NLÔ AJÔ 38
Liti’i Yéhôva na wo nyan ényiñ
Ényiñ é ne njalan a abui mbamba be mam bi ne bo a bu’ubane me. To’o éyoñe bi tele minju’ été, bi ne bu’ubane mam méziñe ya ényiñ. Aval avé bi ne ve Yéhôva akéva amu ényiñ a nga ve bia? A amu jé é ne nya mfii na bi bo de?
1. Amu jé bia yiane nyan ényiñ?
Bia yiane nyan ényiñ amu a ne dase da so bia be Ésaa wongane ya nye’an, Yéhôva. Nnye a ne “anjeñe ya ényiñ,” nnye fe a nga té jôm ése é vee. (Besam 36:9) “Émien a ve bôte bese ényiñ, a mvebe, a mam mese.” (Mame minlôman 17:25, 28) Yéhôva a nga ve bia mam mese ma sili asu na bi nyiñe mvo’é. A nga té fe abui mam asu na bi wô’ô ényiñe mvaé.—Lañe’e Mame minlôman 14:17.
2. Aval avé ô ne liti Yéhôva na wo nyan ényiñ a nga ve wo?
Yéhôva a nga taté na a nyoñe wo ngap éyoñ ô mbe ô ngenane abume be nyia wôé. David, mbo ésaé Yéhôva, a nga jô nye na: “Mise môé me nga yene ma me ngenan te kômban.” (Besam 139:16) Ényiñe jôé é ne édima mise me Yéhôva. (Lañe’e Matthieu 10:29-31.) Yéhôva é wô’ô angôndô ya abé nge môt a vañe wôé nyi mbok, nge ke émien.a (Nkôlan 20:13) A wô’ô fe abé éyoñe bia bo mam ma liti na bia biasé ényiñe jangan nge ke ji bôte bevok. Éyoñe bia liti na bia nyan ényiñe jangan a semé ji bôte bevok, bia liti Yéhôva na bia ve nye akiba asu mbamba das a nga ve bia.
TUKA’A FAK
Yene’e mam ô ne bo asu na ô liti na wo nyan ényiñe Zambe a nga ve wo.
3. Nyoñe’e ngab a nyule jôé
Bekristene be veya bebiene ngumba be Yéhôva, ajô te ba belan ényiñe jap ése na be bo nye ésaé. A ne ane ba ve Zambe menyule map metuna’a. Lañe’e Beromain 12:1, 2, mvuse ya valé, yala’ane minsili mi:
Jé ja yiane tindi wo na ô nyoñe ngab a nyule jôé?
Mam mevé ô ne bo asu na ô nyoñe ngab a nyule jôé?
4. Tabe’e ntyele ya bo mam me ne balé nge ke wôé môt
Kalate Zambe a jô bia na bi sa’ale mimboone mi ne telé ényiñe jangan nge ke ji bôte befe mbia été. Futi’i VIDÉO asu na ô yen mam méziñ ô ne bo asu na ô ba’ale ényiñe jôé.
Lañe’e Minkana 22:3, a yene’ aval avé ô ne ba’ale ényiñe jôé a ji bôte bevok . . .
nda jôé.
nda bisaé jôé.
éyoñe wo bo sport.
éyoñ ô bete metua nge ke éyoñe wo dutu metua.
5. Semé’é ényiñe mon a ngenan abum été
David a nga liti na Yéhôva a fombô mam mese ma kui mon to’o a ngenan abume be nyia. Lañe’e Besam 139:13-17, mvuse ya valé, yala’ane nsili wu:
E mise me Yéhôva, ényiñe môte ja taté éyoñ évé, ye éyoñ a ngenan abume be nyia, ye môs a bialé?
Metiñe Yéhôva a nga ve ayoñ Israël me mbe me ba’ale’e benyia a bone be ne be mebum. Lañe’e Nkôlan 21:22, 23, mvuse ya valé, yala’ane minsili mi:
Aval avé Yéhôva a mbe a yene’e môt a wôé mon a ngenan abum été a too ke na a nji vañ?
Yéhôva a wô’ôtan aya éyoñe môt a vañe wôé mon a ngenan abum été?b
Aval avé wo yen ôsimesane Zambe a lat a jam ete?
To’o minga a nyan ényiñ, a ne simesane na mvaan abum ô ne susu’a jam a ne ngule ya bo. Lañe’e Ésaïe 41:10, mvuse ya valé, yala’ane minsili mi:
Nge minga a jeñe na a vaa abum amu a tôbane minju’u miziñ ényiñe jé nge ke na bôte ba yemete nye na a bo de, a yiane ke sili mvolan be za? Amu jé?
BÔTE BÉZIÑ BA JÔ NA: “Minga ase a ne fili ya tobe nge a vaa abum nge momo, amu a ne nyule jé.”
Jé ja liti wo na Yéhôva a nyan ényiñe nyia a ji mon a ngenan abum été?
ÔBALEBAS
Kalate Zambe a ye’ele bia na bia yiane nyan a ba’ale ényiñe Yéhôva a nga ve bia. Jam ete da fombô fe ényiñe bôte bevok.
Ô ne yalan aya?
Amu jé ényiñ môt a binam é ne édima mise me Yéhôva?
Aval avé Yéhôva a wô’ôtan éyoñ môt a vañe wôé émien nge môte mfe?
Jé ja bo na ô nye’e ényiñe Zambe a nga ve wo?
MAM MEFE ME NE VOLÔ WO
Aval avé ô ne ve Yéhôva akiba amu ényiñ a nga ve wo?
Yene’ éyalane ya nsili wu, ‘ye Zambe a ne jamé minga a tameya vaa abum’?
“L’avortement : qu’en dit la Bible ?” (Ô ne koone nye anjeñe mefoé dangan)
Mbôle Yéhôva a nyan ényiñ, yene’ avale mimvômane wo yiane top.
Aval avé Kalate Zambe a ne volô môt a kômbô wôé émien?
a Yéhôva a nyoñe ngap a bôte be ne minleme ntya’an. (Besam 34:18) A kôme yeme na, mintaé mi ne môte nlem été mi ne tindi nye na a kômbô wôé émien, nde a yi na a volô avale bôt ete. Asu na ô yeme mam me ne volô wo na ô wosan aval asimesan ete, lañe’e nlô ajô ô ne na: “Je veux mourir—Est-ce que la Bible peut m’aider si j’ai des idées suicidaires ?” Wé koone wô nlô ajô wu, ngap é ne nlô ajô na Mam mefe me ne volô wo.
b Bôte be tameya vaa abum môs éziñe ba yiane ki simesane na Yéhôva a vo’o jamé be. Nge wo kômbô yeme jam Kalate Zambe a jô a lat a jam ete, fombô’ô nlô ajô ô ne na “L’avortement: qu’en dit la Bible?” Wé koone wô nlô ajô wu, ngab é ne nlô ajô na Mam mefe me ne volô wo.