Mbamba foé Luc a nga tili
23 Nde beta nsamba bôt a nga tebe ane môte wua a kee nye be Pilate. 2 Ane be nga taté na ba ve nye mekua be jô’ô na: “Bia te yene môte nyi a bo’o jo’ojo’o nlame wongan, a kama’ane bôte na be ya’ane César toya, a jô’ô na émien a ne Krist, njô bôt.” 3 Ane Pilate a nga sili nye na: “Ye ô ne Njôô bejuif?” Ane a nga yalan a jô’ô na: “Womiene wo jô de.” 4 Ane Pilate a nga jô bejôô beprêtre a minsamba mi bôte na: “Me lôô na môte nyi a nji bo mbia jam.” 5 Ve be nga yemete de be jô’ô na: “A tindi bôte na be bo éngana’a a miñye’elane mié e Judée ase, ataté Galilée azukui to’o va.” 6 Éyoñ a nga wô’ô de, Pilate a nga sili nge môt ate a ne môte ya Galilée. 7 Éyoñ a yeneya na a mbe môte ya vôme Hérode a jôé, ane a nga lôme nye be Hérode, nnye a mbe Jérusalem melu mete.
8 Éyoñe Hérode a nga yene Yésus, a nga vak abui. Amu nté ôse wu, a mbe a kômbô’ô yene Yésus amu mam a nga wô’ô mfa’a wé, a a mbe a buni’i na a zu yen ane a bo asimba éziñ. 9 Nde a nga taté na a sili nye minsili, a jam éte é nga nyoñ abui éyoñ, ve a nji yalane nye. 10 Ve bejôô beprêtre a bescribe be mbe be tele ve betetele, be bo’olô’ô nye a ôlun ôse. 11 Ane Hérode ba be bezimbi bé be nga biasé nye, a Hérode a nga kpwe’ele nye a jalé nye abeñ éyé. Mvuse ya valé a nga beta lôme nye be Pilate. 12 Môs ôte ôbien, Hérode ba Pilate be nga bo bemvôé a too ke na ôsusua na jam éte da kui, be mbe be siña’an.
13 Ane Pilate a nga tôkane bejôô beprêtre, betebe ôsu a bôt, 14 a jô be na: “Mia te soo ma môte nyu mi jô’ô na a tindi bôte na be bo éngana’a, ve tama yenan, ma te sili nye minsili miabebiene mi too, ve me nji yene na a yiane mekua ya mame mese mia bo’olô na a nga bo. 15 Avale da fe Hérode, amu a te beta lôme nye be bia, a tama yenan! A nji bo jam éziñe da yian awu. 16 Ajô te, ma zu bo na be bôme nye a suu nye.” 17 *—— 18 Ve nsamba bôt ôse ô nga yôtane yôp été na: “Wôé môte nyi,* a suu bia Barabbas!” 19 (Môt ate a mbe mimbôk amu éngana’a é nga bobane tison, a amu mewôé me bôt.) 20 Pilate a nga beta kobô be amu a mbe a kômbô’ô suu Yésus. 21 Ane be nga taté na ba yôtane be jô’ô na: “Ve élé ve nye! Ve élé ve nye!”* 22 Éyoñe lale a nga jô be na: “Amu jé? Mbia jame mbé môte nyi a te bo? Me nji yene jam éziñe da yian awu be nye; ve ma zu bo na be bôme nye a suu nye.” 23 Ane be nga ke ôsu a yemete, be sili’i a ngul ése tyiñe yôp na be wôé nye, a metyiñe map me nga wô’é. 24 Nde Pilate a nga tyi’i na, é boban avale be nga jô. 25 A nga suu môte be mbe be yete’e na a suu, nnye a mbe mimbôk amu éngana’a, a amu mewôé me bôt, ve a nga ve be Yésus na be bo avale nkômbane wop ô mbe.
26 A nga bo na, nté be mbe be kele’e nye, be nga bi môt éziñ, Simon ya Cyrène, a mbe a so’o afup, ane be nga ve nye élé mintaé* na a be’e je, a tôñe Yésus mvus. 27 Beta nsamba bôt a mbe a tôñe’e nye, binga be mbe été, be kute’e tôé amu mintaé a yône nye. 28 Yésus a nga kôñelane mfa’a binga be mbe a jô na: “A bengone ya Jérusalem, te beta yônané ma. Ve yônané miabebien a bone benan; 29 amu, yenané! Melu ma zu éyoñe bôte ba ye jô na, ‘Meva’a me bo’o a binga be ne minkôkôm, mebume me nji biaé a mebé me nji nyia mon!’ 30 Nde ba ye taté na ba jô minkôle na, ‘Kuané bia yôp!’ A bone minkôle na, ‘Buta’ané bia!’ 31 Nge ba bo mame ma, éyoñ élé é ngenane nyumin, jé ja ye boban éyoñe ja ye bo nkôt?”
