia abé. Nde fe te bo na bi tôbane meve’ele.’”

5 Ane a nga jô be na: “Bi tame jô na ô bili mvôé, éyoñ éte wo ke be nye zañ alu a jô nye na, ‘A mvôé jam, kôlé’é ma belet élal, 6 amu mvôé jam éziñ é ndeme so dulu a me nji bi jôme ya ve nye.’ 7 Ve mie ndaa a yalane nye a too nda été na: ‘Te ndeñele ma. Mbé ô ntoo mfetan a bia be bone bame bi bômbôya si, me se ngule ya kôlô si a zu ve wo jôm éziñ.’ 8 Ma kate mia na, to’o a ye ke kôlô si a ve nye jôm éziñ amu a ne mvôé jé, teke vaa nge beté, a ye kôlô si a ve nye jôm ése a yi amu a te bo mbane ya sili teke wôk ôson. 9 Nde ma jô mia na, kelané ôsu a ja’é a ba ye ve mia, kelané ôsu a jeñ, a mia ye yen, kelané ôsu a kute mbé, a ba ye yoé mia wô. 10 Amu môt ase a ja’é nnye ba ye ve, a môt ase a jeñe nnye a ye yen, a môt ase a kute mbé nnye ba ye dine wô. 11 E nya ajôô, ésa mbé ya be mia a ne bo na nge mone wé a sili nye kos, a viane nye ve nyo? 12 Nge ke na nge a sili nye atyi kup, ye a ye viane ve nye kata ôlete? 13 Nde fe, nge mia, akusa bo mi ne mbia be bôt, mia yeme ve bone benane mbamba be biôm, ke Ésa wônan a ne yôp a ye dañe ve bôte ba ja’é nye mfufube nsisim!”

14 Mvuse ya valé, a nga vaa mbia nsisim a nga bo na môt a bo mvuk. Éyoñe mbia nsisim ate a kôlôya, ane mvumvu’u môt ô nga taté na wo kobô, a nsamba bôt ô mbe fe’e ne vema. 15 Ve bôte béziñe be nga jô na: “A vaa mbia minsisim a ngule Béelzéboub* njôô mbia minsisim.” 16 A bôte bevo’o be nga taté na ba sili nye ndeme ja so yôp, mfa’a ya na be ve’ele nye. 17 Amu a mbe a yeme’e ôsimesane wop, a nga jô be na: “Éjôé ése é ne mengame mengame ja ye ke tabe ayap, a nda bôt ése é ne mengame mengame ja ye ke tabe ayap. 18 Avale da fe, nge Satan a bo mengame mengam, aval avé éjôé jé ja ye libi? Amu mia jô na ma vaa mbia minsisim a ngule Béelzéboub. 19 Nge ma vaa mbia minsisim a ngule Béelzéboub, bone benane ki ba vaa mie a ngule za? Amu nalé ba ye bo betyi’i mejô benan. 20 Ve nge ma vaa mbia minsisim a ngule Zambe* yemané na Éjôé Zambe é zuya fo’o be mia. 21 Éyoñe ngungule môt ô bili bikpwelé mewosane bise wo ba’ale nda jé, a nji jañele akume dé. 22 Ve éyoñe môt a lôte nye ngul a zu wosane nye a dañe nye, môt ate a mane wôlé bikpwelé mewosane bié bise a mbe a too bie ndi, a mane fe kap akum ése a te nyoñe be nye. 23 Môt ase a nji bo ngame jam, a ne ma ngame yat, a môt ase a nji kôan a ma, a viane tyamelan.

24 “Éyoñe mbia nsisim a kôlô be môt, a ke bevôme be ne teke mendim a kele’e a jeñe vôme ya wo’on, a éyoñ a nji yene vôme ya tabe a jô na, ‘Ma zu bulane nda jam, vôme me mbe me taté tabe.’ 25 Éyoñ a ke kui wôé, a koone na nda é ne mvosan, mfuban a mbamba nkôman. 26 Ane a ke loone mbia minsisime mife zangbwal mi ne mbia nlem a dañe nye, éyoñe mi nyiineya, mi ve kôm éto valé. Ane été môt ate ja dañe bo njuk a dañ été a mbe a taté tebe.”

27 Nté a mbe a kobô’ô mame ma, minga éziñ a too nsamba bôt été a nga bete tyiñe yôp a jô nye na: “Mevak a abum é nga be’e wo a mebé me nga nyia wo!” 28 Ve a nga jô na: “Momo, ve mevak a bôte bese ba wô’ô mejô me Zambe a ba’ale me!”

