NLÔ AJÔ 10
Aval avé bisulan Bengaa be Yéhôva bi ne volô wo?
Ye ô tabeya bisulan Bengaa be Yéhôva môs éziñ? Nge nalé momo, ô ne taté ko woñe ya ke tabe bisulane bite. Ô ne sili womien na: ‘Jé ja boban bisulan bite? Bisulan bite bii bo ma mfi ôvé?’ Nlô ajô wu, wé yen aval avé bisulan bi ne volô wo na ô subu Zambe bebé, a avale bi ne volô wo ényiñe jôé.
1. Jam ôsu da bo na bi tabe bisulan e ne avé?
Tame yen avale ntili besam éziñ a nga ngôné jam ôsu da bo na bi tabe bisulan: “Bisulan été, ma ye kañe Yéhôva.” (Besam 26:12) Aval ete da da, Bengaa be Yéhôva ba wô’ô mvaé ya sulane vôme wua. Sondô ase, ba tabe bisulan asu na be kañe Zambe, asu na be yia nye bia, a ye’elan. Be wô’ô fe sulan asu beta bitôkan mbu ôse.
2. Jé wé yé’é nge ô zu tabe bisulan biangan?
Éyoñe bi ne bisulan biangan, bia nyoñe miñye’elan mia so Kalate Zambe été. Bia jeñe fe na bi tu’a wô’ô benya mejôô be ne été. (Lañe’e Néhémie 8:8.) Bisulan biangan bii volô wo na ô yé’é abui mam a lat a Yéhôva a mbamba mefulu mé. Éyoñ wé yem abim avé Yéhôva a nye’e wo, wé kômbô subu nye bebé. Wé fe yen avale Yéhôva a volô wo na ô bi mbamba ényiñ ataté den.—Ésaïe 48:17, 18.
3. Bisulan biangan bii bo wo mfi ôvé?
Yéhôva a jô bia na “môt ase a simesa’ane nyô mbok, nsimesane ya tindi nye mfa’a ya nye’an a mbamba mimboane mi mam; te [jô’é] nsulane wongane ya vôme wua.” (Behébreu 10:24, 25) Éyoñe wé zu tabe bisulan biangan, wé koone bôte ba kôme nye’esan, a be bili nkômbane ya yeme Zambe ane wo. Wé fe wô’ô be be laane mbamba be mam be nga yé’é Kalate Zambe été. (Lañe’e Beromain 1:11, 12.) Wé fe bi fane ya laan a minkoé a beluk ba kui na be ba’ale ava’a dap akusa bo minju’u ba tôbane mie. Bisulan bii so wo angôndô ya abui bibotan aval ô nji be ô simesa’an!
TUKA’A FAK
Yene’e avale bisulan Bengaa be Yéhôva bia boban, a amu jé e ne mfi na ô tabe bisulan bite.
4. Bisulan Bengaa be Yéhôva
Ntete mimbu ôsu, Bekristen be mbe be bili fulu ya sulane vôme wua na ba kañe Yéhôva. (Beromain 16:3-5) Lañe’e Becolossien 3:16, mvuse ya valé, yala’ane nsili wu:
Aval avé Bekristene ya ntete mimbu ôsu be mbe be kañe’ Yéhôva?
Dene fe, Bengaa be Yéhôva be bili fulu ya tabe bisulan. Asu na ô yem avale bisulan biap bia boban, futi’i VIDÉO. Mvuse ya valé, fombô’ô fôtô a liti bôte be too ésulan, a yala’ane minsili mi.
Aval avé bisulan bia boban Aba Éjôé bia funane mame wo te lañe Becolossien 3:16?
Ye wo te nye’e jam éziñ a lat a bisulan biangan éyoñe wo te yene vidéo nge ke fôtô?
Lañe’e 2 Becorinthien 9:7, mvuse ya valé, yala’ane nsili wu:
Amu jé Bengaa be Yéhôva ba sili ki bôte moné éyoñe ba zu tabe bisulane biap?
Sili’i môt a bo wo ayé’é na a kate wo mame bii yé’é ésulan ja zu.
Ngab évé ya ésulan wo simesane na jé dañe volô wo?
Ye wo too ô yemek?
Asu na ô yem mewolo a bevôm bia bo bisulan biangan si se meku’u menyin, kele’e anjeñe mefoé dangan jw.org.
Éyoñe bia tabe bisulan biangan, bia vôlô’ô minkañete, besisia, bia yene fe bevidéo. Ésulan ése ja taté a ja man a jia a meye’elan
E wô’ô kui biyoñe biziñ na be ve bôte fane ya ve biyalan
Môt ase a ne fili ya zu tabe bisulan biangan: menda me bôt, minkoé, minnôm, a bongô
Bengaa be Yéhôva ba sili ki bôte moné éyoñe ba zu tabe bisulane biap
5. Bia yiane ve ngul asu na bi tabe bisulan
Bi tame kobô ajô nda bôte Yésus. Mbu ôse, be mbe be yiane wulu bebé kilimeta 100, be kele’e ba dañe minkôl, asu na be téé Nazareth na ba ke temple ya Jérusalem. Lañe’e Luc 2:39-42, mvuse ya valé, yala’ane minsili mi:
Ye wo simesane na dulu éte é mbe be tyi’ibi?
Amu jé e ne sili na ô ve abui ngul asu na ô tabe bisulan?
Ye wo simesane na e ne mfi na ô tabe bisulan? Amu jé?
Bible a liti na e ne nya mfii na bi tabe bisulan. Lañe’e Behébreu 10:24, 25, mvuse ya valé, yala’ane nsili wu:
Amu jé bia yiane bo mban bisulan?
BÔTE BÉZIÑ BA JÔ NA: “Bisulan bi nji bo mfi éziñ, amu môt ase a ne yé’é Bible a too nda jé.”
Éfus évé nge ke nkañete ya Bible ôvé wo liti na Yéhôva a yi na bi tabe bisulan?
ÔBALEBAS
Bisulan bii volô wo na ô yé’é abui mam a lat a Yéhôva, ô yemete amvôé dôé a nye, a na ô kañe nye fufulu a bôte bevok.
Ô ne yalan aya?
Amu jé Yéhôva a yi na bi tabe bisulan?
Jé wé yé’é nge ô tabe bisulan Bengaa be Yéhôva?
Bisulan bi ne fe bo wo mfi mfa’a ôvé?
MAM MEFE ME NE VOLÔ WO
Ye wo ko woñe ya ke tabe bisulan Bengaa be Yéhôva? Tame yen avale môt éziñ a mbe a ko bisulan Bengaa be Yéhôva woñ a nga su’ulane bie nye’e.
Yene’e avale ndôman éziñ ja bu’ubane bisulan, a mam a bo asu na a bo teke sub ésulan éziñ.
Yene’e mam bôte béziñ ba jô a lat a bisulan Bengaa be Yéhôva.
“Pourquoi assister aux réunions tenues à la Salle du Royaume ?” (Ô ne koone nye anjeñ mefoé dangan)
Yene’e avale ze mimfaka éziñ a nga tyendé éyoñ a nga taté na a tabe bisulan Bengaa be Yéhôva.
“Je ne sortais jamais sans mon arme” (Nkume mmombô a bete ya Ngone zangbwale é to alu 1, mbu 2014)