Kalate Paul a nga tili Beromain
15 Ve bia bi ne ngul, bia yiane volô ba be ne ate’e mbunane na be jibi mame me ne adit asu dap a na bi bo te bo mame biabebiene bia yene mvaé. 2 Môt ase ya be bia a bo’o môte mbo’o mame me ne mvaé, mfa’a ya ve nye ngule nyul. 3 Amu Krist émien a nji be a bo’o mam a nye’e, ve aval é ne ntilane na: “Meta ya bôte ba ta wo me nga zu be ma.” 4 Amu mame mese me nga tilibane melu mvus, me nga tiliban asu na bi bi ñye’elan, ndemben a zene ya mbane ya jibi wongan a mvolane minleme ya Mintilan, bi ne bi ndi nlem. 5 Éyoñe ji, ngo’o nge Zambe a ve mbane ya jibi a mvolane minlem a ve mia zañe jenane na mi bi aval ôsimesane Yésus Krist a mbe a bili, 6 ndemben a nleme wua bi ne ve Zambe a Ésa Tate wongane Yésus Krist duma a tyiñe jia.*
7 Nde môt ase ya be mia a nyoñe’e* nyu mbo’o mvo’é, avale Krist fe a nga nyoñe mia mvo’é asu duma Zambe. 8 Amu ma kate mia de, Krist a ntoo mbo ésaé ya ba be ne ntyi’ane metyel, mfa’a ya liti na Zambe a ne benya mejôô, mfa’a ya bo’olô na bengaka’a Zambe a nga bo bemvamba bap be ne été, 9 a na meyoñe me ne ve Zambe duma amu mvame jé. Aval é ne ntilane na: “Amu nalé ma ye yeme wo zañe meyoñ, a ma ye yia éyôlé jôé bia ya ékaña’a.” 10 A a beta jô na: “Bo’ané mevak, a bôte ya meyoñ, nsamba a bôte bé.” 11 A beta jô na: “Kañané Yéhôva,* mia bôte bese ya meyoñ, a na bôte bese be ve nye duma.” 12 Ésaïe a beta jô na: “Môte ya nda bôte Jessé a ye bo nyu a ye tebe mfa’a ya jôé meyoñ; be nye meyoñe mese ma ye futi ndi nleme jap.” 13 Ngo’o nge Zambe a ve ndi nlem a jalé mia a mevak a mvo’é ése amu ndi mia futi be nye, asu na ndi nleme jenan é fuluku a zene ya ngule ya mfufube nsisim.
14 Nde mamiene me too ndi na mia fe mi ne bobenyañe bam, mi bili nkômbane ya bo mbamba be mam, mi ne njalan a ñyeman ôse, a na môt ase ya be mia a ne ngule ya lebe* nyu mbok. 15 Ve me nga tili mia mame méziñe bôsa mfa’a ya beta ba’alane mia mame mete amu beta mvame Zambe a nga ve ma 16 mfa’a ya bo mbo ésaé Krist Yésus asu meyoñ. Ma bo ésaé é ne mfuban a ngul ése mfa’a ya kañete mbamba foé Zambe, ndembene meyoñe mete me ne bo mveane Zambe a kañese ô ne étyi a mfufube nsisim.
17 Me ne meva’a ya bo ñyé’é Yésus, a bo ésaé Zambe. 18 Amu ma ye bo te kobô jam éziñ, nge ô vaa ve di Krist a nga bo a zene jam asu na meyoñe me bo mewôk a zene ya mejô mam a mimboone miam. 19 A ngule ya mesimba, a bitua bi mam, a ngule ya nsisime Zambe, nalé ate ataté Jérusalem akekui Illyrie, me nga tu’a kañete mbamba foé mfa’a Krist. 20 Ôwé, avale te fe, ma ve ngule jam ése na me bo te kañete mbamba foé vôme bôte be mbe be nga yeme Krist, asu na me bo teke lôñe mimbôka’a môte mfe a nga bôé; 21 ve fo’o ve aval é ne ntilane na: “Ba be nji yeme nye ba ye yen, a ba be nji tame wôk, ba ye tu’a wôk.”
22 Jôme te nje fe, abui biyoñ, me nji kui na me zu be mia. 23 Ve éyoñe ji, me maneya kañete mebôta mese ya mengoto ma, a tañ abui mimbu* me nga yi na me zu be mia. 24 Ajô te nde, éyoñe ma ye ke Espagne, ma buni fo’o na ma ye yene mia a na mia ye litane ma zen éyoñe me maneya bu’uban awoso denane tañe mone nté. 25 Ve éyoñe ji ma zu ke Jérusalem na me ke saane mimfufup. 26 Amu bôte ya Macédoine a Achaïe be mbe meva’a ya kabane biôme biap éyoñe be nga bo mimvean asu minzôzoé mi ne zañe mimfufube ya Jérusalem. 27 Nya ajôô, be nga bo de a mevak, ôwé, jam éte é mbe mvôla asu dap, amu nge meyoñe me nga kabane mame ya nsisim a be, be fe be bili na ba saane be a zene ya biôme bi mo biap. 28 Nde, éyoñe ma ye mane bo jam éte, éyoñe ma ye ve be mimveane* mite avale da yian, ma ye lôte be mia éyoñe ma ye ke Espagne. 29 Nde fe ma yeme na éyoñe ma ye zu be mia, ma ye soo abui bibotane bi so’o be Krist.
30 A bobejañ, ma jô mia a zene ya be Tate Yésus Krist a nye’ane wo so mfufube nsisime na mi ke ôsu a ye’elane nsamba a ma a nleme wônan ôse asu dam, 31 asu na me nyiibane be ba be ne te buni ba so Judée, a na mimfufube ya Jérusalem mi kañese ésaé jam. 32 Ndemben aval ane nkômbane Zambe ô ne, ma ye so be mia a mevak, a bia ye veane ngule nyule nsamba. 33 Ngo’o nge Zambe a ve mvo’é a bo a mia bese. Amen.