29 Éyoñe minsamba mi bôte mi nga sulane vôme wua, a nga taté na a jô na: “Miaé bôte wu ô ne mbia miaé bôt, wo jeñe ndem, ve ndeme fe ja ye ke vebane be miaé bôt ôte, fo’o ve nyi Jonas. 30 Amu fo’o ve avale Jonas a nga bo ndem asu bôte ya Ninive, avale da da Mona môt a ye bo ndem asu miaé bôte wu. 31 Môse ntyi’ane mejô, minga a mbe njô bôte ya sud, a ye wômô miñwuan a bôte ya miaé bôte wu, a a ye ve be mekua amu a nga so si é ne ôyabe na, a zu vô’ôlô mejô me Salomon me mbe njalan a fek. Ma kate mia na môt a dañe Salomon a ne va. 32 Bôte ya Ninive ba ye wômô môse ntyi’ane mejô a miaé bôte wu a ve wô mekua, amu be be nga kôñelane minlem éyoñe be nga wô’ô foé Jonas a nga kate be. Ma kate mia na, môt a dañe Jonas a ne va. 33 Éyoñe môt a bo’é lambe, a futi ki lambe ate ékate si,* a beté nye ételé belambe na bôte ba zu nda été be yen éfufup. 34 Lambe ya nyule môt a ne dise dôé. Éyoñe dise dôé da fombô ve jôme jia,* wôna nyule jôé ja ye faé, ve éyoñ ô bili dise minyamete,* nyule jôé ése ja ye bo dibi. 35 Ajô te, tabe’e ntyele na éfufup é ne be wo é bo teke bo dibi. 36 Nde nge nyule jôé ése ja faé, a teke ébu’a éziñe ya été é ne dibi si, ése ja ye faé, fo’o ve ane éyoñ éfufube lambe ja lôme minkôkôé mié.”

37 Éyoñ a nga mane jô mame ma, nde mone pharisien a nga bañete nye na a ke di nda jé, ane a nga nyiin a tabe si tebele na a di. 38 Ve mone pharisien a nga kam éyoñ a nga yene na a nji taté sôbe mo ôsusua na a di.* 39 Ve Tate a nga jô nye na: “A mia bepharisien, mia sôp élaé a ésua mfa’a ya atan, ve été wôé mi ne njalan a ôzañ akum a mbia be mam. 40 Za avale mekute me bôte di! Nyu a nga té mfa’a ya nseñ a nga té fe mfa’a ya été wôé, sa nalé? 41 Ve éyoñe mia bo mimveane ya mvam,* va’ané mame ma so mia été wôé a jôm ése ja fombô mia ja ye bo mfuban. 42 Ve ngo’o mia bepharisien, amu mia ve ngap awômô ya menthe a rue* a bilo’o bivo’o bi ne mbamba menyum, ve mia biasé zôsô a nye’ane Zambe! Mi mbe ntindane ya bo mame mete, ve mi nji yiane vuane mame mevo’o mese. 43 Ngo’o mia bepharisien, amu mia nye’e mi tabe’e mbamba bito bi ne besynagogue été a na, bôte be batane mia minseñe mi éwônga! 44 Ngo’o mia, amu mi ne ane mesoñe ma, mme mete me ne teke kôme yené, a bôte ba wulu me yôbe teke yeme nalé!”

45 Môte wua ya ba be mbe valé, a mbe a yeme’e Metiñe me Moïse a nga yalane nye na: “A Ñye’ele, éyoñe wo jô nalé wo ta fe bia.” 46 Nde a nga jô na: “Ngo’o mia fe, bôte ba yeme Metiñe me Moïse, amu mia ka’a bôte mimbe’e mi ne adite na be be’e mie, ve miabebiene mi teke mie nambe ve a ônyui wua!

47 “Ngo’o mia, amu mia lôñe mesoñe bekulu mejô, ve bemvamba benane mbe be nga wôé be! 48 Teke vaa nge beté, mia yeme mame bemvamba benane be nga bo, a mia kañese mboone wop amu be nga wôé bekulu mejô, ve mi mia lôñe mesoñe bekulu mejô bete. 49 Ajô te nde Zambe, nyu a ne fek a nga jô na: ‘Ma ye lôme be bekulu mejô a minlôman a ba ye wôé a tibili bôte béziñe ya be be 50 na miaé bôte wu ô be’e ayeme* ya metyi bekulu mejô bese be nga wu. Ataté éyoñe bone be nga taté na ba bialé si,* 51 ataté metyi me Abel, akekui metyi me Zacharie, nnye be nga wôé e zañ autel ba nda.’* Ôwé, ma kate mia na, miaé bôte wu wo ye be’e ayem* éte.

52 “Ngo’o mia mia kôme yeme Metiñe me Moïse, amu mi nga vaa édiba’a ya ñyeman, miabebiene mi nji nyiin a mia kamane ba ba kômbô nyiine na be nyiin!”

53 Nde éyoñ a nga kôlô vôm ate, ane bescribe a bepharisien be nga taté na ba jeñe nye mintañete a soñe nye a abui minsili. 54 Be mbe be yange’e na a jô éfia éziñ é ne bo na be ve nye mekua.