Mam mevé Zambe aye bo?

Nge nju’ ô bi wo, wo ye tabe ndi na nyo mvôé ja ye zu volô wo. Abui bôte da simesane na Zambe a nji bo mvôé jap; amu a nji ve’ele volô be, éyoñe be tele mbia été. Ve nya ajôô a ne na, Zambe a a volôya be nya abui, a na a ye mane vaa mam mese ma tya’a be minlem. Jé nje aye bo?

A YE MANE MBIA BE MAM BESE

Asu ya na abé e man, Zambe a ye taté vaa nyô a bo na e boban. Kalate Zambe a kate bia nyô a bo na abé e boban éyoñ a ajô na: “Si nyô ése é jô’ô be mbia môt ate.” (1 Jean 5:19) “Mbia môt” éfuse ji ja jôô nye a ne Satan, nnye a ne fe môte Yésus Krist a nga loene na “njô bôte ya si nyô.” (Jean 12:31) Mbia be mam ma boban si nyô, ma so beta ésaé Satan a bo émo ji. Jé nje Zambe a ye bo?

Ana’ana, Yéhôva Zambe a ye belane mone wé Yésus Krist asu ya na a “tyam mimboane mi mam mi Diable.” (Behébreu 2:14; 1 Jean 3:8) Kalate Zambe a liti na, Satan émien a yeme na a li’iya “a bili ve ôyôm nté” na a wu. (Nlitan 12:12) Zambe aye fe mane jaane bôte bese ba bo mbia be mam.​—Besam 37:9; Minkana 2:22.

AYE BO NA SI E BO PARADIS

Éyoñ a ye mane va mbia be mam bese e si va, Nté wongan aye tôé nsôñané wé a nga bili atata’a asu môta binam a si nyô. Ényiñe ja ye bo aya melu ma zu?

Mvo’é ja libi. “Bôte be ne minleme évôvoé b’aye nyoñe si a b’aye yen mvaé jap amu abui mvo’é.”​—Besam 37:11.

Bidi bi aye bo ne vôô nat. “Abui bidi d’aye bo si nyô, mebôbône minkôle yôp, bibuma ya été bi aye fô’ôsan aval ane [nkôle] Liban.​—Besam 72:16.

Mbamba menda a mbamba ésaé. “B’aye lôñe menda, a tabe me, b’aye bé mefupe mindik a di bibuma ya été. . . . Bôte bam be ne mintoban b’aye jaé vak a ésaé ya mo map.”​—Ésaïe 65:21, 22.

Ye wo fe wo kômbô yene si éto nalé? Ana’ana bôte b’aye nyiñe nalé môs ôse ya yôp.

AYE MANE ÔKON A AWU

Melu ma, môt ase ya be bia a ne fame ôkon a wu, ve jam ete da ye ke beta boban. Zambe aye belane ntañe Yésus a nga ve asu ya na “bôte bese môt a buni nye a ye jañ, ve tabe ényiñ ya melu mese.” (Jean 3:16) Ntañ ôte wo ye bo ésaé évé?

Ôkon wo ye man. “Môt a to été a ye bo te jô na, m’akon: bôt be to été b’aye jamban mbia be mam map.”​—Ésaïe 33:24.

Awu da ye ke beta wôé môta binam. “A mineya awu nnôm éto, a Tate Yéhôva a ye fimi mesu mese milik, nalé fe a ye vaa ôsone ya bôte bé, ô vase si se: amu Yéhôva a kobôya de.”​—Ésaïe 25:8.

Bôte ba ye nyiñe nnôm éto. “Ve mveane zésé ya Zambe ô ne ényiñe ya melu mese be Krist Yésus Tate wongan.”​—Beromain 6:23.

Bewu ba ye beta wômô miñwuan. “Bôt be aye wômô mesoñ, ba be ne zôsô a ba be ne bikotekot.” (Mam Minlôman 24:15) Ntañ wo ye volô na bôte be nga wu be beta wômô miñwuan.

Aval avé Zambe aye bo jam ete?

AYE TELÉ MBAMBA ÉJÔÉ

Zambe a ye tôé ngaka’a jé a lat si a môta binam a zene ya Éjôé Zambe e tele yôp été, nje Yésus Krist a ne njôô. (Besam 110:1, 2) A ne Éjôé Yésus Krist a nga ye’ele beyé’é bé na be ye’elan éyoñ a nga jô na: “A Tate wongan a ne yôp, . . . Éjôé jôé e za’ak.”​—Matthieu 6:9, 10.

Éjôé Zambe ja ye jôé si se, a mane vaa mbia be mam bese ba soo minju’u si se. Éjôé éte ja dañe bijôé bise môta binam a teléya mvaé ! Jôm été nje Yésus émien a nga kañete “mbamba foé” ya Éjôé nté ôse a nga nyiñe si va, nde a nga jô beyé’é bé na, be bo ésaé été.​—Matthieu 4:23; 24:14.

Amu beta nye’an a nye’e môta binam, Yéhôva a nga ka’a na a ye bo môta binam mba be mam bete bese. Ye nalé a nji tindi wo na ô kômbô late ngbwa a nye? Nge wo tyi’i na wo bo amvôé a nye, jé amvôé éte da ye ve wo? Nlô ajô wo tya’a valé, wo ye ve éyalan.