Mbamba foé Marc a nga tili

5 Nde be nga ke kui abôñe mañ avo’o ya ngoto ya bôte ya Gérasa. 2 Éyoñe Yésus a nga sis éfunga, été été môt a mbe a bili mbia minsisime nyul a so’o afube mesoñ, a nga zu tôbane nye. 3 A mbe a too afube mesoñ. Ataté éyoñ éte, teke môt éziñ a mbe ba’ale nye nka’atan, to’o a ngôkop. 4 Biyoñe biziñe be nga tiñeti nye bengôkobe mo a mebo, ve a nga mane té bengôkobe be mbe be tii nye mo, a mane fe té bengôkobe be mbe nye mebo. 5 Môse ba alu, a nga ke ôsu a yône mesoñ été a minkôl été, a balé émiene meveñ a mekok. 6 Ve éyoñ a nga yene Yésus a za’a ôyap, ane a nga valé mbil a zu vitibi ôsu wé. 7 Ane a nga bame yôp été, a jô’ô na: “A Yésus, Mona Zambe a dañe mbetane yôp, me bili ajô avé a wo? Ma kane ngana ane Zambe a vee, te zu tibili ma.” 8 Amu Yésus a nga jô nye na: “A mbia nsisim, kôlô’ô môt ate nyul.” 9 Ve Yésus a nga sili nye na: “Ô ne jôé na za?” Ane a nga yalane nye na: “Me ne jôé na Bizuk, amu bi ne abui.” 10 Ane a nga ye’elane Yésus abui biyoñe na a bo te vaa be afôla di.

11 Beta mbame bengôé a mbe a kele’e a di nkôl. 12 Nde minsisime mi nga ye’elane nye na: “Lôme’e bia, bi ke nyiine bengôé été.” 13 Ane a nga kañese, nde mbia minsisime mi nga kôlô môt ate nyul a ke nyiine bengôé été, éyoñe mbame bengôé ô nga valé mbil, ane ô nga koo nkôme tyia yôp a ke ku mañ été, bengôé bebé 2 000 ya mbam ôte be nga ke ku mañ été. 14 Ve beba’ale bengôé be nga tup a ke kañete de tison a minlame mia bômane tison, ane bôte be nga so a zu yene jame da te boban. 15 Nde be nga zu koone Yésus, be nga yene fe môte mbia minsisime mi mbe mi jô’é nye, nyu a mbe a bili bizuk a too si, a be’e biyé a fe’e jé ése; ane be nga ko mbia woñ. 16 Nde fe, bôte be nga yene mame mese me nga boban, be nga kañete be jam é nga kui môte mbia nsisim a mbe a jô’é nye a bengôé. 17 Nde be nga taté na ba ye’elane Yésus na a kôlô ngoto jap.

18 Éyoñe Yésus a nga ke na a ke bet éfunga, môte mbia nsisim a mbe a jô’é nye a nga ye’elane nye na ba nye be ke nsamba. 19 Ve a nji kañese, ane a nga jô nye na: “Kele’e be bivuvumane biôé, ô kañete be mame mese Yéhôva* a te bo wo a aval a te ko wo éngôngol.” 20 Ane môt ate a nga ke, a taté na a kañete Décapole* ase mame mese Yésus a nga bo nye, ane bôte bese be nga bo fe’e ne vema.

21 Yésus a nga beta bet éfunga na a ke abôñe mañe yat, éyoñ a keya kui wôé, ane beta nsamba bôt a nga zu koone nye abôñe mañ. 22 Kaso wua ya synagogue, nnye ate a mbe jôé na, Jaïrus, a nga suane valé, éyoñ a nga yene nye, a nga ku nye mebo. 23 A nga ye’elane nye biyoñe biyoñ a jô’ô na: “Mone ngone wom a kone mbia abui,* ma ye’elane wo, za’a beté nye mo nyule na a bo mvo’é a na a nyiñ.” 24 Ane ba Yésus be nga ke nsamba, beta nsamba bôt a mbe a tôñe’e nye a bametane nye.

25 Minga éziñ a mbe valé e zu koone metyi me kuiya nye nyule mimbu 12. 26 A nga ke a yen abui bedokita, ve mebiañe be nga ve nye me nga bo na a tu’a wô’ô mintaé,* a nga mane jañele moné ase a mbe a bili ve teke bo mvo’é, ôkon ô nga tu’a nenenen. 27 Éyoñ a nga wô’ô nkañete ya mame Yésus a mbe a bo’ok, a nga ke tyii nye mvus, nsamba bôt été a nambe éyé jé ya yôp. 28 Amu a mbe a jô’ô na: “Nge ma nambe fo’o ve biyé bié ya yôp, ma ye bo mvo’é.” 29 Été été metyi me nga tebe, ane a nga wô’ôtane nyule jé été na, mbia ôkon a too a konô’ôk a yeteya.

30 Yésus a nga yemelan été été na ngul éziñe ja te kôlô be nye. Ane a nga kôñelan a fombô nsamba bôt a sili na: “Za a te nambe ma biyé ya yôp?” 31 Ve beyé’é bé be nga yalane nye na: “Tame yen, nsamba bôte wo yemete wo mimfa’a mise, nne ô ne yeme sili aya na, ‘Za a te nambe ma?’” 32 Ve a mbe a fombô’ô bôte be mbe be bôma’ane nye na a yene za a te bo jam éte. 33 Minga a nga ko woñ a nyeñeban, amu a mbe a yeme’e jam é nga kui be nye, ane a nga zu ku Yésus mebo a mane kate nye mame mese a nga bo. 34 A nga jô nye na: “A ngo jam, mbunane wôé ô saéya wo, kele’e mvo’é, a ébubua ôkone jôé é yeteya.”

35 A ngenan a kobô’ô, bôte béziñe be nga suan, be so’o nda kaso ya synagogue a jô na: “Ngo jôé é wuya! Amu jé wo beta ndeñele Ñye’ele?” 36 Ve Yésus a nga wô’ô jame be mbe be jô’ô, nde a nga jô kaso ya synagogue na: “Te ko woñ, liti’i a mimboone na ô bili mbunan.” 37 A nji jô’é na môte mfe a tôñe nye, nge ô vaa ve Pierre, Jacques a Jean monyañe Jacques.

38 Éyoñe be nga kui nda kaso ya synagogue, a nga zu koone na bana be bo’o zô’é, ba bevo’o be nyônô’ôk a tat. 39 Éyoñ a nga nyiine nda été, a nga jô be na: “Amu jé mia yôn a bo abime zô’é di? Mongô a nji wu, ve a ne ôyo.” 40 Nde be nga fukane vioé a kpwe’ele nye, ve éyoñ a nga jô be na be kui nseñ, a nga nyoñ ésa mongô a nyia a bôte be mbe nsamba a nye, ane be nga nyiine vôme mongô a mbe a bôô. 41 Ane a nga nyoñe wo mone mongô a jô nye na: “Talitha qoumi” nalé ate éyoñe ba kôñelan a tinane na: “A mone mona minga, ma jô wo na, kôlô’ô si!” 42 Été été, mona minga a nga kôlô si a taté na a wulu, (a mbe a bili mimbu 12.) Nné ane be nga yene jam éte, bôte be mbe valé be nga bo fe’e ne vema a minleme mi nga jaé be a mevak. 43 Ve a nga kate be* biyoñe biyoñe na be bo te kañete môte mfe jam éte, a nga jô fe na be ve mongô jôme ya di.