32 Be nga soo fe bôte bebaé, beze mimfaka na ba zu wôé be a Yésus. 33 A éyoñe be nga kui vôme ba loone na Ékôkoé nlô, be nga bômôlô nye élé, beze mimfaka be too nye mefefel, wua mbo nnôm, nyi mbo’o mbo ngal. 34 Ve Yésus a mbe a jô’ô na: “A Ésa, jamé’é be amu be nji yeme jame ba bo.” Nde fe be nga wua mimbañe na be kabane biyé bié. 35 A bôte be nga tebe be fombô’ô nye. Ve beliti zene be mbe be kpwe’ele’e nye be woék, a be jô’ô na: “A nga nyii bôte befe, a tame nyii émiene nge a ne Krist Zambe, Nyu a ne Ntoban.” 36 To’o bezimbi be nga kpwe’ele nye, be nga zu a ve nye woon a ne sañ 37 be jô’ô fe na: “Nge ô ne Njôô bejuif nyi’i womien.” 38 Ntilan ô mbe fe nlô wé yôp ô jô’ô na: “Nyina a ne Njôô bejuif.”
39 Ane môte wua ya beze mimfaka be nga too be tyele a nye a nga taté na a kobô nye ébiasé a jô’ô na: “Nga ô ne Krist? Nyi’i womien, a nyi’i fe bia!” 40 Ane nyu mbok a nga komekane nye a jô’ô nye na: “Ye ô nji ko Zambe woñe nga, vôme mia môte nyi mi bili avale fonose* da? 41 A e zôsô été, mfa’a wongane bia yiane mame bia tôbane me ma, amu mame bi nga bo, ve môte nyi a nji bo jôm éziñ é ne abé.” 42 Ane a nga jô na: “A Yésus, ô simesa’ane ma éyoñe wo ye kui Éjôé jôé.” 43 A a nga jô nye na: “Ma kate fo’o wo dene na, wo ye bo a ma e Paradis.”
44 Éyoñe bebé zañe môs* é nga kui, dibi é nga mane yian a nlam ôse akekui bebé mewolo melale ya mame ngô’é,* 45 amu nlô jôbô a nga dim; ane éndelé ya temple é nga nyabé zañ. 46 A Yésus a nga tat e yôp été a jô na: “A Ésa, ma kee wo nsisime wome mo môé été.” Éyoñ a nga mane jô nalé ane a nga wu.* 47 Amu a nga yene mame mese me nga boban, évete bezimbi é nga taté na ja ve Zambe duma é jô’ô na: “Môte nyi a too fo’o zôsôa môt.” 48 A éyoñe minsamba mi bôte mise mi mbe valé na mia zu yen ane ba wôé Yésus mi nga yene mame me nga boban, mi nga bulane menda map mi kele’e mia kute tôé a ôlun. 49 A bôte bese be mbe be yeme’e nye be mbe be tele ôyap. Nde fe, binga ba be nye be mbe Galilée be mbe nsamba ôte, a be nga yene mame mete.
50 Môt éziñ a mbe valé a too jôé na Joseph, a mbe beta môte ya beta aba mejô bejuif, a mbe mbamba nlem a too fe zôsôa môt. 51 (Môte nyu a nji su’u nsôñan a mboone bôte bete.) A mbe môte ya Arimathée, tisone ya Judée, a mbe fe a yange’e Éjôé Zambe. 52 A nga ke yene Pilate a sili nye mbime Yésus. 53 Ane a nga vaa wô élé, a vuluku wô nya ndomboo été, a nga ke fe bôé wô soñ é mbe mfa’ane mbas akok été, a be ngenane te tame bôé môte mfe été. 54 A mbe môse ba kômesane Sabbat, a Sabbat a mbe a nga zu taté. 55 Ve binga ba be nye be nga so Galilée, be nga ke fe soñ a fombô avale be nga bôé nye, 56 ane be nga bulan a ke kômesane biôme bi ne mbamba menyum, a mimbone mi ne mbamba menyum. Ve be nga wo’one môse Sabbat aval atiñ é mbe é jô’ôk.