Mbamba foé Jean a nga tili

13 A amu a mbe a yeme’e ôsusua abô’ô Paska na awolo dé é kpwaaneya, na a kôlô si nyu a ke be Ésa wé. Yésus a nga nye’e bôte ya si nyu be ne émbé, a nga nye’e be akekui memane ya ényiñe jé. 2 Nté be mbe be ja’a bidi ya mame ngô’é, Diable a mbe a futiya nleme be Judas Iscariot mone Simon ôsimesane na a koñe nye. 3 Nde Yésus, amu a mbe a yeme’e na Ésa wé a veya nye biôme bise mo mé, a na a mbe a so’o be Zambe, a na a ntoo bebé ya bulane be Zambe, 4 a nga tebe tetele vôme be mbe be ja’a bidi ya mame ngô’é, a vaa éyé jé ya yôp, a to’é tawôlô a tiñeti angeteñe dé. 5 Éyoñ a maneya sôé mendime fandé été, a taté na a sôbe beyé’é bé mebo a fimine me a tawôlô a mbe a tii nye angeteñ. 6 Éyoñ a nga kui be Simon Pierre, a nga jô nye na: “A Tate, ye wo sôbe ma mebo?” 7 Yésus a nga yalane nye na: “E jame ma bo wo di, ô vo’o ki de wôk éyoñe ji, ve wo ye de wô’ô mvuse mame ma.” 8 Pierre a nga jô nye na: “Wo ye ke fo’o sôbe ma mebo.” Yésus a nga yalane nye na: “Nge ma bo te sôbe wo mebo, wo ye ke nyoñe ngap éziñ a ma.” 9 Simon Pierre a nga jô nye na: “A Tate, te sôbe ma mebo étam, ve sôbe fe ma mo a nlô.” 10 Yésus a nga jô nye na: “Môt ase a wobaneya a nji yiane beta bo jam afe, ve na a sôbane mebo, amu nyule jé ése é ntoo mfuban. A mia mi ne mfuban, ve sa ke mia bese.” 11 Amu a mbe a yeme’e môt a mbe na a koñe nye. Ajô te nde a nga jô na: “Sa ke mia bese mi ne mfuban.”

12 Éyoñ a nga mane sôbe mebo map, a jaé éyé jé ya yôp, a nga beta ke tabe si e tebele a jô be na: “Ye mia yem amu jé ma te sôbe mebo menan?” 13 Mia loone ma na, ‘Ñye’ele’ a na, ‘Tate,’ a mia bele amu me ne Ñye’ele a Tate. 14 Nde, nge ma, Tate a Ñye’ele, ma te sôbe mia mebo, aval éte da da môt ase a yiane* sôbe nyu mbo’o mebo. 15 Amu ma te liti mia éve’ela ya tôñe na, avale ma te bo mia, mia fe mia yiane bo avale da. 16 Ma bele fo’o ane ma jô mia na, mbo ésaé a vo’o ki dañe masa wé, nge nyu ba te lôm a vo’o ki dañe môt a te lôme nye. 17 Nge mia yeme mame ma, mevak a mia nge mia bo me. 18 Me nji jô mia bese, ma yeme ba me nga top, ve jam éte é ne nalé na éfuse ya mintilane ji é tôéban: ‘Nyu a di belete jam, a beteya étinkili jé* na a wosane ma.’ 19 Ataté éyoñe ji, ma kate mia de ôsusua na da boban, ndemben éyoñe da ye boban, mia ye buni na me ne nye. 20 Ma bele fo’o ane ma kate mia na, nyu ase a nyoñe môte me nga lôme mvo’é a nyoñe fe ma mvo’é, a nyu ase a nyoñe ma mvo’é, a nyoñe fe Nyu a nga lôme ma mvo’é.”

21 Éyoñ a maneya jô mame ma, nleme Yésus ô nga kumetan abui, ane a nga jô na: “Ma bele fo’o ane ma jô mia na, môte wua ya be mia a ye koñe ma.” 22 Beyé’é be nga taté na ba fombane be be, fek é too be njañan, be kômbô’ô yeme za émien a jô nye. 23 Ñyé’é wé wua, nyi Yésus a mbe a nyeke’e abui, a mbe a too fefele* Yésus. 24 Nde Simon Pierre a nga fombô nye ne tôéñ a jô nye na: “Kate’e bia za émien a jô nye.” 25 A nga subu bebé nku’u Yésus a jô nye na: “A Tate, a ne za?” 26 Yésus a nga yalane na: “A ne nyu ma ye ve éfuse belete ma dup.” Nde éyoñ a dubeya belet, a nga to’é je a ve je Judas, mone Simon Iscariot. 27 Éyoñe Judas a nga nyoñ éfuse belet, ane Satan a nga nyiine be nye. Nde Yésus a nga jô nye na: “E jame wo bo le, bo’o de avôl avôl.” 28 Ve teke môte wua ya ba be mbe be too si tebele a nga yem amu jé a jô nye nalé. 29 Bôte béziñe be mbe be simesa’ane na, amu Judas nnye a bili nkobe moné, Yésus a mbe a jô’ô nye na: “Kusu’u jôme ja sili bia asu abôk,” nge ki na a yiane ve minzôzoé jôm éziñ. 30 Nde éyoñ a nyoñeya éfuse belet, a nga kui nseñ été été. A alu é mbe é ntoo.

31 Nde éyoñ a nga kui nseñ, Yésus a nga jô na: “Éyoñe ji, Mona môt a nyoñeya duma, a Zambe a nyoñeya duma a zene jé. 32 Zambe émien a ye ve nye duma, a a ye ve nye duma été été. 33 A bone be bongô, me ngenan a mia mone nté. Mia ye jeñe ma, a avale me nga kate bejuif, ‘Vôme ma ke, mi vo’o zu wôé,’ ma kate fe mia de éyoñe ji. 34 Ma ve mia mfefé atiñe na, mi nye’esan, avale me nga nye’e mia, mia fe mi nye’esan. 35 A zene nyi, bôte bese ba ye yeme na mi ne beyé’é bam, nge mi bili nye’an e zañe jenan.”

36 Simon Pierre a nga jô nye na: “A Tate, wo ke vé?” Yésus a nga yalane na: “Vôme ma ke, ô vo’o ki tôñe ma éyoñe ji, ve wo ye tôñe ma mvuse ya valé.” 37 Pierre a nga jô nye na: “A Tate, amu jé me vo’o tôñe wo éyoñe ji? Ma ye ve ényiñe* jam asu dôé.” 38 Yésus a nga yalane na: “Wo ye ve ényiñe jôé asu dam aah? Ma bele fo’o ane ma jô wo na, ôsusua na nnôme kup a loñ, wo ye jô biyoñe bilale na ô nji yeme ma.”